IGIHE

Ndayisaba Fabrice yavuze inkomoko y’umwihariko wo kwibuka abana bishwe muri Jenoside yakorewe Abatutsi

0 7-04-2021 - saa 20:25, Eric Tony Ukurikiyimfura

Ndayisaba Fabrice uyobora Umuryango utegamiye kuri Leta wa Ndayisaba Fabrice Foundation (NFF) yavuze ko impamvu yagize igitekerezo cyo kujya hibukwa abana n’ibibondo bishwe muri Jenoside yakorewe Abatutsi mu 1994 ari ukugira ngo n’urubyiruko rukure ruzi amateka mabi yaranze u Rwanda kandi ruharanire ko ibyabaye bitazasubira.

Mu gihe u Rwanda rwibuka ku nshuro ya 27 Abatutsi basaga miliyoni imwe bishwe muri Jenoside mu 1994, Umuryango Ndayisaba Fabrice Foundation (NFF) na wo wateguye ibikorwa byo kwibuka abana n’ibibondo bishwe icyo gihe.

Uyu muryango umaze imyaka 13 ushinzwe na Ndayisaba Fabrice kuri ubu ufite imyaka 26, ariko watangiye ibikorwa byawo guhera mu 2008 nyuma yo gutangizwa ku mugaragaro na Senateri Musabeyezu Narcisse.

Mu kiganiro yagiranye na IGIHE, Ndayisaba yavuze ko nubwo yavutse nyuma ya Jenoside yakorewe Abatutsi, ariko yakuze afite impano yo gukunda no gufasha abana ndetse nyuma akaba yarasanze na bo bagomba kumenya ibyabaye ku gihugu cyabo.

Ati “Kuva nkiri muto, niga mu mashuri abanza, nakuze mfite umutima wo gufasha no gukunda abana cyane, nkanawukomora ku babyeyi banjye barimo papa Gakwaya Jean Pierre, nyuma haje Eto’o [Samuel], ndetse na Senateri Musabeyezu Narcisse kuko ni we watangije uyu muryango.”

Yakomeje agira ati “Nari mfite abana mpuriza hamwe bagakina umupira, nari nabakuye ku muhanda mu rwego rwo kubafasha, nyuma ngira igitekerezo nibaza nti ’ese kuki tutajya twibuka byihariye abana bishwe muri Jenoside yakorewe Abatutsi mu 1994?.”

Ndayisaba yavuze ko icyo gitekerezo yakigejeje ku babyeyi be bacyakira neza ndetse abibwira n’ababyeyi b’abana yitagaho agamije kugira ngo bazakurane umuco wo kwibuka kandi bazi amateka mabi igihugu cyanyuzemo ku buryo bazaharanira ko atazongera kuba.

Ati “Nababwiye ko nifuza ko twatangiza igikorwa cyo kwibuka abana n’impinja bishwe muri Jenoside, aba bana bajye bibuka bagenzi babo mu rwego rwo kubasubiza agaciro kabo no kugira ngo na bo bamenye ibyabaye kuri bagenzi babo.”

“Ikindi nari ngamije ni ukugira ngo nubake umuco wo kwibuka mu bakiri batoya kugira ngo igikorwa cyo kwibuka kizakomeze kigire agaciro ibihe byose. Abana babaye batarabimenya ejo hazaza haba hari ikibazo kandi nyamara ni bo bashobora no gufasha ababyeyi babo cyangwa bakuru babo kureka ingengabitekerezo ya Jenoside kuko igiti kigororwa kikiri gitoya.”

Abajijwe impamvu yahuje ibikorwa byo kwibuka abana n’ibibondo bishwe muri Jenoside n’imikino, Ndayisaba Fabrice, yavuze ko ari ukugira ngo abana b’ubu bibuke bazirikana ubuzima bagenzi babo bari babayemo.

Ati “Nasanze kujya ku rwibutso rwa Jenoside bakiga amateka bagataha bidahagije, nsanga hakwiye no kuba imikino cyane iyo abana bagenzi babo bishwe muri Jenoside bakundaga. Kubera ko abana bose badakunda umupira w’amaguru, nabinyujije mu bigo by’amashuri, ubu dukorana n’amashuri menshi yo mu Karere ka Kicukiro.”

“Ubona byaratanze umusaruro, mbere y’uko abana bajya gukina mu karuhuko ku ishuri barabanza bakibuka bagenzi babo, bavayo bagahabwa ubutumwa. Bimara icyumweru cyose.”

Yakomeje agira ati “Ni igikorwa kimaze gutera imbere kuko abayobozi b’Akarere ka Kicukiro, abayobora amashuri, abayobozi ba IBUKA, bose baradushyigikiye ndetse yaba ababyeyi n’abana barabyishimira ku buryo bumva byagera mu gihugu hose nubwo bitarashoboka, ariko Minisiteri y’Uburezi na REB baradushyigikiye.”

Ibikorwa byo kwibuka abana n’ibibondo bishwe muri Jenoside bikunze kwitabirwa n’abarimo ibyamamare mu Rwanda nk’abakinnyi b’umupira w’amaguru, abahanzi cyangwa ba nyampinga.

Ndayisaba yavuze ko impamvu yo gukorana na bo ari ukugira ngo n’abana babone ko bafite abandi bantu babari hafi ndetse kuba babafatiraho urugero bitume barushaho kumva ibyo barimo.

Ati “Abana bose barangwa no gukunda abantu bazwi [b’ibyamamare], impamvu natekereje gukorana na bo ni ukugira ngo ubutumwa baha abagize umuryango wacu n’abandi bana hirya no hino mu gihugu, buhite bwumvikana kandi bugere kure.”

Muri ibi bihe byo Kwibuka ku nshuro ya 27 Abatutsi bishwe muri Jenoside mu 1994, Umuryango Ndayisaba Fabrice Foundation uzibuka abana n’ibibondo ku wa Gatanu tariki ya 9 Mata 2021 hifashishwa ikoranabuhanga nk’uko byatangajwe n’umuyobozi wayo.

Ati “Ni ibikorwa bizaba hifashishijwe imbuga nkoranyambaga zose za Foundation ifatanyije na Ecole Maternelle Foundation Ndayisaba Fabrice. Twifuje ko binyuzwa muri iryo shuri kuko ni ryo rirera abana umunsi ku munsi, abana bakurane umuco wo kwibuka. Hari ubutumwa bwinshi twapanze, tuzanabihuza n’ibiganiro bizajya bica mu bitangazamakuru bitandukanye.”

“Nk’urubyiruko tugomba gukunda igihugu cyacu kandi tukagikorera. Gahunda yanjye ni ugukomeza gufasha abana bari mu kaga no gukomeza kuba hafi abagizweho ingaruka na jenoside.”

Ndayisaba wakuze afite indoto zo gushinga ikigo gifasha abantu bababaye, ishuri, ibitaro n’ibikorwa remezo by’imikino n’imyidagaduro, yavukiye mu Karere ka Ruhango mu 1995.

Guhura n’umunyabigwi w’Umunya-Cameroun, Samuel Eto’o Fils mu 2006 no mu 2009, ni byo byamubereye urufunguzo rwo gushinga Ndayisaba Fabrice Foundation ufite icyicaro muri RP-IPRC Kigali. Intego zawo ni uguhuza abana, kubafasha kugira uburere no gukunda igihugu binyuze mu mikino n’imyidagaduro.

Buri mwaka, umuryango Foundation Ndayisaba Fabrice utegura ibikorwa byo kwibuka abana n'ibibondo bishwe muri Jenoside yakorewe Abatutsi mu 1994
Ndayisaba Fabrice yavuze ko kwibuka abana n'ibibondo bishwe muri Jenoside bizafasha kurera abana babereye u Rwanda kandi bagakurana umutima wo kurinda igihugu ngo kidasubira mu mateka mabi cyanyuzemo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza