Ikipe y’igihugu ya Uganda yitegura guhura n’Amavubi y’u Rwanda mu mukino utoroshye kuri uyu wa Gatandatu, iri mu byishimo byo kugarura umwe mu bakinnyi b’inkingi za mwamba, Savio Kabugo wari wavunitse.

Muri Uganda barahiye gutsinda Amavubi mu mukino ubanza wo mu ijonjora rya nyuma ryo gushaka itike y’igikombe cya Afurika cy’abakina imbere mu bihugu byabo, CHAN 2018, ugomba kuba kuri uyu wa Gatandatu kuri St Mary Kitende Stadium.

Iyi kipe izaba ikina umukino wa mbere idafite Micho Sredojevic wari umaze imyaka hafi itanu ayitoza, izaba iyobowe na Moses Basena na Fred Kajoba babaye bashyizweho by’agateganyo.

Amakuru kuri bo ni uko babashije kugarura umwe muri ba myugariro bakomeye cyane bita “Umwami w’ubwugarizi” Savio Kabugo wari wagize imvune mu myitozo yo kuwa Gatatu ndetse bikaba byavugwaga ko atazakina n’Amavubi.

Nk’uko ikinyamakuru Kawowo kibitangaza, imvune y’uyu mukinnyi yari yateye ubwoba Abagande bitewe n’uko no mu 2015 yigeze kuvunika bisa n’ibyoroheje ariko biza gukomera ndetse amara imyaka ibiri hanze y’ikibuga.

Arema abakunzi b’ikipe ya Uganda agatima, Kabogo yagize ati “Ndumva meze neza cyane. Naruhutse neza, none ubu ndumva nta bubabare ngifite. Niteguye gufasha igihugu cyanjye kuwa Gatandatu duhanganye n’u Rwanda.”

Umutoza wa Uganda Cranes Kajoba we yatangaje ko azakora impinduka nke cyane mu bakinnyi 11 bakoreshwe na Micho mu byumweru bibiri bishize ubwo batsindaga Sudani y’Epfo ibitego 5-1.

Ibitangazamakuru bitandukanye byo muri iki gihugu bivuga ko ashobora kubanza Ismail Watenga, Savio Kabugo, Paul Musamali na Isaac Muleme mu bwugarizi, kapiteni Bernard Muwanga, Milton Karisa, Tom Masiko na Muzamir Mutyaba bagakina hagati mu kibuga naho Moses Waiswa na Derrick Nsibambi bagashaka ibitego.

Uyu mugabo wahawe gutoza imikino itanu yakwitwara neza akaba ashobora kuzahabwa iyi kipe burundu, yavuze ko bagiye guhura n’Amavubi bifitiye icyizere cyo kuyatsinda no kuyasezerera nubwo azi neza ko hari abafana n’abayobozi batakibafitiye.

Uyu mukino uzabera kuri St Mary Kitende Stadium saa cyenda z’i Kigali (saa kumi z’i Kampala) ukazasifurwa n’Abarundi Ndabihawenimana Pacifique, Baguma Gustave, Habimana Willy na Gatogato Georges naho uhagarariye umukino akazaba ari Mohamed Omar Abubaker Yusuf ukomoka muri Kenya.

Basena ayobora imyitozo ya Uganda Cranes yitegura Amavubi
Savio Kabugo (ufite umupira) yagarutse muri bagenzi be nyuma y'akabazo k'imvune yari yagize


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved