IGIHE

MTN yagabanyije ibiciro bya internet ya 4G ibinganisha n’iya 3G

2 25-06-2019 - saa 11:54, Ferdinand Maniraguha

Sosiyete y’itumanaho ya MTN Rwanda ku bufatanye n’Ikigo gisakaza umuyoboro wa Internet ya 4G, Korean Telecom Rwanda Network (KTRN), byatangajwe ko ibiciro bya internet ya 4G byagabanyijwe bikanganishwa n’ibya 3G.

MTN yatangaje ko byakozwe mu gukomeza gufasha abakiliya bayo kubona internet yihuta ku giciro gito.

Mu itangazo MTN yatanze, yavuze ko uko kugabanya ibiciro bizongera umubare w’abakoresha internet, bikanohereza iterambere ry’ubucuzi n’itumanaho.

Umuyobozi Mukuru ushinzwe imenyekanishabikorwa muri MTN Rwanda, Richard Acheampong yavuze ko kugabanya ibiciro bijyanye n’intego y’iyo sosiyete yo kugeza ku banyarwanda bose internet.

Ati “Twe nka MTN twemera ko buri munyarwanda akwiriye kubona inyungu z’iterambere rya internet ku isi. Kugabanya ibiciro bigaragaza umuhate wacu wo kugeza internet yihuta kandi ihendutse kuri bose.”

Umubare w’abakiliya ba MTN Rwanda bakoresha internet ukomeje kwiyongera ndetse iki kigo kivuga amafaranga yinjizwa avuye ku ikoreshwa rya internet yiyongera ku kigero cya 52.6 % buri mwaka.

Acheampong yagize ati “MTN ikomeje kugira umubare mwinshi w’abakoresha internet kandi twizeye ko uyu mubare uzakomeza kwiyongera na nyuma y’uko tugabanyije ibiciro bya 4G. Ntabwo ari ukugabanya ibiciro gusa ahubwo abakiliya bacu turi no gushaka ko bumva ubwiza bwa internet igezweho.”

Mu mwaka wa 2018 MTN Rwanda yakwirakwije mu gihugu cyose ibikorwa remezo bigeza henshi internet ya 3G . Byatumye abanyarwanda bagerwaho n’iyo internet bava kuri 53% muri 2017 bagera kuri 92 % mu 2018.

Muri uyu mwaka MTN ifite intego zo gukomeza kongera ubushobozi bw’ibikorwa remezo bitanga 3G no kubaka ibindi bishya.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Dido 2019-06-25 23:59:43

MTN murino minsi ifite imikorere mibi cyaneee rwose bakwiye kubanza bagakosora iyo mikorere, ibyo byibiciro ntacyo bitumarira nta network ihagije mugira unagura iyo internet iminsi igashira ntacyo uyikoresheje kubera network mbi, biba bitangaje iyo muvuga % bagezeho mubakoresha 3G kubera ibikorwaremezo kandi muri Kigali honyine umuntu ashobora guhamagara undi bikarangira batanumvikanye níkibazo gikomeye. Mwisubireho cg tugane Airtel-Tigo twese.

2
Natal 2019-06-25 23:33:06

Aho gukoresha 5G ya MTN nakoresha 3G ya Airtel kuko MTN ni urusenda bien bien.

Kwamamaza