IGIHE

Areruya Joseph na bagenzi be bizeye guhesha u Rwanda imidali muri All-African Games

0 22-08-2019 - saa 09:14, Eric Tony Ukurikiyimfura

Ikipe y’abakinnyi bane basiganwa ku magare izahagararira u Rwanda mu mikino nyafurika ya All-African Games iri kubera muri Maroc yamaze guhaguruka mu Rwanda, aho yajyanye icyizere cyo kongera kwegukana imidali nk’uko byagenze mu 2015.

Muri iyi mikino iri kuba ku nshuro ya 12, mu magare u Rwanda ruzaba ruhagarariwe na Mugisha Moïse umaze iminsi mu masiganwa ya Skol Fly Cycling Club mu Bubiligi, Areruya Joseph na Munyaneza Didier bavuye kwitoreza mu Buyapani ndetse na Nzafashwanayo Jean Claude uheruka kwegukana Tour de la RDC hamwe na Benediction Excel Energy.

Aba bakinnyi bari kumwe na Sempoma Félix nk’umutoza ndetse na Maniriho Eric nk’umukanishi, bamaze kwerekeza muri Maroc mbere y’uko batangira gukina kuri uyu wa Gatandatu.

Areruya Joseph usanzwe akinira ikipe ya Delko Marseille mu Bufaransa, yavuze ko we na bagenzi be biteguye kwitara neza bakegukana imidali nk’uko ikipe y’u Rwanda yabikoze mu 2015.

Uyu mukinnyi yavuze ko biteze ko ari irushanwa ritazaborohera kuko bagiye ari abakinnyi bacye mu gihe amakipe bazaba bahanganye yo azaba afite abakinnyi benshi.

Ati” Birashoboka cyane ko twakongera tukegukana imidali gusa ntabwo byoroshye bitewe n’uko abakinnyi bagabanyutse, tugiye turi abakinnyi bane urumva biragoye. Ubushize twagiye turi abakinnyi umunani. Biragoye ko twabasha gutsinda isiganwa risaba abakinnyi benshi mu gukina nk’ikipe. Umuntu ku giti cye wenda birashoboka, gusa ntibyoroshye.”

“Nk’abakinnyi twifitiye icyizere cyo kuzakora ibyo dushoboye kugira ngo twongere kubona umudali nk’uko byari byaragenze ubushize. Ahantu bishoboka cyane tuzashyira ingufu ni ugusiganwa n’ibihe nk’ikipe no ku muntu ku giti cye kuko tugiye turi bake kandi andi makipe bazaba ari benshi.”

Ubwo iyi mikino Nyafurika ya All-African Games iheruka kuba mu 2015 i Brazzaville, Areruya Joseph yari mu ikipe y’u Rwanda y’amagare yatwaye imidali ibiri irimo uwa Zahabu wegukanywe na Hadi Janvier mu gusiganwa n’ibihe ndetse n’undi wa Bronze watwawe mu gusiganwa n’ibihe nk’ikipe.

Aba bakinnyi uko ari bane bazakora isiganwa rya mbere ku wa Gatandatu basiganwa n’ibihe nk’ikipe (Team Time Trial).

Ku wa Mbere w’icyumweru gitaha, tariki ya 26 Kanama, Areruya Joseph na Mugisha Moïse bazasiganwa n’ibihe buri mukinnyi ku giti cye (Individual Time Trial) naho tariki ya 29 Kanama habe isiganwa ryo mu muhanda (Road Race).

Kugeza ubu, u Rwanda rufite umudali umwe wa Bronze muri iyi mikino nyafurika iri kubera muri Maroc, aho waraye utwawe n’ikipe y’abagabo ya Beach Volleyball yabaye iya gatatu.

Hitimana Noël na Yankurije Marthe bazatangira gusiganwa ku maguru mu cyumweru gitaha ku ntera ya metero ibihumbi 10.

Abakinnyi bane bagize ikipe y'u Rwanda y'amagare izakina All-African Games hamwe n'umutoza Sempoma bamaze kwerekeza muri Maroc
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza