IGIHE

Ibyo wamenya kuri iPhone 11, telefoni nshya Apple yashyize ku isoko

0 11-09-2019 - saa 12:14, Ndayikunda Josué

Uruganda rwa Apple rumaze kwamamara kubera ubuhanga n’ubunararibonye mu gukora telefoni zigezweho, rwashyize hanze inshya zo mu bwoko bwa iPhone 11 Pro na 11 Pro Max zikoranye ikoranabuhanga rihambaye.

Izi telefoni zamuritswe ku wa Kabiri tariki ya 10 Nzeri 2019 mu gikorwa cyabereye ku Cyicaro cya Apple i Cupertino muri California muri Leta Zunze Ubumwe za Amerika.

Telefoni zamuritswe ni iPhone 11 Pro, 11 Pro Max ziri ku rwego rwo hejuru, na iPhone 11 isa naho iciriritse ugereranyije n’izindi zashyizwe ku isoko. Izi zose zije gusimbura iPhone XS, XS Max na XR.

Izi iPhone nshya zifite umwihariko kuko zifite byinshi zitandukaniyeho n’iziheruka dore ko camera yazo na batiri byavuguruwe bikanongererwa ubushobozi.

Nka iPhone 11 Pro na iPhone 11 Pro Max zifite camera eshatu inyuma n’ubushobozi buhanitse bwa za batiri.

Apple yatangaje ko batiri ya iPhone 11 Pro izajya imaramo umuriro amasaha ane y’inyongera ku yo iPhone XS yasimbuye yamaraga, naho umuriro wa iPhone 11 Pro Max umare amasaha atanu hejuru yayo iPhone XS Max yamaraga.

Umuyobozi wa Apple, Tim Cook, yavuze ko ubwoko bushya bwa iPhone zamuritswe buri mu “Bwisumbuyeho kandi buteye imbere kurusha izo twakoze zifite imiterere idasanzwe.’’

Apple yasabye abakiliya kwihutira kuzigura kugira ngo bajyane n’ibigezweho. Kuri ubu iPhone 11 Pro izacuruzwa ku $999 naho iPhone Pro Max igure $1,099 mu gihe iPhone 11 iri kuri $699. Ibi biciro birasa neza na iPhone XS na XS Max zije zisimbura.

CNN ivuga ko iki cyemezo cyo kugumishaho ibiciro byari bisanzwe kije gisa nko gusigasira isoko rya Apple dore ko uru ruganda ruherutse guhura n’ikibazo cy’igabanuka ry’inyungu rwabonaga, bigakubitaniraho n’intambara y’ubucuruzi imaze kuba agatereranzamba hagati y’u Bushinwa na Leta Zunze Ubumwe za Amerika kandi ubusanzwe isoko rinini rya Apple ribarizwa mu Bushinwa.

Telefoni nshya zikoranye ikoranabuhanga rya iOS 13, rizatuma umuntu ashyira umwijima muri telefoni ngo agabanye uburyo ikoresha umuriro, kuba abantu udafitiye nimero bashobora kujya baguhamagara telefoni ntivuge cyangwa uburyo umuntu ashobora kwandika muri telefoni akoresheje uburyo bwo kunyereza urutoki (swipe) aho kudonda nk’ibisanzwe.

iPhones zashyizwe ku isoko zifite camera y’imbere ifite megapixel 12 ugereranyije n’izo mu mwaka ushize zari zifite imboni ya camera (lens) ifite megapixels zirindwi.

Apple kandi yahaye iPhone ubushobozi bw’ububiko bungana na gigabyte 64, 256 cyangwa 512 kuri iPhone 11 Pro na Pro Max.

Biteganyijwe ko ku wa Gatanu tariki ya 13 Nzeri 2019, abifuza izi telefoni bazatangira kuzitumiza mu gihe zizaba zagejejwe mu maduka ku wa 20 Nzeri 2019.

Uretse izi iPhone nshya Apple yashyize hanze, yanamuritse iPad nshya [ifite ikirahuri kingana na santimetero 25.908], izaba igurishwa $329.

Apple yanatangaje imisusire mishya ya Apple Watch iri ku isoko kuva mu 2015, aho kuri ubu ufite iyo saha ntibizamusaba kuzamura ukuboko ngo arebe igihe kuko kwitegereza ku kirahuri gusa uhita ubona igihe kuko imibare iba igaragara.

Aya masaha azatangira kugurishwa ku giciro cya $399 cyangwa $499 bitewe n’imiterere yayo.

iPhone 11 Pro na Pro Max zizagezwa mu maduka ku wa 20 Nzeri 2019
Apple yashyize ku isoko izi telefoni mu gihe isoko ryayo mu Bushinwa ridahagaze neza
Iyi telefoni ifite camera eshatu z'inyuma
Izi telefoni zizaba ziri mu mabara atandukanye ku buryo umuntu azakora amahitamo bitewe n'irimunogera
Igiorwa cyo kumurika telefoni nshya za Apple cyabereye i Cupertino muri Leta ya California
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza