IGIHE

Panasonic yahagaritse imikoranire na Huawei

0 23-05-2019 - saa 09:04, Ferdinand Maniraguha

Sosiyete yo mu Buyapani ikora ibikoresho by’ikoranabuhanga, Panasonic, yatangaje ko ibaye ihagaritse imikoranire na sosiyete yo mu Bushinwa ya Huawei.

Panasonic igiye ku rutonde rw’izindi sosiyete mpuzamahanga zimaze kwitaza Huawei nyuma y’uko Leta Zunze Ubumwe za Amerika ziyishyize mu kato ku mpamvu z’umutekano.

Mu cyumweru gishize Perezida Donald Trump yasinye iteka rishyiraho ibihe bidasanzwe mu by’umutekano w’ikoranabuhanga, ritanga uburanganzira bwo guhagarika sosiyete zimwe zikekwaho kuvogera amabanga y’ikoranabuhanga rya Amerika.

Intego ya mbere yari ukubuza Huawei gukomeza gukorera cyangwa kwinjiza ibikoresho byayo muri Amerika kubera ko ikekwaho gukorana na Leta y’u Bushinwa mu butasi.

Kuri uyu wa Kane, Panasonic yatangaje ko hari bimwe mu bikoresho byifashishwaga muri telefone itazongera guha Huawei.

Umuvugizi wa Panasonic, Joe Flynn, aganira na AFP yagize ati “Twahagaritse ibikorwa by’ubucuruzi byose twagiranaga na Huawei ndetse na sosiyete zayo 68 zifite aho zihuriye n’icyemezo cya Guverinoma ya Amerika ntituzakorana.”

Flynn yavuze ko ubucuruzi bwa Panasonic na Huawei bwibandaga cyane ku bikoresho by’ikoranabuhanga ariko yirinda gutangaza ubwoko bw’ibyo bikoresho by’umwihariko.

Iteka rya Trump ryabuzaga sosiyete z’ikoranabuhanga zikorera muri Amerika kuba zagira ibyo zigurisha na sosiyete zahagaritswe, kandi byinshi mu bikoresho Panasonic yagurishaga Huawei byakorerwaga mu nganda zayo ziri muri Amerika.

Icyemezo cya Amerika cyatumye sosiyete nyinshi z’ikoranabuhanga zitangira guca umubano na Huawei kugira ngo zibashe gukomeza gukorera muri Amerika.

Sosiyete za mbere zatangaje guca umubano na Huawei harimo Google, ifite porogaramu zifashishwa muri telefone nyinshi nku isi.

Kuri uyu wa Gatatu, izindi sosiyete zo mu Buyapani no mu Bwongereza zatangaje ko zigioye kuba ziretse gusohora telefone zakoreshejwemo ibikoresho bya Huawei.

Nka sosiyete ya EE yo mu Bwongereza yabaye ihagaritse ibyo gutangiza internet ya 5G yifashisha ibikoresho bya Huawei kugeza igihe izabanza kwizera ko umutekano w’iyo internet wizewe.

Vodafone nayo yahise itangaza ko ibaye ihagaritse ibikoresho yari yarasabye Huawei kuyizanira mu gihe ibintu bitarasobanuka.

BBC yatangaje ko indi sosiyete y’ikoranabuhanga ya ARM ikora processeurs zifashishwa muri telefone nayo yabaye iciye umubano na Huawei.

Kuri uyu wa Gatatu Huawei yatangaje ko izi neza igitutu kiri gushyirwa ku bafatanyabikorwa bayo ariko yizeza ko ibibazo bizarangira.

Abayobozi ba Amerika baherutse gutanga agahenga k’iminsi 90 kugira ngo sosiyete zo muri icyo gihugu zibone uko zishakisha ahandi ho kuvana ibyo zakuraga kuri Huawei.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza