Umusore ukomoka mu Busuwisi, Pellaud Simon, yegukanye agace ka Nyanza-Rubavu ka Tour du Rwanda, aho abasiganwa bakoze urugendo rwa kilometero 180.6 ari narwo rurerure muri iri siganwa.

Pellaud Simon yegukanye aka gace akoresheje amasaha ane, iminota 32 n’amasegonda 30. Yagendaga ku muvuduko wa kilometero 39.765 ku isaha. Yaje akurikiwe na Jeannes Matthieu waTeam Haute Savoie umunota n’amasegonda 30 mu gihe umwana muto Munyaneza Didier “Mbappe” yasoje ku mwanya wa gatatu ari nawe uza imbere mu Banyarwanda.

Uyu musore w’imyaka 25 y’amavuko akinira ikipe ya Team Illuminate yo muri Leta Zunze Ubumwe za Amerika. Mu 2013, yabaye uwa mbere muri Shampiyona yo mu Busuwisi mu batarengeje imyaka 23, ndetse mu 2014 na 2016 ahagararira igihugu cye mu marushanwa akomeye yo ku isi.

Pellaud Simon usa n’uwatunguranye, yegukanye agace ka Nyanza-Rubavu ahanini kubera ubunararibonye asanzwe afite mu gusiganwa ahamanuka ari na ho yasigiye Ndayisenga Valens, Areruya Joseph na Nsengimana Jea Bosco habura ibirometero 25 ngo binjire muri Rubavu aho isiganwa ryasorejwe.

Kuri uyu munsi, abakinnyi batangiye isiganwa bamaze kugenda ibirometero 24, Hakiruwizeye Samuel wanigaragaje ku munsi wa Mbere w’isiganwa yagerageje kuva mu gikundi akurikiwe na Nsengimana Jean Bosco ariko bahita babagarura.

Umunyafurika y’Epfo, Greene Edward wa Lowestrates.ca yo muri Canada, ni we wamaze umwanya muremure ayoboye isiganwa ndetse yahembwe nk’umukinnyi wazamutse kurusha abandi ndetse n’uwagaragaje guhatana cyane.

Pellaud Simon wahise aza ku isonga ku rutonde rusange, ni we wambitswe umwenda w’umuhondo ndetse azawambara mu gace Gatatu kazava i Rubavu aho abasiganwa bazabanza kuzenguruka inshuro enye mbere yo gukomereza mu Karere ka Musanze ku ntera ya kilometero 97.1.

Uko abakinnyi 10 ba mbere bakurikiranye mu gace ka Nyanza-Rubavu:

1. Pellaud Simon (Team Illuminate) 4:32:30
2. Jeannes Matthieu (Team Haute Savoie): +1:30
3. Munyaneza Didier (Team Rwanda) 11’’
4. Kangangi Suleiman (Bike Aid) ’’
5. Eyob Metkel (Dimension Data for Qhubeka) ’’
6. Okubamariam Tesfom (Eritrea) 1:33
7. Ndayisenga Valens (Tirol Cycling Team) ’’
8. Byukusenge Patrick (Team Rwanda) ’’
9. Nsengimana Jean Bosco (Team Rwanda) 2:33
10. Areruya Joseph (Dimension Data for Qhubeka) 2:46

Uko abakinnyi bakurikirana ku rutonde rusange nyuma y’agace ka kabiri:

Andi mafoto ya Pellaud Simon n’abandi bakinnyi bahembwa

Pellaud Simon Team Illuminate wegukanye agace ka Nyanza - Rubavu
Areruya yahembwe nk'Umunyafurika mwiza
Areruya ni nawe Munyarwanda uhagaze neza
Areruya Joseph aganira n'umutoza we bareba uko yakwisubiza umwambaro w'umuhondo

I Rubavu ubwo abakinnyi basesekaraga mu Mujyi

Kuri uyu wa Kabiri, tariki ya 14 Ugushyingo 2017, abasiganwa bahagurukiye i Nyanza saa mbili n’igice bagende ibirometero 2,3 mbere yo gutangira kubarirwa ibihe bari bukoreshe.

Aka gace gafite amateka yihariye kuko ariko karekare muri Tour du Rwanda 2017 mu duce umunani ubariyemo na "Prologue". Ku Banyarwanda gafite umwihariko kuko abenshi bizihirwa no kubona umurindi basanganizwa iyo bageze mu bice bya Myiha, Sashwara na Shwemu aho abenshi muri bo bakorera imyitozo ndetse ab’inkorokoro barimo Mugisha Samuel, Byukusenge Patrick na Nsengimana Jean Bosco bakaba bavuka mu turere twa Nyabihu na Rubavu aho bamaze kwigarurira imitima y’abahatuye.

Muri utu duce kandi haza ku isonga mu kugaragaza ibyishimo by’abafana bashimangira urukundo bafitiye abakinnyi bahavuka na bo bikabatera ishema n’umurava wo gushaka intsinzi no kuzamura ibendera ry’urwa Gasabo imbere y’amahanga.

Inzira igiye gukoreshwa si nshya ku Banyarwanda kuko baheruka kuyinyura bitegura iri rushanwa riri gukinwa ku nshuro ya cyenda kuva ribaye mpuzamahanga. Ku ya 21 Ukwakira 2017 habaye isiganwa ryahuje abakinnyi 30 b’Abanyarwanda, icyo gihe barimo 27 bahataniraga imyanya mu makipe atatu ahagarariye u Rwanda arimo Benediction Club, Les Amis Sportifs n’Ikipe y’Igihugu.

UKO ISIGANWA RYAGENZE:

Umusore ukomoka mu Busuwisi, Pellaud Simon, niwe wegukanye agace ka Nyanza-Rubavu.Uyu musore akinira Team Illuminate yo muri Leta Zunze Ubumwe za Amerika

- Abafana ni benshi mu mihanda bashyigikira abo basanzwe bazi kuko benshi mu banyarwanda bari gusiganwa basanzwe bakorera imyitozo cyangwa bavuga mu Burengerazuba bw’u Rwanda

12:40: Hasigaye ibilometero 30 ngo isiganwa risozwe. Kugeza ubu, Jean Bosco Nsengimana niwe uyoboye. Akurikiwe na Areruya Joseph na Ndayisenga Valens aho yabasize amasegonda 35.

Inyuma yabo hari abasiganwa umunani barimo Okubamariam, Pellaud, Clavel, Eyob, Kangangi, Byukusenge, Munyaneza na Giday basizwe amasegonda 58.

Abafana ahazwi nko ku Sashwara ntibakanzwe n’imvura

- Hagati aho, ku Mukamira imvura imeze nabi kuko iri kugwa ari nyinshi, abafana bagabanutse ku muhanda usibye bake bitwikiriye imitaka bategereje kubona amagare

12:20: Abasiganwa basigaje ibilometero 40 bagere mu Mujyi wa Rubavu

12:00: Abasiganwa basigaje ibilometero 60 kugira ngo bagere mu Mujyi wa Rubavu aho isiganwa riri busorezwe. Icyo wamenya ni uko Edward MGreene ariwe ukiri imbere kuko yasize igikundi umunota n’amasegonda atandatu.

- Mu yandi makuru: Edward Green uyoboye Peloton kugeza ubu, ubwo yazaga mu Rwanda kwitabira iri siganwa, yinubiye cyane ama-euro 100 yishyujwe na kompanyi ya KLM ku biro 2.5 byarengaga ku byo yari yemerewe.

Nyuma yaje gutangaza ko iyo bitaza kuba Tour du Rwanda ari irindi siganwa, yari guhita yitahira.

11:10: Kugeza ubu, Edward MGreene niwe ukiri imbere, yasize igikundi cyose ho iminota ibiri n’amasegonda umunani.

10:55: Abasiganwa bageze mu Myiha mu Karere ka Ngororero. Edward MGreene niwe ukiri imbere.

10:45: Edward MGreene niwe ukiri ku isonga aho yasize amasegonda 30 babiri bamukurikiye aribo Samuel Hakiruwizeye na Jimmy Uwingineye. Hagati y’iri tsinda n’igikundi, harimo umunota n’amasegonda atanu.

- Mu Mujyi wa Muhanga, abafana bari benshi…

10:10: Abasiganwa basigaje ibilometero bigera ku 130 kugira ngo bagere aho basoreza. Ni ukuvuga ko bamaze kugenda ibirenga 50.

10:05: Kugeza Edward MGreene, Samuel Hakiruwizeye na Jimmy Uwingineye nibo bari imbere y’abandi. Hakiruwizeye Samuel ukunzwe kwitwa Cyihebe, ku munsi w’ejo ubwo abasiganwa bahagurukaga i Kigali berekeje i Huye, yamaze ibilometero byinshi yanikiye igikundi cyari kimukurikiye.

Hakiruwizeye Samuel uzwi nka Cyihebe, yongeye kuza mu bari imbere

- Mugisha Samuel wegukanye aka gace mu isiganwa ritegura Tour du Rwanda, yabwiye IGIHE ko n’uyu munsi afite inzozi zo kuba yakegukana ariko bigoye kubera Abanyarwanda baraba bamushyizeho ijisho cyane ariko icyo ashyize imbere ari ugufasha Areruya Joseph bakinana muri Dimension Data kugumana umwenda w’umuhondo.

Yagize ati "Uyu munsi tugiye gukinira mu mihanda y’iwacu, ndashaka kuza kuba nagerayo ndi imbere gusa murabona ko duhanganye cyane n’Abanyarwanda, ntibyoroshye kubavamo ngo ngende. Ni agace karekare gasaba ubwenge bwinshi."

Ku mpungenge Areruya yari yagaragaje akimara kwambara umwenda w’umuhondo ko atinya ko bagenzi be bakinana bo muri Eritrea na Afurika y’Epfo bashobora kuwumwambura, Mugisha yavuze ko baraye bakoze inama bemeza ko bagomba kumukinira bakanamurinda.

Yagize ati " Nijoro twakoze inama abatoza badusaba gukomeza gukorera hamwe tugafasha Areruya kugumana ibihe afitemo. Naha icyizere Abanyarwanda ko umwuka ari mwiza muri Dimension Data, intego ni ugutsinda."

- Mu Mujyi wa Muhanga, umwe mu yunganira Kigali, abafana b’amagare bakereye kureba uko abanyonzi bahatambuka. Ikirere cyaho kimeze neza, izuba ntirirakara cyane.

09:00: Abasiganwa baracyari muri Nyanza, harabura kilometero ngo binjire mu Karere ka Muhanga. Agace ka Nyanza-Rubavu kari gukinwa n’abasiganwa 70. Abakinnyi batatu barimo Gamper Patrick ukinana na Valens Ndayisenga muri Tirol Cycling Team; Eastern Griffin wa Team Illuminate na Foltan Adrian ukinira Dukla Banska Bystrica bamaze kuva mu isiganwa.

- Areruya Joseph na Mugisha Samuel biteguye gukomeza guhagararira neza ikipe yabo

Areruya Joseph yiteguye gukomeza kugumana umwenda w'umuhondo
Mugisha Samuel agiye kwerekeza mu gace akomokamo naho mugenzi we Areruya arangamiye umwenda w'umuhondo yegukanye ku munsi w'ejo

8:20: Abasiganwa bari guhamagarwa harebwa abagiye gutangira isiganwa ry’uyu munsi. Aba mbere bari kwiyandikisha mbere yo guhaguruka.

8:00: Ikipe y’Igihugu y’u Rwanda n’Umutoza wayo Sterling Magnell bageze ahagiye gutangirira isiganwa i Nyanza mu Murenge wa Busasamana, bakirizwa amashyi y’urufaya.

Nsengimana Jean Bosco ni uwa kabiri ku rutonde rusange kugeza ubu ariko yababajwe no kubona bagenzi be bamugarura bakamubuza gutsinda
Amagare ameze neza mbere y'uko batangira
Umutoza w'Ikipe y'Igihugu, Sterling Magnell , n'abasore be biteguye iri siganwa

-  Abanyenyanza bazindukiye ku mihanda ari benshi ahagiye gutangirira agace ka Kabiri ka Tour du Rwanda 2017.

7:30: Abakinnyi batangiye kugera aho bari buhagurukire kuri Sitasiyo SP. Bamwe bari gusinya mbere y’uko bahaguruka.

Abafana babukereye mu mujyi wa Nyanza bitegereza uko abasiganwa bahaguruka
Aho abasiganwa bagiye guhagurukira
Ikirere cy'i Nyanza, cyaramutse neza

Amafoto: Niyonzima Moise


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved