IGIHE

Whatsapp igiye gutangiza uburyo bwo kwishyurana mu Buhinde

0 26-07-2019 - saa 19:53, IGIHE

Ku rubuga rwa Whatsapp mu gihugu cy’u Buhinde hagiye gutangizwaho uburyo bushya bwo kwishyurana.

Sosiyete ya Facebook ari nayo yaguze Whatsapp imaze igihe iri mu igerageza ku ikoreshwa ry’ubwo buryo ku bantu bagera kuri miliyoni mu gihe cy’umwaka.

Yari yaririnze kubitangiza mu buryo bweruye kuko itari yakabonye icyangombwa cya banki nkuru y’u Buhinde.

Umuyobozi wa Whatsapp, Will Cathcart yatangaje ko ubwo buryo buzaba bworoshye kubukoresha, ngo kuko umuntu azajya abasha kwishyura mugenzi we “nk’uwohereza ubutumwa bugufi”.

U Buhinde nicyo gihugu cya mbere ubwo buryo buzaba butangiriyemo, icyakora Cathcart ntiyigeze ahishura niba bamaze kwemererwa kubutangiza.

Yavuze ko nibitangira bizafasha benshi gukoresha uburyo bw’imari mu Buhinde bikazamura ubukungu bw’icyo gihugu.

Abagera kuri miliyoni enye mu Buhinde bakoresha urubuga rwa Whatsapp.

Mu gihe ubwo buryo buzaba butangijwe, Whatsapp izaba iri guhatana n’ubundi buryo bw’ikoranabuhanga bwamamaye mu kwishyurana mu Buhinde burimo Paytm, Phonepe, Amazon Pay na Google Pay.

Hashize igihe Whatsapp iri mu bibazo nyuma yo gushinjwa kumena amabanga y’abakiliya bayo mu Buhinde.

U Buhinde bwategetse sosiyete z’ikoranabuhanga kubika amakuru y’Abahinde muri icyo gihugu ariko Whatsapp n’ubu ntirabikora.

Banki Nkuru y’u Buhinde nayo mu mabwiriza yayo itegeka ibigo by’imari byose kubika amakuru y’abakiliya bayo mu gihugu.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza