IGIHE

Uwizeye Jean Claude yegukanye agace ka mbere ka Tour de Guyane 2019

1 18-08-2019 - saa 11:42, Eric Tony Ukurikiyimfura

Umunyarwanda Uwizeye Jean Claude ukinira Sables Vendée yo mu Bufaransa yegukanye agace ka mbere k’irushanwa ry’amagare rya Tour de Guyane 2019 riri kuba ku nshuro yaryo ya 30.

Iri siganwa ryatangiye kuri uyu wa Gatandatu, aho abakinnyi bahagurutse mu Mujyi wa Cayenne wo mu kirwa cya Guyane mu Bufaransa, berekeza i Tonate ku ntera y’ibilometero 149.

Uwizeye Jean Claude wacitse abandi hasigaye ibilometero bitatu gusa, ni we wageze mu gace ka Macouria ari imbere nyuma yo gusiga itsinda ry’abakinnyi bari bamukurikiye amasegonda 28.

Uwa kabiri yabaye umwongereza Hermann Keller ukinira Vélo Schils-Interbike RT mu gihe uwa gatatu yabaye James Grinville ukinira Vélo Club Guyanais.

Uwizeye w’imyaka 25, arakina kuri iki Cyumweru yambaye umwambaro w’umuhondo ubwo abakinnyi baraba basiganwa n’ibihe.

Mugenzi we bakinana, Maxime Limousin wabaye uwa gatanu, ni na we mukinnyi ukiri muto witwaye neza muri aka gace ka mbere k’irushanwa.

Iri rushanwa riri kuba ku nshuro ya 30, ryitabiriwe n’amakipe 18, aho rizasozwa ku Cyumweru tariki ya 25 Kanama, hakozwe intera y’ibilometero 1275.

Uwizeye Jean Claude (ibumoso) yegukanye agace ka mbere ka Tour de Guyane 2019
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
utezeneza 2019-08-18 07:43:27

komerezaho muhungu wacu, Imana ikomeze igufashe rwose.

Kwamamaza