Arsene Wenger yasezeye muri Arsenal FC nyuma y’imyaka 22 ayitoza

8 20-04-2018 - saa 11:20, Rabbi Malo Umucunguzi

Umufaransa Arsene Wenger watozaga Arsenal FC yatangaje ko azava kuri uyu mwanya ku musozo w’uyu mwaka wa shampiyona, nyuma y’imyaka 22 yari amaze ari umutoza wayo mukuru.

Wenger wagiye muri iyi kipe avuye mu yitwa Nagoya Grampus yo mu Buyapani mu 1996, yasohoye itangazo asezera ku bafana kuri uyu wa 20 Mata 2018, mbere y’umukino iyi kipe igomba guhuramo na West Ham FC kuri iki Cyumweru.

Yagize ati “Nyuma yo gusuzuma neza na nyuma y’ibiganiro nagiranye n’ikipe, ndumva ari igihe gikwiye kugira ngo nsezere nyuma y’uyu mwaka wa shampiyona.”

Wenger asezeye muri iyi kipe mbere y’umwaka umwe ngo amasezerano yaherukaga gusinya ngo arangire. Asize iyi kipe ku mwanya wa gatandatu ku rutonde rwa Shampiyona y’u Bwongereza ruyobowe na Manchester City yamaze kwegukana igikombe.

Arsenal ntinafite amahirwe ya hafi yo kugera muri enye za mbere zemerewe gukina Champions League kuko irushwa na Tottenham Hotspur F.C ya kane amanota 14 mu gihe hasigaye imikino itanu. Kugira ngo bazagaragare muri iri rushanwa ry’ibihangange i Burayi, bagomba gutwara irushanwa rya Europa League. Gusa nabyo ntibyoroshye, kuko bagomba kubanza kuvana mu nzira Atletico Madrid yo muri Espagne muri ½, ikipe iri ku mwanya wa kabiri muri Shampiyona ya Espagne. Umukino wa mbere uzaba ku wa Kane w’icyumweru gitaha.

Mu gusezera kwe, Wenger yakomeje agira ati “Nshimishijwe no kuba naragize icyubahiro cyo gukorera iyi kipe mu myaka myinshi y’ibyiza bitabarika. Ku bakunzi bose ba Arsenal, mukomeze kuzirikana agaciro k’iyi kipe.”

Arsene Wenger yasezeye muri Arsenal nyuma y’imyaka 22 ayitoza

Umunyamigabane uruta abandi muri Arsenal, Stan Kroenke, we yavuze ko uyu mwanzuro wa Wenger ari “kimwe mu bihe bikomeye tugize mu myaka yose tumaze muri siporo.”

Yakomeje agira ati “Imwe mu mpamvu yatumye dukorana na Arsenal ni ukubera ibyo Arsene yazanye muri iyi kipe, haba mu kibuga ndetse no hanze yacyo. Igihe yari amaze no guhora ahantu heza mu gihe nk’iki yari amaze mu mukino nta muntu uzigera agishyikira.”

Uyu Munyamerika yamushimiye uburyo yahinduye umupira w’amaguru iyi kipe ikina, ndetse n’impinduka yazanye mu mukino w’Abongereza muri rusange.

Wenger yatangiye gutoza Arsenal ku wa 1 Ukwakira 1996, akaba ari we mutoza umaze igihe kinini atoza ikipe imwe ukiri mu mukino, aho ayitoje imikino 823. Gusa byari bigeze aho abafana bamwe batamwumva cyane cyane mu myaka ibiri ishize, bitewe n’uburyo ikipe ye itari ikibasha guhatana n’iza mbere.

Umukino iyi kipe yatsinzwemo ku Cyumweru na Newcastle ibitego 2-1 wahise uba uwa 11 atsinzwe muri uyu mwaka w’imikino, bihita binganya n’umubare w’imikino myinshi uyu mutoza yaba yaratsinzwe mu mwaka wa shampiyona mu mateka ye muri Arsenal, birushaho kuzamura igitutu cy’abafana.

Ubu Arsenal irarushwa amanota 33 na Manchester City iyoboye urutonde yo ifite amanota 87, ari nayo manota irusha West Bromwich Albion iri ku mwanya wa nyuma yo ifite amanota 21.

Ibihe bikomeye bya Wenger

Wenger w’imyaka 68 yafashije iyi kipe gutwara ibikombe bitatu bya shampiyona n’ibikombe birindwi bya FA. Uyu mugabo yanakoze amateka yo gutwara igikombe cya shampiyona ikipe ye idatsinzwe, mu 2003-04, aba umutoza wa mbere ubikoze guhera mu 1888-89.

Nyuma yo kwegukana FA Cup mu 2005, byasabye Arsenal kongera gutegereza imyaka icyenda bingana n’iminsi 3,283 kugira ngo yongere gutwara igikombe, ubwo yegukanaga FA Cup mu 2004 itsinze Hull City, ndetse yongera gutwara icyo gikombe mu 2015.

Arsenal ariko ntiyitwaye neza mu bikombe by’u Burayi, nyuma yo gutsindwa na FC Barcelona ku mukino wa nyuma mu 2006. Yagiye iviramo mu makipe 16 ya nyuma mu myaka irindwi yikurikiranya, ikaba iheruka muri iki gikombe mu 2017 ubwo yasezererwaga na Bayern Munich ku giteranyo cy’ibitego 10-2.

Gusa wasangaga Wenger ashora amafaranga make ku isoko ryo kugura abakinnyi, ugereranyije n’amakipe y’ibigugu baba bahanganye ku isoko.

Nyuma yo gusezera kwa Wenger, ibinyamakuru byinshi byanditse ko amaso yerekejwe kuri Thomas Tuchel uheruka gusezera muri Borussia Dortmund, mu gihe Wenger aheruka gutangaza ko asanga Patrick Vieira wakiniye Arsenal nk’umwe mu bakinnyi badasanzwe mu bo hagati, afite ubushobozi buhagije bwo kumusimbura.

Tuchel niwe uhabwa amahirwe, imbere y’abandi batoza bari kugarukwaho nka Joachim Low utoza Ikipe y’Igihugu y’u Budage na Carlo Ancelotti watoje amakipe arimo Bayern Munich, Real Madrid, AC Milan na Chelsea.

Wenger yatangiye gutoza Arsenal avuye mu yitwa Nagoya Grampus yo mu Buyapani mu 1996
Abafana bamaze igihe binubira Wenger
Abafana bamwe ntibari bacyerekeza muri Stade ya Emirates kubera uburyo ikipe yabo ya Arsenal iri kwitwara
Wenger aha yari kumwe n'Umunyabigwi Tony Alexander Adams wo muri Arsenal, bishimira ibikombe iyi kipe yegukanye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Cyprien 2018-04-21 17:31:12

In winter we trust. We will miss him a lot.

2
obed 2018-04-21 00:57:07

Ikinege ni rayon koko rwose idutera umunezero mu mitima yacu

3
obed 2018-04-21 00:56:28

Ikinege ni rayon koko rwose idutera umunezero mu mitima yacu

4
joe 2018-04-20 15:48:08

eehhh wenger nabwo aragenda jyewe zabyemerako yagiye aruko mbonye undimutoza

5
Remezo B 2018-04-20 11:06:11

Uyu mugabo Arsene Wenger ni uw’agaciro gakomeye cyane mwe mumutuka nta numwe washoboye kugira icyo akora kugirango tumenye iriya kipe, yubakishije Emirates Stadium, yatanze ibikombe, yinjije amafaranga undi wabikoze mu Bwongereza cyangwa mu ikipe 1 natere agatoki hejuru, usibye kuvugavuga gusa kandi nabwo igihe ka kambucha kakugejeje ahaga, sigaho kwibasira Wenger. jyenda uruhuke Musaza kuko icyubahiro turakikugomba twebwe tuzi ibijyanye n’umupira w’amaguru mu gihe wamaze utoza Arsenal, tuzahora tuguha icyubahiro Mutoza mwiza, noneho aba biruhutsa bagende bafate kariya kazi turebe. Murakoze basomyi.

6
kabo 2018-04-20 07:30:42

asize amateka atarimeza nagende aruhuke

7
Manzi 2018-04-20 05:04:44

Ahwiiiiiiiii, il etait vraiment temps qu’il parte

8
kariza 2018-04-20 05:00:18

hereeeee Muzee aragiye umunsi umwe na Nyamitwe Minister aff. Etrangere Burundi n’uwa SOUDAN Predident wa south Africa yatayinama asubira mugihugu cye kubera imyigaragambyo A mateka ya 20 April 2018

Kwamamaza