IGIHE

Imwe mu mikino yo kwitegura NBA ishobora kubera muri Afurika

0 24-01-2023 - saa 15:21, Byiringiro Osée Elvis

Perezida wa Basketball Africa League (BAL), Amadou Gallo Fall, yatangaje ko bari mu biganiro na NBA, bigamije kuzana imikino yo kwitegura iyi Shampiyona muri Afurika ku nshuro ya mbere mu mateka.

Amadou Gallo Fall yabitangarije ikinyamakuru ESPN ubwo yari i Paris mu Bufaransa mu mikino ya NBA mu cyumweru gishize, avuga ko byahoze biteganywa.

Ati “Ibi byahoze biteganywa. Iriya mikino yabereye muri Afurika mu bihe byashize, imifanire yari ku rwego rushimishije. Ndabizi rero ko bizaba ikagaruka ndetse turi kubiteganya rwose.”

Visi Perezida wa BAL, John Manyo-Plange, yatangaje ko bazazana amakipe abiri asanzwe akina NBA akaza kwitegurira Shampiyona muri Afurika.

Ati “Turi guteganya kuzazana muri Afurika amakipe abiri asanzwe akina NBA. Cyane rwose, bifite aho bizaba bihuriye na BAL.”

U Rwanda ruri mu bihugu bishobora kwakira iyi mikino

Nubwo hataremezwa igihe cyangwa aho iyi mikino izabera, amakuru avuga ko iyi mikino ishobora kuzaba ari itegura Shampiyona ya NBA ya 2024, ndetse ikazabera mu bihugu byibuze byakiriye BAL.

Aha ni ho benshi batangiye gutekereza ko iyi mikino ishobora kuzabera mu Rwanda cyane ko rumaze kwakira imikino ya nyuma ya BAL inshuro ebyiri zikurikiranya, ndetse n’inshuro ya gatatu iteganyijwe tariki 21-27 Gicurasi 2023 muri BK Arena.

Ukurikije ko ibihugu byakiriye BAL ari byo bihabwa amahirwe menshi yo kwakira n’iyi mikino, Misiri na Sénégal na byo biri mu bitarenzwa ingohe.

NBA isanzwe ifite ibyicaro byayo bine muri Afurika biri i Cairo mu Misiri, Johannesburg muri Afurika y’Epfo, i Lagos muri Nigeria na Dakar muri Sénégal.

Imikino ifite aho ihuriye na NBA yaherukaga kubera muri Afurika mu 2015, 2017 na 2018 mu mikino y’ubusabane bw’ikipe igizwe n’abakinnyi bakomoka muri Afurika bahanganye n’abasigaye bose.

Perezida wa BAL, Amadou Gallo Fall, yatangaje ko bari mu biganiro na NBA bigamije kuzana imikino yo kwitegura Shampiyona muri Afurika ku nshuro ya mbere mu mateka
Amwe mu makipe yo muri NBA ashobora kwitegura Shampiyona muri Afurika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza