IGIHE

Porogaramu zisaga igihumbi za Android ziba amakuru abazikoresha batabizi

0 9-07-2019 - saa 14:48, Ferdinand Maniraguha

Ubushakashatsi bwakozwe n’Ikigo International Computer Science Institute cyo muri Leta Zunze Ubumwe za Amerika, bwagaragaje ko hari porogaramu zisaga igihumbi zikoresha uburyo bw’ikoranabuhanga bwa Andorid, zigatwara amakuru y’abazikoresha nta burenganzira batanze.

Abashakashatsi bakoze igerageza kuri porogaramu za telefone zigera ku 88 000 ziboneka kuri Google Play Store, basanga porogaramu 1 325 ziba amakuru y’abazikoresha nta burenganzira batanze.

Zimwe muri izo porogaramu zatahuwe harimo nka Samsung Health, Samsung’s Browser n’izindi.

Ngo izo porogaramu zikoresha uburyo butandukanye bwo kubona amakuru ku bazikoresha batatanze uburenganzira harimo kuboherereza emails, gukoresha nimero za telefone zabo, gushakisha aho baherereye no gukoresha nimero mpuzamahanga yihariye ya telefone yakoreshejwe (IMEI).

Ubundi buryo bukoreshwa ngo ni ikoranabuhanga ryo kumenya aho umuntu aherereye hagendewe ku ifoto ye.

Hari n’izindi porogaramu zikoresha amayeri kugira ngo zigere ku makuru y’abazikoresha.

Joel Reardon wayoboye ubushakashatsi yagize ati “Ubu buryo bw’ibanga bakoresha bufasha porogaramu ebyiri kuba zakorana ku buryo porogaramu imwe ibasha guha amakuru y’ibanga indi itayafite.”

Bavuga ko ubu buryo bwo kwiba amabanga abakoresha porogaramu batabizi bushobora kuba bwaragize ingaruka kuri za miliyoni z’abakoresha Android.

Reardon yavuze ko bashaka gutanga amakuru yizewe ku mikorere y’izo porogaramu no kuburira inzego ziha uburenganzira ibigo bikora porogaramu zikoreshwa muri telefone, kugira ngo bijye bibanza kugenzura habungabungwa amakuru y’abaturage.

Aba bashakashatsi, ibyo babonye banabitangarije Google ari nayo yakoze Android.

Porogaramu zisaga igihumbi za Android ziba amakuru abazikoresha batabizi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza