IGIHE

FERWABA yavuze kuri Mukama wari utegerejwe mu Ikipe y’Igihugu agahamagarwa na Canada

0 30-11-2021 - saa 11:26, Eric Tony Ukurikiyimfura

Perezida w’Ishyirahamwe Nyarwanda ry’umukino wa Basketball, Mugwiza Désiré, yavuze ko nubwo Mukama Jean-Victor yahamagawe mu Ikipe y’Iguhugu ya Canada, yemeye gukinira u Rwanda.

Mukama Jean Victor w’imyaka 27, kuri ubu ukinira Melilla Baloncesto yo muri Espagne, aherutse guhamagarwa mu Ikipe y’Igihugu ya Canada.

Uyu mukinnyi ni Umunyarwanda wavukiye muri Canada, mu gace ka Hamilton (Ontario). Mu Ukuboza 2019, yakiniye Patriots BBC mu ijonjora rya kabiri rya Basketball Africa League ryabereye i Kigali.

Perezida wa FERWABA, Mugwiza Désiré, yabwiye abanyamakuru ko nubwo uyu mukinnyi yahamagawe na Canada, amahitamo ari aye kuko yifuzaga gukinira u Rwanda ndetse yari ku rutonde rw’abazahamagarwa mu Ikipe y’Igihugu.

Ati “Yari ku rutonde rw’abazahamagarwa mu Ikipe y’Igihugu na Canada iramwifuza kuko afite ubwenegihugu bubiri. Turamwifuza ko aza gukinira u Rwanda, na Canada iramwifuza, ubwo ni we uzahitamo. Ni umukinnyi mwiza twifuza twese ”

Yakomeje agira ati “Twagerageje kugira ngo aze gukinira Igihugu ariko hagenda hazamo impamvu zatumye ataza kandi zitamuturutseho. Ntabwo navuga ko yabyanze kubera izindi mpamvu zari zihari. Yari yanatwemereye, ariko ni we ugomba guhitamo. Twe turifuza ko akinira u Rwanda, tumubonye byaba ari amahirwe kuko ni umukinnyi mwiza, ariko tutamubonye nta kibazo kuko dufite ikipe nziza.”

Mukama Jean-Victor ufite uburebure bwa metero 2,3 n’ibilo bigera kuri 90, yari mu bakinnyi batatoranyijwe muri NBA Draft ya 2019 ubwo yari muri Reyerson.

Nyuma yo gukinira Patriots BBC mu 2019, yasinyiye Hamilton Honey Badgers yo muri Canada, ayivamo ajya muri Aris Leeuwarden yo mu Buholandi, aho yakinnye umwaka umwe agahita yerekeza muri Espagne.

Jean-Victor Mukama aheruse guhamagarwa na Canada ngo azayikinire
Mukama wakiniye Patriots BBC mu majonjora ya BAL 2021, yari yemeye gukinira u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza