Abana 150 bitabiriye amarushanwa y’umupira w’amaguru yatewe inkunga na Airtel

1 10-08-2018 - saa 12:38, IGIHE

Sosiyete y’itumanaho ya Airtel Rwanda yateye inkunga irushanwa ry’umupira w’amaguru mu bana bato ryateguwe n’Itorero rya ADEPR, mu mikino y’umupira w’amaguru yari igamije kwimakaza amahoro mu bakiri bato ‘Play For Peace Children’s Football Tournament’, yabaye kuva ku wa Mbere igasozwa ku wa Gatatu w’iki cyumweru.

Iri rushanwa ryatangiye ribera mu kigo Youth for Christ i Kibagababa risorezwa muri Sitade ya Kicukiro ari naho habereye imikino ya nyuma, rihuza abana bagera ku 150 baturutse mu ntara zose z’u Rwanda n’Umujyi wa Kigali, bari biremyemo amakipe 10 y’abahungu n’abakobwa.

Gusoza iyi mikino byitabiriwe n’Umuyobozi ushinzwe ubucuruzi muri Airtel Rwanda yanateye inkunga iri rushanwa, Amit Chawla; Ubuyobozi bukuru bw’itorero rya ADEPR yateguye iri rushanwa binyuze muri Porogaramu yayo, Ambassadors Football, n’Umuyobozi muri Ferwafa ushinzwe tekinike Habimana Hussein.

Chawla yavuze ko bishimiye gukorana na ADEPR, bakifashisha umupira w’amaguru mu kwigisha abakiri bato kwimakaza amahoro.

Yagize ati “Twe nka Airtel twishimiye kwifatanya n’Itorero rya ADEPR kwigisha abana n’urubyiruko agaciro k’amahoro twifashishije umupira w’amaguru, umukino abana bose mu Rwanda bishimira.”

Iri rushanwa ryatangiriye hasi rigenda rizamuka kugera ku rwego rw’igihugu, birangira ikipe y’abahungu ya Muhoza mu karere ka Musanze ariyo itwaye igikombe mu gihe mu bakobwa igikombe cyatwawe n’ikipe ya Kagamba yo mu karere ka Gicumbi.

Mbere yuko iyi mikino ya nyuma iba, yabanje amahugurwa y’iminsi itatu yahawe abatoza b’aya makipe aho yari afite intego yo kwigisha abana kubaka amahoro bakiri bato, mu nsanganyamatsiko igira iti “amahoro nanjye ubwanje, amahoro na bagenzi banjye, amahoro n’Imana.”

Umuhuzabikorwa wa porogamu ya Ambassador Football ari nawe ushinzwe ushinzwe guhuza ADEPR n’abafatanyabikorwa, Pasiteri Paul Seneza, yavuze ko imikino imaze kuba umuyoboro mwiza wo kwigisha iyobokamana, ashimangira ko bahisemo guhuza insanganyamatsiko y’aya marushanwa n’umunsi mpuzamahanga wahariwe amahoro uzizihizwa muri Nzeri.

Yagize ati “Abana bashobora kuba aba mbasaderi beza b’amahoro. Iyo ucengeje imyitwarire myiza n’indangagaciro mu bakiri bato barabikurana. Muri iyi gahunda y’iminsi itatu abana bahashye ubumenyi ku mupira w’amaguru n’ijambo ry’Imana.”

Umuvugizi w’Itorero rya ADEPR, Rev. Ephraim Karuranga, yavuze ko iyi gahunda ubusanzwe yitwa “Ambassadors Football Competitions ” imaze guhindura abana basaga 100 bari barabaswe n’ibiyobyabwenge ndetse n’abari baravuye mu mashuri.

Yagize ati “Mu bihe byashize, urubyiruko rwahuraga n’inzitizi nyinshi rero ntabwo twagombaga gutegereza kubahindura bakuze ahubwo tubategura hakiri kare bagakurana imico myiza.”

Yakomeje agira ati “Iyi gahunda ni bumwe mu buryo bwiza bubafasha kugera ku ntego kuko abana b’urubyiruko barahura bagahugurwa mu ijambo ry’Imana ,bakigisha indangagaciro z’umukristo n’umunyarwanda ubereye u Rwanda kandi mwabonyeko harimo abahanga ku buryo bufatika ahubwo mu myaka mike iri imbere ADEPR izaba ifite ikipe ikomeye byibuze mu kiciro cya kabiri mu mupira w’amaguru hano mu Rwanda.”

Yakomeje avuga ko izi gahunda zifasha abana mu biruhuko bakagira ibyo bahugiramo ntibabeho badafite icyo bakora kuko bishobora no kubashora mu ngeso mbi.

Sosiyete ya Airtel Rwanda kuva yakwihuza na Tigo Rwanda mu ntangira z’uyu mwaka imaze kuba kompanyi ya mbere y’itumanaho ihuza abafatabuguzi abasaga miliyoni 5.1.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
HAKIZIMANA MUSSA 2018-08-11 07:40:52

twebwe se mukarere kagicumbi umurenge warutare mwazatugezeho nange mutuvugire.

Kwamamaza