Ikipe y’Igihugu Amavubi yatsinzwe na Uganda Cranes ibitego 3-0 mu mukino ubanza wo gushaka itike yo kwitabira igikombe cya Afurika cy’abakinnyi bakina imbere mu bihugu byabo (CHAN) kizabera muri Kenya mu 2018.

Uyu mukino wabaye kuri uyu wa Gatandatu, tariki ya 12 Kanama kuri St Mary Kitende Stadium i Entebbe muri Uganda. Amavubi yari yaherekejwe n’abafana benshi barimo abasanzwe bamenyerewe muri Rayon Sports bibumbiye mu matsinda ya March Generation na Gikundiro Forever n’abandi Banyarwanda baba muri iki gihugu.

Uganda Cranes yakiniraga imbere y’abafana bayo yatangiye umukino irusha Amavubi ariko uburyo yabonye ku ikubitiro ntiyabubyaje umusaruro kuko umuzamu Nzarora Marcel, wabanje mu kibuga asimbuye Ndayishimiye Eric Bakame ufite amakarita abiri y’umuhondo, yababereye ibamba.

Ikipe ya Uganda yaje kwinjira neza mu mukino ubwo yatsindaga igitego cya mbere ku munota wa 16 nyuma y’ikosa ryakozwe na Rucogoza Aimable Mambo, umusifuzi agahita atanga penaliti yinjijwe neza na Muzamiru Mutyaba.

Uyu mukinnyi wari wazonze ab’inyuma b’Amavubi nyuma y’iminota icumi gusa yahise atsinda igitego cya kabiri ku mupira mwiza yari ahawe na Derrick Nsibambi.

Iminota 45 y’igice cya mbere yarangiye u Rwanda rwatsinzwe ibitego 2-0 byanatumye mu cya kabiri Umutoza w’Amavubi, Antoine Hey, akora impinduka mu bakinnyi babanje mu kibuga akuramo Mubumbyi Barnabé yinjiza rutahizamu Biramahire Christophe Abeddy.

Nyuma y’izi mpinduka umutoza yakoze Amavubi yahise atsindwa igitego cya gatatu cyabonetse ku munota wa 49 gitsinzwe na Derrick Nsibambi ku burangare bw’ab’inyuma.

Mu gihe umukino waganaga ku musozo Niyonzima Olivier yahaye umwanya Muhire Kevin agerageza kongera imbaraga mu busatirizi ariko na we ntacyo yahinduye kuko warangiye Amavubi atsinzwe ibitego 3-0.

U Rwanda rutakaje umukino ubanza wa Uganda rufite akazi katoroshye ku wo kwishyura uteganyijwe kubera mu Mujyi wa Kigali mu cyumweru gitaha aho rusabwa nibura gutsinda ibitego 4-0 kugira ngo rukatishe itike yo kwitabira imikino ya CHAN 2018 izabera muri Kenya.

Abakinnyi babanjemo ku mpande zombi:

U Rwanda: Nzarora Marcel, Manzi Thierry, Rucogoza Aimable ‘Mambo’, Nsabimana Aimable, Niyonzima Olivier, Mukunzi Yannick, Bizimana Djihad (Kapiteni), Iradukunda Eric, Manishimwe Emmanuel, Mubumbyi Barnabé na Nshuti Dominique Savio.

Abakinnyi 11 b'Amavubi babanje mu kibuga

Uganda: Ismael Watenga, Nsibambi George, Mucureezi, Nico Wakiro Wadada (Kapiteni), Savio Kabugo, Muzamiru Mutyaba, Bukenya, Muwanga, Muleme, Kaliisa na Ssekisambu.

Abakinnyi 11 ba Uganda Cranes babanje mu kibuga

Abafana b’Amavubi mbere y’umukino bari babukereye

Abafana b'u Rwanda bazengurutse mu bice bitandukanye muri Uganda basaba Abanyarwanda kuza gushyigikira Amavubi
Abafana b'Amavubi bari buzuye imodoka berekeza kuri St Mary Kitende Stadium mu Mujyi wa Entebbe
Rujugiro usanzwe afana APR FC yari inyuma y'Amavubi kuva aho yari acumbitse kuri hoteli
Rwarutabura uteruye Rujugiro bari muri Uganda gutiza umurindi ikipe y'Igihugu Amavubi
Abafana b'Amavubi bagiye gutegera abakinnyi kuri Imperial Resort Beach Hotel bari bacumbitsemo
Rujugiro na Rwarutabura mbere yo kwerekeza kuri St Mary Kitende Stadium bari bafite akanyamuneza
Amabendera y'u Rwanda yari yiganje hanze ya St Mary Kitende Stadium

Uko umukino wagenze mu mafoto:

Abakinnyi b'Amavubi baririmba "Rwanda Nziza"
Uhereye ibumoso: Djihad Bizimana, Nzarora Marcel, Iradukunda Eric na Niyonzima Olivier baririmba indirimbo yubahiriza igihugu
Umutoza wa APR FC, Jimmy Mulisa (uwa kabiri uturutse ibumoso ku murongo w'imbere) mu barebye uyu mukino
Amakipe yombi yaririmbye indirimbo zubahiriza ibihugu mbere yo gutangira umukino
Abakinnyi ba Uganda Cranes bafite ibigango ugereranyije n'ab'Amavubi
Djihad Bizimana wari Kapiteni w'Amavubi atera coup franc
Abasore ba Uganda barushaga Amavubi mu kibuga hagati
Manishimwe Emmanuel ahanganiye umupira n'umukinnyi wa Uganda
Uganda Cranes yanyagiye Amavubi ibitego 3-0 mu gushaka itike ya CHAN 2018 izabera muri Kenya
Abatoza ba Uganda bishimira igitego
Umutoza wa Kiyovu Sports, Cassa Mungo André na we yarebye uyu mukino
Mubumbyi Barnabé (wambaye nimero icyenda) na Nshuti Dominique Savio bahanganye na Kapiteni wa Uganda Nico Wakiro Wadada
Abanya-Uganda bari baje gushyigikira ikipe yabo ari benshi
Savio Nshuti ahanganye n'umukinnyi wa Uganda
Abanyarwanda bari babukereye baje gushyigikira ikipe y'Igihugu Amavubi
Umutoza w'Amavubi, Antoine Hey nyuma yo gutsinda na Uganda Cranes
Itsinda March Generation ryateraga Amavubi ingabo mu bitugu
Abafana ba Uganda bari mu bicu bishimira intsinzi y'ikipe yabo
Amahirwe, abakinnyi b'Amavubi babonye imbere y'izamu rya Uganda ntabwo bashoboye kuyabyaza umusaruro
Umutoza w'Amavubi n'abakinnyi basaba guhabwa penaliti, umusifuzi arabyirengagiza
Ubwugarizi buyobowe na Rucogoza Aimable Mambo (waseretse ashaka umupira) bwari bwaburijwemo imbere y'Abagande
Myugariro Nsabimana Aimable akiza izamu ry'Amavubi ryari ryugarijwe
Karangwa Jules (uwa mbere iburyo) ukorera Royal TV mu banyamakuru barebye uyu mukino
Umukino wahuje u Rwanda na Uganda wabereye kuri St Mary Kitende Stadium mu Mujyi wa Entebbe
Antoine Hey yari yashobewe nyuma yo gutsinda ibitego 3-0
Nkundamaci w'i Kirinda n'umufana wa Uganda bahuje urugwiro
Ati "Tubatsinze bitatu, impamba tuzazana i Kigali"

Amafoto: Nyabyenda Jean Baptiste


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved