IGIHE

Google igiye gushyira ku isoko telefoni nshya ya Pixel 4

0 17-09-2019 - saa 17:06, Ishimwe Israel

Ikigo cyamamaye muri serivisi zifashishwa mu ikoranabuhanga rigezweho ’Google’ kigiye gushyira ku isoko ubwoko bushya bwa telefoni zacyo ziswe ‘Pixel 4’ bitarenze uyu mwaka.

Google yatumiye abanyamakuru mu gikorwa cyiswe "Made by Google" kizaba ku wa 15 Ukwakira 2019, aho biteganyijwe ko iki kigo kizamurika ku mugaragaro telefoni nshya ya "Pixel 4".

CNN yanditse ko ubusanzwe muri ibi bikorwa ariho Google imurikiramo ibicuruzwa byayo bishya.

Mu mwaka ushize icyo gikorwa cyamurikiwemo telefoni zo mu bwoko bwa Pixel 3, Pixel 3 XL, ikoranabuhanga ry’amashusho rikoreshwa mu ngo rizwi nka Home Hub ndetse n’ibirimo mudasobwa na tablets zikoresha porogaramu izifasha gukora (Operating System) ya Chrome OS.

Telefoni nshya, Google iteganya gushyira hanze yatangiye kuvugwaho muri uyu mwaka ndetse iki kigo cyemeza imiterere yayo muri Kamena 2019.

Amashusho ya Google agaragaza ko iyo telefoni izaba ifite camera y’inyuma nini, nta koranabuhanga ryo gufunguzwa igikumwe ikoresha.

Google kandi yanavuze ko mu miterere ya Pixel 4, izaba ifite ikoranabuhanga rishobora gukoresha ibyiyumviro n’ubushobozi bwo gufunguzwa isura kimwe nkuko bigenda ku ikoranabuhanga rya telefoni za Apple.

Camera iri mu bice byahinduwe kuko yakozwe hifashishijwe porogaramu y’ikoranabuhanga rya Google yifashisha ubwenge bw’ubukorano (artificial intelligence).

Mu gihe izindi telefoni ziba zifite camera z’inyuma enye, Google muri telefoni zayo zabanje yakoreshaga imwe.

Pixel 4 birakekwa ko ishobora kongerwaho indi camera na lens (imboni za camera) zifite ubushobozi bwo gukurura no kwiyegereza ikintu kiri kure. Zifite ubushobozi bwo gufata amafoto acyeye no mu gihe cy’ijoro cyangwa ahantu hijimye.

Iyi telefoni ishobora kuzaba ifite RAM ingana na 6GB, ivuye kuri 4GB muri Pixel 3. Ni impinduka yakozwe nyuma yo kwivovota kw’abakiliya bagaragazaga ko telefoni za Google zigenda buhoro kubera ububiko bwazo.

Telefoni za Pixel ni zo zonyine zikoresha ubuhanga bwa Android 10, butuma telefoni iha nyirayo umutekano usesuye mu bijyanye n’ikoranabuhanga.

Ubu buhanga butuma smartphone ikora imirimo uyihaye cyangwa ikagusubiza icyo uyisabye (Android mobile operating system), bwatangiye gukoreshwa ku mugaragaro ku wa 3 Nzeri 2019.

Android 10 ifite uburyo, iyo umuntu abihisemo, akoresha kuyikoraho uganisha mu merekezo anyuranye mu kuyiyobora igihe abihisemo, aho hamwe hasi kuri telefoni umuntu akanda akeneye kujya aho atangirira (home) cyangwa kureba ku yindi paji ya telefoni, hasimbuzwa umurongo w’umweru utambitse, agenderaho nk’uko iPhone ikora.

Pixel 4 igiye gusimbura ku isoko Pixel 3 ari nayo nto yaguraga amadolari 799 na Pixel 3 XL yacuruzwaga guhera ku 899$.

Imiterere ya telefoni "Pixel 4" igiye gushyirwa ku isoko na Google
Telefoni ya ‘Pixel 4’ izamurikirwa mu gikorwa cyiswe "Made by Google" giteganyijwe ku wa 15 Ukwakira 2019
Google igiye gushyira ku isoko telefoni nshya ya Pixel 4 ikoranye ikoranabuhanga rigezweho
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza