IGIHE

Eugene Kaspersky yakebuye abacyizera internet amabanga yabo bakayasiga ku gasozi

1 16-05-2019 - saa 12:22, Ferdinand Maniraguha

Umuyobozi w’ikigo Kaspersky Lab cyo mu Burusiya gikora ubwirinzi bwifashishwa mu ikoranabuhanga, Eugene Kaspersky, yatangaje ko nta we ukwiriye kwizera ijana ku ijana umutekano wo kuri internet ku buryo afata amabanga ye yose akayabika mu byuma by’ikoranabuhanga nta bwirinzi.

Eugene Kaspersky yavuze ko uko ikoranabuhanga rikomeza gutera imbere ari ko n’udutsiko tw’amabandi ashaka kurikoresha mu buryo bubi twiyongera.

Yavuze ko hirya no hino ku isi hari abantu biyemeje gushora imbaraga zabo mu guhimba uburyo na virusi byibasira ibyuma by’ikoranabuhanga, bagamije kubona amafaranga.

Mu kiganiro yatanze kuri uyu wa Kabiri ubwo yari yitabiriye inama yiga ku mutekano yaberaga mu Ishuri Rikuru rya Gisirikare rihereye i Nyakinama mu Karere ka Musanze, yavuze ko kuri internet atari ahantu hatekanye.

Ati “Kuri internet biroroshye kuguhindurira amakuru. Twe nk’abashinzwe umutekano w’ikoranabuhanga dukurikiranira hafi abakora za virusi. Ibyaha by’ikoranabuhanga ni ubucuruzi bwabaye mpuzamahanga. Abo banyabyaha nta mupaka bakigira kandi bakorera hamwe.”

Kaspersky yavuze ko abakora virusi ziba amakuru cyangwa zica uburyo bw’ikoranabuhanga bigabanyijemo ibice kandi bakomeza kwaguka umunsi ku munsi.

Yavuze ko harimo inzobere mu gukora virusi. Iyo zimaze gukora virusi ziyiranguza ku bandi bantu bashinzwe kuyigeza muri za mudasobwa z’abantu n’ibigo cyangwa mu bindi byuma by’ikoranabuhanga.

Inyinshi muri izo virusi ziba ziriho ubutumwa bukubwira kubanza kwishyura kugira ngo ivemo, utabikora nyuma y’igihe runaka amakuru yari muri mudasobwa, telefone cyangwa ubundi buryo bw’ikoranabuhanga bikabura.

Yavuze ko hari n’abandi bo bakora virusi zibafasha kwinjira mu mabanga yawe, bayageramo bakayatwara bakaba bayagurisha cyangwa bakayahindura uko bashaka.

Inama

Eugene Kaspersky yavuze ko ubwirinzi bwa mbere kuri internet ari ukwirinda gukanda ku butumwa bwose utazi kuko virusi nyinshi zinjirira mu butumwa (link) wohererezwa ugakandaho.

Ati “Ntukagire uwo wizera kuri internet kandi ntugakande ku butumwa bwose bugeze muri email yawe. Jya ubanza gutekereza mbere yo gukanda kuri link ivuye ahantu utazi ndetse n’igihe ubwo butumwa buvuye ku muntu usanzwe uzi ariko ukagira impungenge kuko utari ubyiteze, banza umuhamagare umubaze niba ari we koko wabyoreheje.”

Ubundi buryo bw’ubwirinzi mu gihe uri kuri internet Kaspersky atanga, ni uguhorana ubwirinzi (Anti virus) muri mudasobwa cyangwa telefone yawe kandi buvuye ku kigo cyizewe.

Yavuze ko n’igihe ubona nta kibazo mudasobwa yawe ifite, udakwiriye kuvanamo ubwo bwirinzi kuko isaha n’isaha wahura na virusi mu gihe ukoresha internet.

Kaspersky yavuze ko amakuru ye y’ingenzi atajya ayabika kuri internet. N’ayo ashyize muri mudasobwa ashaka uburyo agira ikindi kintu ayabikaho nka flash disk n’ibindi nkayo ari nayo nama agira abandi.

Mu gihe mudasobwa cyangwa amabanga yatatswe na virusi ugasabwa amafaranga, Kaspersky yavuze ko udakwiriye kwishyura ayo mafaranga ahubwo ugomba guhita umenyesha ikigo cy’ubwirinzi mudasobwa yawe ikoresha bakagufasha kuburizamo iyo virusi.

Yifuje ko umutekano wo kuri internet ukwiriye kuba isomo ryigishwa abana kuva bakiri bato kuko kutabimenya kare bishobora gushyira ubuzima bwabo mu kaga.

Ati “ Mugomba kwigisha abana hakiri kare kwita kuri ibi bintu igihe cyose bakije mudasobwa cyangwa telefone zabo.”

Mu 2017 mudasobwa nyinshi hirya no hino ku Isi zagabweho igitero cya virusi yamenyekanye nka Wannacry. Icyo gitero cyageze kuri mudasobwa zisaga ibihumbi 200 mu bihugu 150 ku Isi.

Iyo virusi mudasobwa yageragamo yahitaga yifunga, ikagusaba kubanza kwishyura umubare runaka w’amafaranga kugira ngo yongere gufunguka.

Umuyobozi wa Kaspersky Lab yatangaje ko nta we ukwiriye kwizera ijana ku ijana umutekano wo kuri internet
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
rugano 2019-05-16 05:39:36

muzasome igitabo cyitwa .... muzasangamo ibyo byose twita ibanga rya internet ou email , ni hobyo rwose na réseaux sociaux ni kimwe !

dans le cyberspace on entend personne crier. le guerre mondiale numérique a commencé

Kwamamaza