IGIHE

Intego ya Areruya Joseph mbere yo gukora amateka muri Paris-Roubaix asiganwa n’ibihangange mu magare

0 14-04-2019 - saa 11:35, Eric Tony Ukurikiyimfura

Umunyarwanda Areruya Joseph, witezweho kwandika amateka akaba umunyafurika wa mbere wo munsi y’ubutayu bwa Sahara usiganwe mu irushanwa ry’amagare rya Paris-Roubaix, rimwe mu masiganwa akomeye muri uyu mukino, yatangaje ko intego afite ariyo gusoza iri siganwa.

Iri ni rimwe mu marushanwa akuze kandi akomeye muri uyu mukino, aho ryatangiye mu 1896. Ni irushanwa kandi rigoye cyane bitewe n’imihanda ikoreshwa ku buryo baryita ‘l’enfer du Nord’, ‘la reine des classiques’ cyangwa ‘la dure des dures’.

Areruya w’imyaka 23 ukinira ikipe ya Delko-Marseille-Provence mu Bufaransa, ari mu bagera ku 175 baturutse mu makipe 25 basiganwa kuri iki Cyumweru ahitwa La Compiègne ku ntera y’ibilometero 257, birimo 54.5 bigizwe n’umuhanda w’amabuye, nk’uko byagenze umwaka ushize.

Mu kiganiro yagiranye n’ibitaganzamakuru by’i Burayi, Areruya yavuze ko intego ye ari iyo gusoza iri siganwa, asaba ko abanyafurika bajya bahabwa amahirwe kuko bashoboye.

Ati " Intego yanjye ni ugusoza iri siganwa kandi nkagerageza no kuryitwaramo neza kuko ni umwanya wanjye wo kwigaragaza. Abakinnyi b’umukino w’amagare bakomoka muri Afurika bahawe amahirwe bakajya baza gukina hano i Burayi amarushanwa akomeye, bagera ku rundi rwego.”

Areruya watowe nk’umukinnyi w’umunyafurika w’umwaka ushize, yegukanye Tour du Rwanda 2017 na La Tropicale Amissa Bongo muri Mutarama 2018, isiganwa ryatumye abengukwa n’ikipe ya Delko-Marseille-Province.

Ku nshuro ya 117 hakinwa Paris-Roubaix, Areruya Joseph araza kuba ahanganye n’abarimo Peter Sagan wegukanye isiganwa ry’umwaka ushize, Greg Van Avermaet na John Degenkolb waryegukanye mu 2015.

Areruya Joseph yitezweho kwandika amateka muri Paris-Roubaix kuri iki Cyumweru
Peter Sagan yegukanye isiganwa rya Paris Roubaix mu mwaka ushize
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza