IGIHE

Bite bya Ani Elijah mu ikipe y’igihugu ’Amavubi’?

0 18-05-2024 - saa 09:27, Jah d'eau Dukuze

Rutahizamu w’ikipe ya Bugesera Ani Elijah ni umwe mu bakinnyi bivugwa ko bari gukomanga umuryango mu ikipe y’igihugu y’u Rwanda Amavubi, aho nta gihindutse ashobora kwiyongera ku rutonde rw’abakinnyi bahamagawe bitegura imikino yo muri Kamena.

Uyu rutahizamu ukomoka mu gihugu cya Nigeria, yasoje umwaka wa shampiyona anganya ibitego na Victor Mbaoma Chukuemeka wa APR FC aho 15 batsinze byatumye ari bo baje ku isonga mu gutsinda byinshi muri Shampiyona y’icyiciro cya mbere.

Si we munyamahanga wa mbere ubikoze, ni iki cyatumye ari we utekerezwa?

Mbere y’icyorezo cya Covid 19, inteko ishinga amategeko mu Rwanda yaje kwemeza umushinga w’itegeko rivuga ko umunyamahanga ufite impano idasanzwe yafasha igihugu, ashobora gusabirwa ubwenegihugu agahita abuhabwa bidaciye mu zindi nzira ndende abandi basanzwe bifashisha.

Iri tegeko ku bakunzi b’imikino bumvaga ko ari inzira igiye gutuma tubona abakinnyi b’ibikomerezwa bafatanya n’abahari mu guha ibyishimo abanyarwanda, gusa nubwo mu mikino y’intoki ya Volleyball na Basketball bagiye bifashishwa, mu mupira w’amaguru kugeza magingo aya ntibiragera ku rwego abafana bari biteze.

Aha nyamara, abakinnyi nka Babuwa Samson wa Sunrise, Nwosu Samuel wakiniye Etoile de L’Est cyangwa se Soumalia Molo wigaragaje muri Etincelles na bo bagiye batsinda ibitego byinshi muri shampiyona y’icyiciro cya mbere ariko nta n’umwe wigeze atekerezwaho gukemura ikibazo cy’ubusatirizi igihugu cyari gifite.

Amakuru agera kuri IGIHE ni uko nyuma yo kwitwara neza ku mikino ibiri y’amajonjora, umutoza w’ikipe y’igihugu, Umudage Torsten Frank Spittler, yaje kubwira abayobora imikino mu Rwanda ko yifuza rutahizamu kuko umusaruro wa Nshuti utamunyuze. Ibi kandi yaje kubisubiramo imbere y’itangazamakuru mu Ugushyingo 2023 aho yavuze ko akeneye rutahizamu w’ibigango ariko ufite na tekinike.

Uyu mutoza ngo nyuma yo kureba imikino itatu ya Bugesera, akaba yaraje kwemeza ko Ani Elijah ari we rutahizamu yifuza.

Ferwafa yaba yarashyizwe mu bwiru ku kwemeza Elijah nka rutahizamu w’Amavubi?

Mu busanzwe mu gusabira ubwenegihugu umukinnyi, ishyirahamwe bireba ryandikira Minisiteri ya Siporo ribabwira impamvu bumva uwo mukinnyi akenewe, maze aba na bo bamara kwemera bakandikira ababishinzwe agasabirwa ubwenegihugu.

Aha ariko, Amakuru agera kuri IGIHE avuga ko iyemezwa rya Ani Elijah ryagizwemo uruhare n’abantu bake aho muri Ferwafa bivugwa ko byari bizwi na Perezida w’ishyirahamwe Munyentwari Alphonse wenyine.

Umutoza Torsten akaba ngo yarahise ashyikiriza iki gitekerezo muri Minisiteri no kuri Perezida wa Ferwafa cyane ko ngo atari yanyuzwe n’uburyo imikino ya gicuti yari yatekereje atari yo yahawe, aho yagize impungenge ko nanone bitinze cyane muri Ferwafa byatuma hari abatabyemera maze umukinnyi ntasabirwe ubwenegihugu.

Kugeza ubu ibisabwa bikaba bivugwa ko byatanzwe ngo yakirwe ubwenegihugu.

Amategeko ya FIFA ntiyazatuma tubona Birori Daddy mushya?

Nta gihe gishize ikipe y’igihugu y’umukino wa Volleyball itewe mpaga kubera gukinisha abakinnyi batasabiwe ibyangombwa ku buryo bwemewe n’amategeko. Aha Abanyarwanda baracyibuka ibyabaye mu gikombe cya Afurika cy’umukino wa Volleyball ubwo Abanya-Brazil barangajwe imbere na Bianca bazaga gutuma u Rwanda rukurwa mu irushanwa rwakiriye.

Ibi bivugwa ahanini ko byakozwe n’abantu bari bafite amakuru ko aba bakinnyi batasabiwe ibyangombwa nk’uko bikwiye. Ikibazo cyo gukora ibintu nk’uko bikwiye cyagiye kigonga amakipe y’igihugu ahibazwa uko byagenda u Rwanda ruje imbere ya Nigeria ifite amakuru yose kuri Ani Elijah.

Ingingo ya karindwi muri sitati igenga abakinnyi muri FIFA ivuga ko kugira ngo uhindurirwe ubwenegihugu ukinire ikindi gihugu ari uko uba ufite umubyeyi umwe ugikomokamo (nk’uko byagenze kuri Rafeal York), kuba warahavukiye cyangwa ababyeyi b’ababyeyi bawe barahavukiye, cyangwa se kuba umaze imyaka itanu ikurikirana uhatuye.

Izi ngingo zose nubwo nta nimwe Ani Elijah yujuje, iyoroshye kuboneka ni ukuvuga ko amaze imyaka itanu aba mu gihugu, aho ubwo byasaba ko Minisiteri yandika ibaruwa ibyemeza inabigaragaza.

Ibi bikaba ubundi bikorwa n’ibihugu byinshi, ariko hakaba harimo kwizirikaho igisasu kuko biramutse bigiye mu manza igihugu cyaterwa mpaga. Aha twakibutsa ko ikipe y’igihugu y’u Rwanda iri mu itsinda rimwe na Nigeria uyu mukinnyi akomokamo, ahibazwa icyaba aramutse abaye ari we ubatsinze igitego cyatuma ku nshuro ya mbere Amavubi ajya mu gikombe cy’Isi...

Ani Elijah arifuzwa n'umutoza w'ikipe y'igihugu Amavubi
Elijah yarangije ntawe umurusha ibitego muri Shampiyona y'icyiciro cya mbere
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza