IGIHE

RCS yungutse abacungagereza bashya 225 (Amafoto)

1 14-06-2019 - saa 22:40, Hakizimana Jean Paul

Urwego rw’Igihugu rushinzwe imfungwa n’abagororwa mu Rwanda (RCS) rwungutse abacungagereza bashya 225 barimo ab’igitsina gore 28 bitezweho kongera umubare no kurushaho gucunga neza gereza zo mu Rwanda.

Aba bacungagereza bari bamaze amezi icyenda mu Ishuri rikuru rya RCS riherereye mu Karere ka Rwamagana i Nsinda, bahugurwa ku bijyanye n’uburenganzira bw’imfungwa n’abagororwa, gukoresha imbunda no guhosha amakimbirane hagamijwe gufata neza abagororwa.

Minisitiri w’Ubutabera akaba n’Intumwa Nkuru ya leta Johnston Busingye yavuze ko uyu muhango werekana ubushake bwa leta y’u Rwanda mu kubaka umwuga wo gucunga gereza bya kinyamwuga.

Ati “Inshingano nkuru twese tugamije ni uguha abacungagereza ubushobozi bwo kugorora imfungwa n’abagororwa kugira ngo bahinduke basubire mu murongo muzima igihugu kigenderaho.”

Yakomeje ashimira abacungagereza bashya ku myitwarire yabaranze mu mezi icyenda bamaze bahugurwa.

Ati “Turabashimira ubwitange n’umurava byabaranze mu gihe mwahugurwaga, ubumenyi bw’ibanze mwahawe bujyanye no gucunga umutekano w’imfungwa n’abagororwa mukwiye kuzabukoresha mu mirimo yanyu ya buri munsi mukorana neza na bagenzi banyu bababanjirije mu kazi, muzirinde icyaricyo cyose cyatuma mwangiza isura nziza ya RCS.”

Busingye yasabye abacungagereza bashya kurangwa n’ubunyangamugayo no kubahiriza amategeko, bakagira ishyaka n’imyitwarire myiza mu kazi kabo ka buri munsi. Yasabye kandi izindi nzego za leta kuzabafasha mu gukora akazi kabo neza mu gihe babagannye.

Umuyobozi Mukuru w’Ishuri rya RCS Nsinda, CP Wakubirwa Eduard, yavuze ko ari ku nshuro ya gatatu iri shuri rishyize hanze abacungwagereza bahahuguriwe, aho batangiranye abanyeshuri 230, batanu baza kuvamo kubera uburwayi undi umwe agatoroka amahugurwa.

Yakomeje avuga ko “Inyigisho bahabwa zishingiye ku mwuga wo gucunga gereza, izijyanye n’uburenganzira bwa muntu, amasomo ajyanye n’ubunyamwuga mu gucunga gereza ndetse bakanigishwa no gukoresha ibikoresho bya gisirikare bijyanye n’ubwirinzi nk’imbunda n’uburyo bashobora guhosha imvururu.”

Kayitesi Deborah w’imyaka 22 yavuze ko zimwe mu ntego afite harimo no kwita ku burenganzira bw’abagororwa.

Ati “Uyu munsi ni umunsi w’ibyishimo kuri njye, ni umunsi numva ko nanjye ngiye mu cyiciro cy’abantu bagomba gushyira mu bikorwa amasomo twaboneye hano, ikintu nkuye hano ni uko ngiye kwita ku burenganzira bw’abagororwa kuko buriya nubwo baba barakoze ibyaha baba bagomba kugororoka ku buryo bafungurwa ari abantu bazima.”

Kayitesi yashishikarije n’abandi bakorwa kugana umwuga w’ubucungagereza ngo kuko ni umwuga nk’iyindi yose.

Nsengiyumva Stephen wahembwe nk’umunyeshuri witwaye neza kurusha abandi avuga ko yakuze akunda kugira ubumuntu bikaba byaratumye yiyemeza kujya mu bacungagereza kugira ngo ajye afasha imfungwa n’abagororwa kugarura ubumuntu.

Ati “Icyambere ni ukugenda tukigira kubo dusanze, icya kabiri tugakurikiza ibyo twigiye aha, icya gatatu ni uguharanira uburenganzira bw’abagororwa ndetse no gukunda umurimo hamwe n’igihugu.”

Komiseri Mukuru wa RCS George Rwigamba yavuze ko nubwo babonye abacungagereza 225 basanga abandi 1600, umubare w’abakenewe ukiri muto cyane akaba ari nayo mpamvu n’umwaka utaha biteguye guhugura n’abandi.

Ati “Aba ngaba ni imbaraga twungutse bagiye guhita batangira akazi ariko ntabwo turagera ku mubare twifuza, umwaka utaha tuzakira n’abandi bazaza guhabwa amasomo kugira ngo badufashe kuzuza inshingano zacu.”

RCS ivuga ko bitewe n’umubare mwinshi ukenewe, hashakwa abandi benshi bayifasha mu kugorora imfungwa n’abagororwa bafungiye muri gereza cumi n’eshatu ziri mu gihugu hose.

Abacungagereza bakoze akarasisi muri iki gikorwa
Abacungagereza berekanye ko banatojwe gukoresha amaboko bacunga umutekano w'imfungwa n'abagororwa
Minisitiri Busingye yasabye abacungagereza bashya kwitwara neza bagahesha ishema RCS
Ubwo Minisitiri Busingye yahembaga umucungagereza Kayitesi Deborah nk'umwe mu bitwaye neza
Umuyobozi Mukuru w'Ishuri rya RCS Nsinda CP Wakubirwa Eduard, ageza ijambo ku bitabiriye isozwa ry'aya masomo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Musinga 2019-06-14 22:22:34

Kbs bafite akazi ko gufatanya nabagenzi nabo kugororera igihugu

Kwamamaza