Facebook imaze gufunga konti za baringa zirenga miliyari mu mezi atandatu

0 16-05-2018 - saa 12:16, Dusabimana Aimable

Urubuga nkoranyambaga rwa Facebook , ruyoboye izindi mu kwitabirwa cyane, rwatangaje ko rwahagaritse konti miliyari 1.3 mu bihembwe bibiri bishize rugaragaza n’izindi ngamba zidasanzwe rwashyizeho mu guhangana n’ibibazo birwugarije.

Facebook imaze igihe mu bibazo by’urudaca bishingiye ku buryo ibika amakuru y’abayikoresha ndetse mu minsi ishize Mark Zuckerberg wayishinze yitabye Inteko Ishinga Amategeko ya Leta Zunze Ubumwe za Amerika arisobanura.

Uru rubuga rwatangaje ku nshuro ya mbere ingamba rwafashe ku barukoresha mu buryo bwo gukwirakwiza ibibujijwe nk’amashusho y’urukozasoni, icengezamatwara ry’ikibi ndetse n’abarufungujeho konti za baringa zo gukoresha iyo migambi.

Icyegeranyo cy’amakuru kuri izo ngamba nshya cyakozwe ku gihembwe cya nyuma cya 2017 kigaragaza ko hafunzwe konti miliyoni 694 naho mu gitangira umwaka wa 2018 hafunzwe izigera kuri miliyoni 583 za baringa. Muri izo 98.5 % zahagaritswe hifashishijwe ikoranabuhanga rya ‘Artificial Intelligence’ mbere y’uko hagira uzamura ikirego kuri zo.

Facebook yavuze ko ku birebana n’amashusho cyangwa amafoto agaragaza urukozasoni yasibye ayashyizweho angana na miliyoni 42 biri munsi y’icumi ku ijana birebwa kuri urwo rubuga ariko amategeko yarwo yerekana ko hadasibwa ibigaragaza ubwambure mu gihe ari uburyo bw’ubugeni n’ubuhanzi bwihariye.

Mark Zuckerberg yagize ati “Ishimwe n’iry’ubumenyi buhambaye bwifashisha mudasobwa [AI] twubatse, ubutumwa butari nyakuri bwasibwaga mu gihe gito butaranagira uburegera ndetse konti za baringa nyinshi zafunzwe zigifungurwa mu kanya nk’ako guhumbya.”

Yongeyeho ati “Turacyafite byinshi byo gukora. AI iracyakeneye gukorwaho byinshi tukaba twabasha kurwanya n’ibikorwa mu zindi ndimi nk’imvugo z’urwango ariko ni ibintu tugikoraho.”

Facebook itangaza ko hari icyifuzo cyo gukuraho amashusho y’ubugizi bwa nabi kugeza ubwo abantu badakomeza guhura na yo mu gihe bakoresha urwo rubuga nubwo imibare yo muri iki gihe igaragaza ko basibye miliyoni 1.2 mu gihembwe cya kane cy’umwaka ushize naho mu cya mbere cy’uyu bagasiba miliyoni 3.4 yashyizweho.

Ubutumwa buzwi nka ‘Spam’ bukwirakwizwa cyane mu gihe gito ari bwinshi bwo hasibwe ubugera kuri miliyari 1.5, naho uburimo imvugo y’urwangano hasibwa ubungana na miliyoni 4.1 mu bihembwe byombi.

Hagaragajwe n’umabare munini w’ubutumwa bwamamaza iterabwoba bwasibwe bigizwemo uruhare cyane n’abakora muri icyo kigo babugaragaza mbere y’uko abakoresha Facebook babumenya, ibyo byatumye hasibwa ubungana na miliyoni eshatu.

Icyegeranyo gishya Facebook yasohoye kije nyuma y’igikuba cyacitse mu minsi ishize kubera ikoreshwa nabi ry’amakuru y’abarenga miliyoni 87 bayikoresha bigizwemo uruhare n’ikigo cya Cambridge Analytica cyakoranye na Donald Trump ubwo yiyamamazaga.

Mark Zuckerberg washinze Facebook

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza