Mu gihe abakinnyi b’Abanyarwanda bari batangiye Tour du Rwanda 2017 bitwara neza, kuri uyu wa Kabiri biyemereye ko bagize ubwumvikane buke mu muhanda biha icyuho abanyamahanga babambura umwenda w’umuhondo wari ufitwe na Areruya Joseph.

Intwaro ikomeye yafashije u Rwanda kuva mu gushimirwa gutegura Tour du Rwanda neza ariko uko umwaka uje undi ugataha ikegukanwa n’abanyamahanga, ni ugushyira hamwe ni ishyaka ryarangaga abakinnyi bakuru barimo Ruhumuriza Abraham, Nathan Byukusenge, Hadi Janvier bahurizaga hamwe abana bakizamuka nka Ndayisenga Valens, Nsengimana Jean Bosco, Byukusenge Patrick…bagatahiriza umugozi umwe.

Ubwo bufatanye bwatanze umusaruro, kuva mu 2014 nta kindi gihugu cyongeye gutsinda iri siganwa; bwa mbere Ndayisenga aritwara afashijwe cyane na Nsengimana, mu 2015 Nsengimana aryegukana afashijwe bikomeye na Areruya naho mu 2016 ryongera kwegukanwa na Ndayisenga afashijwe n’abakinnyi b’Abanyarwanda muri rusange nubwo we yakiniraga Dimension Data yo muri Afurika y’Epfo.

Uyu mwaka abakinnnyi bakomeye by’umwihariko Ndayisenga Valens ukinira Tirol Cycling Team yo muri Autriche, Areruya Joseph wa Dimension Data yo muri Afurika y’Epfo ndetse na Nsengimana Jean Bosco wa Team Rwanda, bagiye bagaragaza mu mihigo ya buri umwe ko agomba gutsinda iri siganwa ari inzozi zigomba kuba impamo.

Ibi byagaragaye mu gace ‘etape’ ya kabiri yakinnwe kuri uyu wa Kabiri aho abasiganwa 70 bahagurutse i Nyanza basoreza i Rubavu mu gace karekare ka Tour du Rwanda 2017 kareshya na kirometero 180, karimo udusozi, ibitambika n’ahamanuka henshi.

Ni agace karanzwe no kugerageza gucomoka mu bandi kenshi abakinnyi babigerageje bagenzi babo bakabagarura ariko bajya kwinjira mu Mujyi wa Muhanga De Bod wa Dimension Data, Nduwayo Eric na Ruberwa Jean ba Benediction na Hakiruwizeye Samuel wa Les Amis babikoze baragenda.

Pellaud Simon Team Illuminate wegukanye agace ka Nyanza - Rubavu

Umunya-Algeria, Mansouri Abderrahmane, nawe yaje kuvamo ajyana na Uwingeneye Jimmy wa Les Amis Sportif na Greene Edward wa Lowestrates; Hakiruwizeye wigaragaje kuri Etape ya mbere akanegukana umwenda w’umukinnyi uhatana kurusha abandi n’uw’umuterera imisozi uhembwa na cogebanque, yongera arabakurikira.

Bamaze kugenda ibilometero 40, Mansouri yari imbere asiga abamukurikiye amasegonda 30 ariko nabo basiga igikundi ‘peloton’ umunota 1:10”. Ibihe byagiye bihinduka, abakinnyi bamwe bakuraho, bajya kuzamuka mu Myiha, Greene, Uwingeneye, Ruberwa n’Umunya-Ethiopia, Ebrahim bari imbere.

Hasigaye ibirometero 60 ngo bagere ku murongo, abakinnyi bose bari bamaze gusigara, imbere hakiri Greene wagendanaga n’Umusuwisi Pellaud Simon wa Team Illuminate bakomeza kujyana ndetse bashyiramo ikinyuranyo cy’umunota 1:03” gusa yagiye ibirometero bitanu Simon yasize mugenzi we ajya imbere.

Abakinnyi b’Abanyarwanda bamaze kubona ko Simon agiye kandi ibirometero bisigaye ngo bagere i Rubavu ari bike, Nsengimana yahise acika igikundi ajya gushaka uri imbere ariko nawe bagenzi be barimo Ndayisenga Valens, Areruya Joseph, Giday wo muri Ethiopia, Munyaneza Didier n’abandi bagera kuri 12 bahita bamuzana bituma imbaraga zimubana nke akuraho.

Areruya nawe yashatse guhita akomerezaho ariko Ndayisenga ntiyamukundira kandi hari hasigaye ibirometero 35 ngo barangize. Uko kudahuza hagati y’aba bakinnyi babatu b’Abanyarwanda bakomeye cyane ndetse bari bafite imyanya itatu ya mbere byahaye amahirwe Umusuwisi, Pellaud, akomeza kugenda imbere ndetse agera i Rubavu ku murongo yabasize umunota 1:30”.

Ubwumvikane mu kurwana ku gutsinda k’Umunyarwanda

Mu kiganiro n’abanyamakuru aba bakinnyi b’Abanyarwanda bivugiye ko hagati yabo habayemo ubwumvikane buke ari nayo ntandaro yo gutakaza umwenda w’umuhondo.

Ndayisenga yagize ati “Icya mbere ntabwo abakinnyi barimo kumvikana neza. Ndatekereza ko ak’Ubunyarwanda kari gushaka kuburamo. Njye mfite abakinnyi bake, ikipe yanjye ntikomeye birasa n’aho ndi gukina njyenyine. Areruya ntabwo ari umukinnyi mwiza ahantu hazamuka biramugora cyane.”

Yakomeje agira ati “Isiganwa ryari rikomeye cyane, hagiye habamo gushaka gucika kenshi, abakinnyi b’Abanyarwanda barimo Jean Bosco (Nsengimana) bagiye bakora amakosa menshi biri mu byatumye Areruya ananirwa. Twagombaga gukora tugagumana imyanya itatu ya mbere twari dufite.”

Nsengimana we yagize ati “Habayeho ubufatanye buke, dusa n’aho ducungana niko nabivuga. Nagerageje kugenda kuko nari mfite umwanya wa kabiri Abanyarwanda bo mu Ikipe y’Igihugu bagerageza uko bashoboye, twari dufite umuntu wagombaga kudufasha, Valens ariko aho kudufasha nawe yatwatatse bituma njye nk’umuntu wari wakoresheje imbaraga nyinshi mvamo.”

Areruya we yavuze ko kuba atakaje umwenda w’umuhondo bitamuciye intege ahubwo agiye gukora cyane kugira ngo arebe ko yawisubiza afatanyije na bagenzi be bo muri Dimension Data.

Yagize ati “Kuba dutakaje umwanya wa mbere ntibivuze ko twakinnye nabi, kuko n’abandi baba bakeneye gutsinda. By’umwihariko uyu munsi wari umuhanda ugoye kuko byari ibilometero byinshi kandi habayeho kwataka gukomeye.”

Uyu mukinnyi ukomoka i Rwamagana kimwe na Ndayisenga, abajijwe niba kuba uyu mugenzi we ariwe wamugaruye ubwo yari yacitse ashaka gutsinda byaba bigaragaza guhangana hagati yabo, yavuze ko guhangana atabifata nk’ikibazo kuko bakina mu makipe atandukanye, bityo bikaba bishoboka ko ariyo mabwiriza yahawe n’ikipe ye.

Kugeza ubu Areruya yatakaje umwanya wa mbere ufatwa na Pellaud wari uwa 17 ndetse amushyiramo ikinyuranyo cy’umunota umwe bivuze ko asabwa gukoresha imbaraga nyinshi mu gace ka gatatu kuri uyu wa Gatatu kazava i Rubavu kagasoreza i Musanze kugira ngo abashe gukuramo icyo kinyuranyo.

Abakinnyi 10 ba mbere ku rutonde rusange n’ibihe bamaze gukoresha

1. Pellaud Simon Team Illuminate 7:50:22

2. Areruya Joseph Dimension Data For Qhubeka (asigwa 1:00)

3. Ndayisenga Valens Tirol Cycling Team (asigwa 1:17)

4. Kangangi Suleiman Bike Aid (asigwa 1:21)

5. Byukusenge Patrick Rwanda (asigwa 1:25)

6. Okubamariam Tesfom Eritrea (asigwa 1:29)

7. Munyaneza Didier Rwanda (asigwa 1:29)

8. Jeannes Matthieu Team Haute Savoie - Auvergne Rhône Alpes (asigwa 1:30)

9. Eyob Metkel Dimension Data For Qhubeka (asigwa 1:38)

10. Nsengimana Jean Bosco Rwanda (asigwa 2:15)

Nsengimana Jean Bosco ni uwa kabiri ku rutonde rusange kugeza ubu ariko yababajwe no kubona bagenzi be bamugarura bakamubuza gutsinda
Umutoza w'Ikipe y'Igihugu, Sterling Magnell , n'abasore be biteguye iri siganwa
Areruya Joseph aganira n'umutoza we bareba uko yakwisubiza umwambaro w'umuhondo

Uko abakinnyi bakurikirana ku rutonde rusange nyuma y’agace ka kabiri:

Andi mafoto ya Pellaud Simon ahembwa

Areruya yahembwe nk'Umunyafurika mwiza
Pellaud Simon Team Illuminate wegukanye agace ka Nyanza - Rubavu
Areruya ni nawe Munyarwanda uhagaze neza


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved