Uwizeyimana yatakaje icyizere cyo kwegukana ‘Tour du Sénégal’

0 27-04-2018 - saa 18:03, Manzi Rema Jules

Uwizeyimana Bonaventure wari uwa kabiri ku rutonde rusange arushwa amasegonda 0:14 n’uwa mbere, kuri uyu wa Gatanu ntiyahiriwe n’agace k’ibirometero 114.9 bakinnye kuko yatakaje umwanya we akanasigwa cyane.

Nk’uko Abanyarwanda bamaze kumenyera uburyohe bw’umukino w’amagare haba mu gihugu imbere no hanze yacyo, no muri Tour du Sénégal icyizere cyo guhigika amahanga cyari cyagarutse kuri uyu wa Kane nyuma y’aho Uwizeyimana afatiye umwanya wa kabiri arushwa amasegonda 0:14 n’umunya-Aligeria Reguigui Youcef.

Byari byitezwe ko uyu musore usanzwe akinira Benediction Club arwana ku bihe bye agashaka uko akomeza gusatira umwanya wa mbere ariko ntibyamuhiriye kuko mu gace kavaga Ndangane kajya Ngueniene ku ntera y’ibirometero 114.9, yasoje ari uwa 27 akoresheje 02h 50’34’’ asigwa n’uwa mbere iminota 04’49’’.

Byatumye no ku rutonde rusange asubira inyuma imyanya itatu aba uwa gatanu asigwa iminota 4:39 na Craven Dan wafashe umwanya wa mbere avuye kuwa kenda kubera uburyo yitwaye neza mu gace k’uyu munsi.

Umunya-Algeria Reguigui Youcef wari uwa mbere ku rutonde rusange kuva irushanwa ryatangira nawe yasubiye inyuma ajya kuwa kane.

Mu Banyarwanda, Munyaneza Didier yasubiye inyuma imyanya itatu aba uwa 11 asigwa iminota 5:06; Ukiniwabo Jean Paul Rene aba uwa 29; Hadi Janvier ni uwa 30, Paul Uwiduhaye uwa 37 naho Byukusenge Patrick akaba ari uwa 40.

Abasiganwa 63 basigaye mu irushanwa, barabura uduce tubiri kugira ngo basoze harimo ak’ibilometero 140 bazazenguruka Umujyi wa Ngaparou ku wa Gatandatu mbere yo gusoza ku Cyumweru bazenguruka ibilometero 102.4 mu Murwa Mukuru Dakar.

Uwizeyimana Bonaventure (Ibumoso) yitabiriye ‘Tour du Sénégal’
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza