IGIHE

Abangavu b’u Rwanda batangiye nabi mu mikino ya Zone V

0 11-06-2019 - saa 08:47, Eric Tony Ukurikiyimfura

Ikipe y’Igihugu y’u Rwanda y’abangavu batarengeje imyaka 16 yatangiye nabi mu mikino y’akarere ka gatanu igamije gushaka itike y’igikombe cya Afurika ( FIBA Africa U16) kizabera mu Rwanda muri Kanama uyu mwaka, itsindwa n’iya Tanzania amanota 74-63 mu mukino wabimburiye indi kuri uyu wa Mbere.

U Rwanda rwakiriye iyi mikino y’akarere ka gatanu guhera kuri uyu wa Mbere tariki ya 10 kugeza ku wa Gatandatu tariki ya 15 Kamena 2019 mu bangavu no mu cyiciro cy’ingimbi.

Abangavu b’u Rwanda ntacyo baharanira muri iyi mikino kuko izabera mu Rwanda mu mezi abiri ari imbere ariko iyi mikino irabafasha kwitegura ndetse no kwipima ku makipe ya Uganda na Tanzania dore ko imwe muri aya abiri izitabira iyi mikino ya nyuma.

Abangavu ba Tanzania bagaragaje urwego ruri hejuru y’urw’u Rwanda muri uyu mukino, aho batsinze agace ka mbere ku manota 22-13.

Ikipe y’u Rwanda yanyuzagamo igatsinda amanota menshi cyane ku barimo Nyiramugisha Hope na Munezero Lamla ariko na yo byagaragaye ko igifite ikibazo gikomeye mu kugarira, aho Tanzania yasubiranaga imipira yose yatakazaga ubwo yabaga yasatiriye u Rwanda.

U Rwanda rwagabanyije ikinyuranyo cy’amanota rwarushwaga, bajya kuruhuka mu gace kabiri hasigayemo atanu (30-35) nyuma yo gutsinda 17-13 muri aka gace mu gihe Tanzania yongeye gutsinda agace ka gatatu ku manota 18-12, hasubiramo ikinyuranyo cy’amanota 11.

Agace ka nyuma k’umukino karanzwe no guhangana gukomeye ku mpande zombi, ikipe y’u Rwanda izamura amanota, aho yatsinzemo 21 ariko na yo yinjizwa 21 maze umukino urangira hagumyemo ikinyurancyo cya 11 (74-63).

Morrel Catherine wa Tanzania, yatsinze amanota 32 muri uyu mukino mu gihe Nyiramugisha Hope w’u Rwanda yatsinzemo 22.

Kapiteni w’ikipe y’igihugu y’abangavu, Usanase Stacy Charlène yavuze ko batsinzwe uyu mukino bitewe n’ubwoba batewe no kutamenyera imikino nk’iyi mpuzamahanga, yemeza ko hari isomo bibasigiye.

Ati” Tanzania yatugoye kuko ntabwo abenshi muri twe tumenyereye iyi mikino. Twabaye nk’abagize ubwoba dukora amakosa menshi. Biduhaye isomo mu mukino tutaha tuzabikosora tugerageza kwitwara neza.”

Mu gihe iri rushanwa ryitabiriwe n’amakipe atatu mu bangavu, kuri uyu wa Kabiri harakina Uganda na Tanzania mu gihe ikipe y’u Rwanda izasubira mu kibuga ejo ku wa Gatatu ihura na Uganda mu mukino uzatangira saa 17:00.

Uganda na Tanzani zizavamo ikipe imwe izabona itike y’imikino ya nyuma y’igikombe cya Afurika kizabera mu Rwanda guhera tariki 26 Nyakanga kugeza ku ya 4 Kanama 2019, aho amanota u Rwanda ruzagira muri iyi mikino y’akarere ka gatanu atazabarwa.

Mu ngimbi, u Rwanda ruzakina na Uganda kuri uyu wa Gatatu ndetse bakine undi mukino ku wa Gatandatu bahataniye itike yo kujya mu mikino ya nyuma ya FIBA Africa U-16 izabera muri Cap Vert.

Anna Sailepu wa Tanzania atsinda amanota ku ikosa yari amaze gukorerwaho
Nelious Edson ni umwe mu bakinnyi ba Tanzania bagoye u Rwanda
Nyiramugisha Hope yatsinze amanota menshi ku ruhande rw'u Rwanda
U Rwanda rwatakazaga imipira myinshi
Ikipe y'u Rwanda kandi iracyagorwa no gutsinda amanota menshi mu buryo ibonye
Ikipe y'ingimbi yarebye uyu mukino mu gihe izatangira gukina kuri uyu wa Gatatu
Umutoza w’Ikipe y’Igihugu nkuru y'abagabo y’umukino wa Basketball, Vladimir Bosnjak yarebye uyu mukino
Abasifuzi b'umukino bafata akaruhuko
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza