Umutoza w’ikipe y’igihugu Amavubi, Antoine Hey nyuma yo kunyagirwa na Zanzibar mu mukino wa kabiri muri Cecafa Senior Challenge Cup, yashimangiye ko atajyanye ikipe yo guhangana ahubwo ari ugufasha bamwe mu bakinnyi batangiye gukina bwa mbere ku rwego mpuzamahanga n’abamaze igihe baravunitse, bityo bakaba bakomeje gufata amasomo.

Kuri uyu wa Kabiri, Amavubi y’u Rwanda yatsinzwe na Zanzibar ibitego 3-1 mu mukino wa kabiri wo mu irushanwa rihuza ibihugu byo mu Karere ka Afurika y’i Burasirazuba no Hagati (Cecafa Senior Challenge Cup 2017) uba uwa kabiri atsinzwe nyuma y’uwa Kenya yayatsinzemo 2-0.

Umukino wa Zanzibar urangiye, Umudage Antoine Hey utoza Amavubi yatangaje ko gutsindwa n’iki gihugu bigoye kubyakira ariko yishimira ko kimwe mu byajyanye iyi kipe muri Kenya cyo gufata amasomo kirimo kugerwaho.

Yagize ati “Muri rusange byari igeragezwa ryiza ku bakinnyi bacu, byari amasomo meza ndetse no gukomeza kumenyera ku bakinnyi bacu. Bamwe muri bo ni umukino wabo wa mbere ku rwego mpuzamahanga, abandi nibwo barimo gukira imvune z’igihe kirekire. Byari byiza kubabona, kubona icyo bashobora gutanga. Urebye turi hano gufata amasomo no gutegura abakinnyi mbere ya CHAN.”

Amavubi yari yatsindiwe ku mukino wa nyuma w’iri rushanwa riheruka mu 2015 agitozwa na Jonathan McKinstry, kugeza ubu ntarabona inota na rimwe muri Cecafa, ni aya nyuma mu itsinda ndetse arasabwa byanze bikunze kwitwara neza ku mukino afite kuri uyu wa Kane na Libya akayikuraho amanota atatu bitaba ibyo akazahita asezererwa atarenze umutaru.

Umutoza w'Amavubi yatangaje ko yishimiye amasomo ikipe ye iri gukura muri Cecafa


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved