Hagiye gukinwa agace ka kabiri ka Rwanda Cycling Cup kazahuza Uburasirazuba n’Amajyaruguru

0 16-05-2018 - saa 09:59, Manzi Rema Jules

Mu mpera z’iki cyumweru, abakinnyi basiganwa ku magare bo mu makipe icyenda bazaba bahanganye mu gace ka kabiri ka Rwanda Cycling Cup 2018 kazahuza Intara y’u Burasirazuba n’iy’Amajyaruguru kitiriwe ‘Abahinzi’.

Isiganwa rya Rwanda Cycling Cup riterwa inkunga na Skol na Cogebanque, uyu mwaka ryatangiye tariki 24 Werurwe 2018 hakinwa agace ka Kigali-Huye kitiriwe kwibuka Byemayire Lambert wari Perezida wungirije mu Ishyirahamwe ry’Umukino wo gusiganwa ku magare (Ferwacy); uyu yitabye Imana mu 2016.

Ako gace kegukanwe na Munyaneza Didier.

Ku wa Gatandatu, tariki 19 Gicurasi, abakunzi b’uyu mukino by’umwihariko mu Ntara y’u Burasirazuba n’Amajyaruguru ku muhanda uva i Kayonza ukagera i Gicumbi mu Rukomo, bazaryoherwa no kubona intyoza mu kunyonga igare mu bakobwa, ingimbi n’abakuru.

Byitezwe ko ikipe ya Benediction y’i Rubavu iterwa inkunga na Skol yanegukanye agace ka mbere k’iri rushanwa, izatanga akazi katoroshye cyane kuri Les Amis Sports y’i Rwamagana ifashwa na Cogebanque basanzwe bahangana, iyi izaba idafite bamwe mu bakinnyi bayo bakomeye barimo Areruya Joseph, Ndayisenga Valens na Uwizeye Jean Claude bagiye gukina nk’ababigize umwuga mu Bufaransa.

Amakipe azasiganwa arimo Fly Cycling Club, Cycling Club For All, Muhazi Cycling Generation Cine Elmay, Les Amis Sportifs, Benediction Club, Karongi Vision Sport Center, Nyabihu Cycling Team na Kigali Cycling Club.

Abagabo (Elite & U23 men) bazahhaguruka i Kayonza saa tatu za mu gitondo naho abakobwa n’ingimbi bahagurukire i Ntunga saa tatu, bose bazasoreza mu Rukomo i Cicumbi.

Umukinnyi wa mbere mu bagabo no mu ngimbi azahembwa na Cogebanque naho uwa mbere mu bakobwa n’abatarengeje imyaka 23 ahembwa na Skol.

Agace ka kabiri ka Rwanda Cycling Cup kazahuza Intara y'u Burasirazuba n'Amajuaruguru
Uwizeye Jean Claude wa Les Amis Sportif acungana na Nsengimana Jean Bosco wa Benediction mu gace ka mbere
Munyaneza Didier wa Benediction Club niwe wegukanye agace ka mbere k'iri rushanwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza