IGIHE

AS Kigali yatsindiye KMC muri Tanzania iyisezerera muri CAF Confederations Cup

2 23-08-2019 - saa 18:28, Ndayikunda Josué

Ikipe ya AS Kigali ihagarariye u Rwanda mu mikino nyafurika ya CAF Confederations Cup, yatsindiye KMC yo muri Tanzanira ibitego 2-1 i Dar es Salaam ihita inayisezerera.

Ni umukino wo kwishyura mu ijonjora ry’ibanze ry’imikino ya CAF Confederations Cup wabaye kuri uyu wa Gatanu ku kibuga cya Uwanja wa Taifa i Dar es Salaam muri Tanzania.

Umutoza Nshimiyimana Eric, yari yahisemo kubanzamo Bate Shamiru mu izamu , Michel Rusheshangoga, Ishimwe Christian, Songayingabo Shaffy, Bishira Latif, Ntamuhanga Tumaine Tity, Nsabimana Eric Zidane, Kalisa Rachid, Benedata Janvier, Nshimiyimana Ibrahim na Ssentongo Farouk.

Ku munota wa 30, Rashid Kalisa wavuye mu ikipe ya Kiyovu Sports yatsinze igitego cya mbere cya AS Kigali cyayigaruye mu mukino dore ko KMC yari yatangiye yotsa igitutu ikipe y’abanyamujyi.

Igice cya mbere cyarangiye ikipe ya AS Kigali yahagurukanye abafana 11 iri imbere n’igitego 1-0.

Mu gice cya kabiri, KMC yahise ikora impinduka ebyiri kugira ngo irebe ko yabona igitego cyo kwishyura cyari kuyisubiza mu mukino ariko ba myugariro ba AS Kigali bababera ibamba.

Byaje guhumira ku mirari ku munota wa 63 ubwo Nsabimana Eric “Zidane” yatsindaga igitego cya kabiri ku mupira mwiza yahawe na Ntamuhanga Tumaine Tity, ba myugariro ba KCM baramwihorera ashyira umupira mu rushundura bibeshye ko yari yaraririye.

Igitego cya Zidane cyagabanyije igitutu kuri AS Kigali, maze ku munota wa 78 Nova Bayama yinjira mu kibuga asimbuye Benedata Janvier.

Ku munota wa 86, KMC yabonye penaliti itavuzweho rumwe, maze Ndikumana Yusuf abonera KMC igitego cy’impozamarira kitagize nicyo kiyifasha kuko umukino warangiye ari 2-1.

Umukino ubanza wari wabereye i Kigali warangiye amakipe yombi anganya 0-0, AS Kigali ikaba ikomeje ku kinyuranyo cy’ibitego 2-1.

Amahirwe menshi ni uko AS Kigali izacakirana na Proline FC yo muri Uganda dore ko nayo yari yatsinze Masters Security umukino ubanza 3-0.

Umukino ubanza amakipe yombi yari yanganyije ubusa ku busa
Nsabimana Eric Zidane yongeye kubanza mu kibuga anatsinda igitego
Ssentongo nawe yabanje mu kibuga anafasha AS Kigali
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nzungu 2019-08-24 04:44:37

AS kgl yakoze cyane guhesha ishema igihugu cyacu nikomerezaho nomubindi byiciro nayo izagere mumatsinda kuko birashiboka cyane.

2
Seb 2019-08-23 15:49:40

Bakoze kubaha urwanda rwacu

Kwamamaza