IGIHE

Abasifuzi na Komiseri w’umukino APR WBBC yatsinzemo The Hoops bahagaritswe

0 11-09-2019 - saa 09:42, Eric Tony Ukurikiyimfura

Ishyirahamwe ry’Umukino wa Basketball mu Rwanda (FERWABA) ryahagaritse abasifuzi batatu na Komiseri w’umukino wa 4 wa Playoffs, APR WBBC yatsinzemo The Hoops amanota 55-54 mu buryo butavugwaho rumwe.

Mu masegonda y’uyu mukino wabaye ku wa Gatanu w’icyumweru gishize, tariki ya 6 Nzeri, The Hoops yarushwaga inota rimwe (54-55), yatsinze amanota abiri yashoboraga gutuma ijya imbere, abasifuzi bavuga ko habayeho ikosa ndetse hari hasigaye isegonda rimwe ngo umukino urangire.

APR WBBC yatsinze uyu mukino ku manota 55-54, bituma inganya na The Hoops imikino 2-2.

Ubuyobozi bwa The Hoops bwandikiye FERWABA buyisaba gusuzuma imyitwarire y’abasifuzi b’uyu mukino ikagira icyo ibikora kuko bibwe mu buryo bugaragarira buri wese.

FERWABA yasubije The Hoops ko yasuzumye amashusho y’umukino igasanga koko iyi kipe yaribwe, ariko iyibwira ko ntacyo ishobora guhindura ku byabaye ku mukino ku buryo umusaruro wavuyemo wahinduka.

Ishyirahamwe ry’umukino wa Basketball mu Rwanda ryafashe icyemezo cyo guhagarika abasifuzi batatu bayoboye uyu mukino: Shema Nshuti Didier, Ikirezi Ngaju Samuel na Ntakirutimana Alype, ivuga ko batemerewe kongera gusifura iyi mikino ya nyuma ya Shampiyona ya Basketball iterwa inkunga na Banki ya Kigali, izatanga ikipe yegukana igikombe.

FERWABA yashinje aba basifuzi ko batatanze raporo igaragaza neza ibisobanuro byumvikana bigaragaza ibyabereye kuri uwo mukino.

Iki, ni na cyo cyagendeweho hahagarikwa Rwagasana Alphonse wari Komiseri w’umukino.

Imikino ya nyuma ya Playoffs muri Basketball irakomeza kuri uyu wa Gatatu hakinwa umukino wa 5, aho mu bagabo REG BBC ibura intsinzi imwe ngo yegukane igikombe, irahura na Patriots mu mukino utangira saa 21:00 muri Petit Stade.

REG BBC yakira umukino, iyoboye n’imikino 3-1 nyuma yo gutsinda itatu iheruka.

Mu bagore, The Hoops na APR WBBC zirisobanura mu mukino wa 5 utangira saa 19:00 nyuma y’uko kuri ubu zinganya imikino 2-2.

The Hoops na APR WBBC ziranganya imikino 2-2 mu gihe uwa 5 ukinwa kuri uyu wa Gatatu muri Petit Stade i Remera
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza