Espoir BBC yahize kwegukana igikombe cya shampiyona iheruka mu 2015

0 7-11-2018 - saa 21:49, Ngabo Roben

Espoir Basketball Club yahize guhatanira igikombe cya shampiyona y’u Rwanda ya Basketball izatangira muri uku kwezi ikoresheje abakinnyi bayobowe n’Umurundi Sangwe Almer wongerewe amasezerano.

Star Times National Basketball League 2018-19 izatangira tariki 23 Ugushyingo 2018, izahatanirwa n’amakipe y’ibihangange mu Rwanda arimo REG BBC na Patriots BBC yanayegukanye mu myaka itatu ishize.

Umutoza wa Espoir BBC ifite amateka muri Basketball y’u Rwanda Mwiseneza Maxime yemeza ko bongereye amasezerano abakinnyi babo beza banasinyisha abandi batatu bavuye mu bakeba, mu rwego rwo guhanganira iki gikombe baheruka muri 2015.

Ati “Tumaze amezi abiri twitoza. Ikipe mfite yiteguye guhanganira igikombe cya shampiyona bitandukanye n’imyaka ishize. Ubu twabonye umwanya uhagije wo kwitegura no kwitoza kandi abakinnyi banjye, abashya, abasanzwe n’abo twongereye amasezerano bamaze guhuza umukino.”

Uyu mutoza wakomeje avuga ko intego ze uyu mwaka azazigaragariza mu irushanwa ribanziriza shampiyona rizamara icyumweru ‘FERWABA Preseason tournament’ rizatangira kuri uyu wa Gatanu tariki 9-18 Ugushyingo 2018.

Mu bakinnyi bongerewe amasezerano y’imyaka ibiri harimo n’Umurundi Sangwe Almer, umukinnyi washoboye gutsinda amanota menshi (43) mu mukino umwe ubwo ikipe ye yatsindaga UGB muri shampiyona ishize.

Abandi bakinnyi bongerewe amasezerano ni Habineza Shaffy na Kazeneza Emile, naho abakinnyi bashya basinyishijwe ni Habiyaremye Patrick wavuye muri REG BBC, Kamilindi Olivier wavuye muri Patriots BBC na Rukundo Fabrice wakiniraga IPRC South.

Umukino wa mbere w’amarushanwa aba bakinnyi bazakinira Espoir BBC ni uwo bazahanganamo na Patriots BBC kuri uyu wa Gatanu tariki 9 Ugushyingo 2018 saa 20h kuri Petit Stade.

Abakinnyi bose Espoir BBC izakoresha mu mwaka w’imikino 2018-19

1. Sangwe Armel

2. Kazeneza Emile Gallois

3. Kubanatubane Philippe

4. Kamilindi Olivier

5. Rukundo Fabrice

6. Gatsinzi Theoneste

7. Iradukunda Olivier

8. Berirembo Lewis

9. Habineza Shaffi

10. Nsengiyumva Abdul Latif

11. Turatsinze Olivier

12. Habiyaremye Patrick

Sangwe Almer ari mu bakinnyi Espoir BBC izakoresha muri uyu mwaka w'imikino
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza