Frank Ntilikina, Umunyarwanda ukinira New York Knicks, ntacana uwaka n’icyamamare LeBron James nyuma y’uko amuvuzeho ko atari we wari ukwiye kugurwa n’iyi kipe yo mu Mujyi wa New York.

Mu rukerera rwo kuri uyu wa Kabiri (hari mu ijoro ryo ku wa Mbere mu Mujyi wa New York), mu mukino wahuje Knicks na Cleveland Cavaliers ukutumvikana kwabo kwafashe indi ntera, habura amasegonda 40 ngo agace ka mbere karangire, Ntilikina w’imyaka 19 n’ibiro 86 aho yagonganye na Lebron w’imyaka 32 n’ibiro 113.

Bijya gutangira, LeBron James yatsindiye Cleveland Cavaliers (Cavs) amanota abiri ku mupira yari ahawe na Dwayne Wade. Icyo gihe, Cavs yahise igira amanota 23 kuri 22 ya Knicks.

Frank Ntilikina uri gukina umwaka we wa mbere muri NBA, yahise atoragura umupira, ariko uko yunamaga hasi agakubita LeBron James inkokora ahagana mu nda.

Uyu musore ufatwa nk’umwe mu bakinnyi beza b’ibihe byose isi yagize muri Basketball, ako kanya nta kintu yigeze akora kuri Ntilikina ahubwo yazunguje intugu nko kumwereka ko ari umusore kumurusha undi akomeza kumusunika biza kugeza aho abakinnyi bandi babyinjiramo.

Enes Kanter wa Knicks yatangiye guterana amagambo na LeBron James, abasifuzi n’abandi bakinnyi bagenzi babo baritambika bashaka kubatandukanya dore ko bari batangiye gushondanya.

Intandaro y’uyu mwuka mubi yabaye amagambo yavuzwe na LeBron James ubwo yibasiraga umwe mu bari abayobozi ba Cavs, Phil Jackson, weguye akajya muri Knicks.

Ntilikina yasunitse LeBron James ubugira gatatu

James yavuze ko Jackson yari akwiye gutoranya umusore witwa Dennis Smith usigaye ukina muri Dallas Mavericks aho kuba Frank Ntilikina kuko ngo ariwe wari kuzuzanya cyane na Kristaps Porzingis, umwe mu nkingi za mwamba za Knicks.

Ibi abakinnyi ba Knicks babifashe nko gupfobya Ntilikina aho Enes Kanter wari ugiye kurwanya na LeBron yavuze ko atari kwemera umuntu n’umwe upfobya Knicks kuko ayifata nk’umuryango we.

Nyuma y’umukino, Kanter yavuze ko bagenzi be bakunda Ntilikina biza no gushimangirwa na Porzingis wagize ati “icyo navuga ni uko dukunda Frank, turamwishimiye, ari gukora akazi keza, ari gukina neza kandi ari gukora ibyo agomba gukora.”

Kanter yaje kandi kwibasira LeBron James, aho yabwiye abanyamakuru ko atitaye k’ ‘Umwami, umwamikazi cyangwa igikomangomakazi’ ngo kuko nta n’umwe wamusuzugura.

LeBron James abajijwe kuri aya magambo ya Kanter, yasubije abanyamakuru ko ari umwami, umugore we akaba umwamikazi naho umukobwa we akaba igikomangomakazi.

Uyu mukino warangiye Cleveland itsinze n’amanota 104 kuri 101, Ntilikina aza kuvuga ko atigeze aterwa ubwoba na LeBron. Ati « N’iyo aza kuba ari undi mukinnyi niko nari kubigenza. Yari ari mu nzira ndamusunika ngo mfate umupira neza […] Ndabizi byo aranduta, nanjye ngiye kurya cyane kurushaho. »

CBS ivuga ko nubwo abakinnyi ba Knicks bashakaga kwihorera kuri LeBron bavuga ko yasuzuguye Ntilikina ; we asanga nta makimbirane akomeye azavuka hagati yabo, uretse umujinya watewe n’umukino ushyushye.

Ntilikina yavukiye ahitwa Ixelles mu Bubiligi mu 1998 ku babyeyi b’Abanyarwanda, afite imyaka 15 yatangiye gukinira ikipe ya Strasbourg.

Muri Kamena 2017 yinjiye muri New York Knicks imwe mu makipe akomeye muri USA. LeBron James we ni umwe mu bakinnyi ba Basketball bakomeye ku Isi umaze imyaka 15 akina uyu mukino aho yatwaye shampiyona eshatu, aba MVP inshuro enye.

Enes Kanter yateranye amagambo na LeBron James abantu baritambika


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved