Indege ya mbere nini y’ u Bushinwa yatsinze igeragezwa mbere yo kwemererwa kuguruka

3 25-04-2017 - saa 11:03, Ishimwe Daniel, Uwishyaka Jean Louis

Indege ya mbere nini y’u Bushinwa yatsinze igerageza ry’ibanze riyifasha kwemererwa kuguruka, ibizatuma iki gihugu kiba kimwe mu by’ibihangange mu gukora indege nini ku isi.

Iyo ndege ifite numero C919, yakozwe n’ikigo cy’ubucuruzi gikora indege mu Bushinwa,Commercial Aircraft Corporation , yarangije igerageza ryayo ryo kugenda ku butaka kuri iki Cyumweru mu Mujyi wa Shanghai.

Iyi ndege ifite imyanya 168, ikajya kungana na zimwe mu ndege zikunzwe na benshi nka Airbus A320 na Boeing 737-800.

Iyi ndege uyirebeye inyuma, yubatswe mu buryo busa n’ubw’izo mu bihugu byo mu Burengerazuba bw’isi ndetse ifite na moteri iteye kimwe n’iz’indege nshya za Airbus. Iyi ndege y’Abashinwa isa n’ifite umwihariko wo kuba yisanzuye kuzirusha kuko imyanya yicarwamo yongerewe ingano.

Iyi ndege izakomeza kujya mu yandi magerageza ashobora gutwara amezi cyangwa imyaka kugira ngo bigaragare ko yujuje ibisabwa byose, aho bashobora no guhindura uko yubatse. Kugira ngo yemererwe gukomeza imirimo yayo igomba kubanza gutsinda andi magerageza yaba ayo mu Bushinwa n’ahandi hatandukanye ku isi.

Iyi ndege niramuka itangiye kogoga ikirere, u Bushinwa buzaba bwinjiye mu bindi bihugu by’ibihangange bifite amasosiyete akomeye akora indege nka Leta Zunze Ubumwe za Amerika, u Burusiya, Brazil, Canada, u Bwongereza n’u Budage.

Ntabwo uku gutinda guhabwa uburenganzira bwo gutwara abagenzi ari ubwa mbere kwaba kubaye kuko na Boeing ijya ibanza guca mu magerageza atandukanye kandi afata igihe kirekire mu rwego rwo kugenzura umutekano abagenzi bazagirira mu ndege nshya ziba zasohotse.

U Bushinwa buri mu rugamba rwo kuba bwahigitse ibihugu nka Amerika mu 2030 mu bijyanye n’iby’indege, ku buryo buri mwaka bugenda bugura indege nyinshi ziturutse mu masosiyete akomeye nka Airbus na Boeing bugamije guteza imbere urwego rw’iby’indege muri iki gihugu.

Iyi ndege C919 yakorewe gutwara abagenzi b’Abashinwa mu gihugu cyabo ku buryo bishoboka ko itazagaragara mu kirere cy’ibindi bihugu.

Iyi ndege yiswe 'C919' yatsinze igerageza ry'ibanze rizayifasha kwemererwa kujya mu kirere
Iyi ndege ijya kunganya ubushobozi n'izindi z'amasosiyete akomeye ku Isi
Iyi ndege izajya ikora ingendo z'imbere mu gihugu gusa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Yen 2017-04-25 12:53:53

Ibyo mwanditse ko ariyo ya mbere ntabwo mbyizeye. Better you check

2
com 2017-04-25 10:51:49

Oyeeee China

3
kaleb 2017-04-25 07:02:17

Go China!

Kwamamaza