IGIHE

Irembo yashyizeho ikoranabuhanga risobanurira abaturage serivisi bagiye gusaba

0 2-04-2024 - saa 14:45, Nshimiyimana Jean Baptiste

Ubuyobozi bwa Irembo Ltd bwatangaje ko ku rubuga rusabirwaho serivisi za Leta zitandukanye rwa IremboGo, hongeweho icyumba gitanga ubufasha [Support Center] ku muntu ukeneye gusobanukirwa serivisi agiye gusaba n’ibyo akeneye kugira ngo ayihabwe.

Hashize iminsi hatangijwe ubukangurambaga bwa ‘Byikorere’ aho buri muntu ufite telefone igendangwa cyangwa mudasobwa ashobora gusaba serivise za Leta atagombye kujya gushaka umukozi wa Irembo mu bice baherereyemo.

Abaturage benshi bagiye bibaza ibibazo bijyanye na serivisi bakeneye, bigatuma bahaguruka bakajya gushaka ubufasha ku bakozi ba Irembo Ltd.

Itangazo iki kigo cyashyize hanze, rigaragaza ko rubuga rwa IremboGov hongewemo igice kizajya gitanga ubufasha n’amakuru yihuse kandi agezweho kuri buri serivisi, ayo makuru arimo n’igihe bishobora gufata ngo serivisi ibe yabonetse.

Rigira riti “Ni isoko itanga amakuru nyayo kandi ajyanye n’igihe yerekeye serivisi zitandukanye za Leta. Yifashishije ikoranabuhanga rihanitse iyobora umuturage igakora ku buryo aba afite amakuru yose y’ingenzi kugira ngo ashobore gufata ibyemezo bishingiye ku makuru yizewe kuri serivisi akeneye.”

Risobanura ko mu gihe umuturage asabye serivisi anyuze mu gice gitanga ubufasha ahita ahabwa ibisobanuro birimo amakuru arambuye kuri serivisi agiye gusaba, ibisabwa n’ibiciro byayo.

Ubuyobozi bwa Irembo Ltd buhamya ko haba hari amakuru agezweho arebana na gahunda na serivisi za Leta, ibituma abantu baba bakeneye kwifashisha ubu buryo.

Irembo Support Center kandi irimo amakuru ajyanye n’uburyo wasaba serivisi runaka, ibibazo abantu bakunda kwibaza ndetse n’amashusho abisobanura.

Riti “Ibi byose byashyizweho kugira ngo umuntu ukoresha uru rubuga yigirire icyizere igihe asaba serivisi zitandukanye. Biyobora umuntu neza, bisubiza ibibazo rusange, kandi bigatanga ubufasha mu buryo bw’amashusho kugira ngo abantu basobanukirwe kurushaho.”

Ubuyobozi bwa Irembo Ltd buhamya ko kuva iki cyumba cyashyirwa ku rubuga byagabanyije umubare w’abantu bagaragaza ibibazo bitandukanye bijyanye na serivisi bakenera, kuko hariho ibisubizo no ku bindi bibazo abantu bakunda kwibaza.

Ni mu gihe n’ingorane zose ku byerekeye gahunda ya byikorere zakemutse kuko umuturage aba afite amakuru yose ajyanye na serivisi akeneye.

Ku rubuga rwa IremboGov hongeweho icyumba kiyobora umuturage usaba serivisi, agasubizwa ibibazo byose yibaza binyuze mu ikoranabuhanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza