IGIHE

Imiterere ya Rwasat-1, icyogajuru cya mbere cyakozwe n’abanyarwanda

34 15-05-2019 - saa 17:01, Philbert Girinema

Mu mpeshyi y’uyu mwaka, u Rwanda ruzohereza mu isanzure icyogajuru cya mbere gikozwe n’abanyarwanda. Ni nyuma y’uko hari hashize igihe kigera ku myaka ibiri bitangajwe ko ruri mu bufatanye na Kaminuza ya Tokyo yo mu Buyapani mu kugitunganya.

Magingo aya, iki cyogajuru cyamaze kurangira ndetse cyerekanwe mu imurika ry’ibikorwa by’ikoranabuhanga muri Kigali Convention Centre ahari kubera inama ya Transform Africa iri kuba ku nshuro ya Gatanu.

Umushinga w’iki cyogajuru wagiyeho muri gahunda y’u Rwanda yo kugira ikigo cya mbere mu Rwanda cy’ibijyanye n’ubumenyi bw’ikirere ku buryo amakuru atangwa n’ibyogajuru atongera kuva ku by’abandi biba byishyurwa.

Mu Ukuboza 2018 abanyarwanda batatu bagiye mu Buyapani gukora kuri uyu mushinga ndetse no guhaha ubumenyi bwazabafasha mu gihe kiri imbere gukora icyabo ndetse no kuba babasha gukemura ikibazo ‘RWASAT-1’ yagira.

Magingo aya iki cyogajuru cyararangiye bigizwemo uruhare n’Abanyarwanda bafashijwe na Kaminuza ya Tokyo.

Umuyobozi w’umushinga wa RWASAT, Quentin Verspieren, yabwiye IGIHE ko iki cyogajuru gifite inshingano ebyiri z’ingenzi.

Ati “Imwe ni ugufata amakuru avuye hasi ku butaka. Gikoranye ubushobozi buhambaye bukibashisha gufata amakuru kikayohereza ku cyogajuru ku buryo cyayakura n’ahantu bigoye nk’ahadashobora kuboneka itumanaho rya telefoni.”

Kugira ngo aya makuru abashe kuboneka, gikoranye akuma gato cyane gafite ubushobozi buhambaye gashobora nko gupima ingano y’amazi mu butaka, ubushyuhe, ubuhehere n’ibindi bipimo bijyanye n’imiterere y’ibihe.

Ati “Dushobora guhuza ibyo bipimo byose, bigahurizwa muri ka kuma mbere yo koherezwa ku cyogajuru kandi cyifashishije ubushobozi buke [weak signal] mu by’itumanaho.”

Iki cyogajuru gifite ubushobozi bwo kwitegereza mu bice bitandukanye cyifashishije camera ebyiri zacyo, zishobora gufata amafoto yo ku butaka bw’u Rwanda mu buryo butandukanye.

Ati “Mu guhuza ibyo bimenyetso tukaba twabasha kumenya imiterere y’aho hantu. Niba hari amazi, niba hari umurima ushobora guhingwa.”

Rwasat-1 ni icyogajuru cya mbere gikozwe bigizwemo uruhare n'abanyarwanda kizifashishwa mu bikorwa by’ubuhinzi mu Rwanda

Ku ruhande rw’u Rwanda, iki cyogajuru cyakozwe bigizwemo uruhare n’Urwego Ngenzuramikorere, RURA.

Gipima ibiro 3.8, mu minsi ya vuba kizashyikirizwa Ikigo cy’u Buyapani gishinzwe iby’isanzure, JAXA, ari nayo izakijyana kuri Sitasiyo icunga ikirere mbere yo koherezwa mu isanzure.

Kizoherezwa mu isanzure ku butumburuke bwa kilometero 400. Nta giciro gihamye cy’amafaranga yatanzwe mu gukora iki cyogajuru aratangazwa, gusa amakuru IGIHE ifite ni uko usibye ajyanye no kugikora, u Rwanda rwanatanze andi yifashishijwe mu guhugura abanyarwanda ku buryo mu gihe kiri imbere bagira ubushobozi bwo gukora ikindi nkacyo.

RWASAT-1 nubwo aricyo cyogajuru cya mbere gikozwe bigizwemo uruhare n’abanyarwanda, si cyo cya mbere u Rwanda rugiye gutunga kuko ubu rufite mu isanzure icyitwa ‘Icyerekezo’ cyoherejwe muri Gashyantare ku bufatanye bwa Leta y’u Rwanda n’Ikigo Mpuzamahanga mu by’itumanaho, OneWeb.

Ni izina cyahawe n’abanyeshuri bo ku Rwunge rw’Amashuri rwitiriwe Mutagatifu Petero ku Nkombo, cyitezweho kugeza internet mu bice by’icyaro birimo iri shuri.

Cyoherejwe binyuze mu mushinga w’ikigo OneWeb gifite gahunda yo kohereza mu isanzure ibyogajuru 650 mu myaka ibiri, bizakwirakwiza internet icika gake cyane ugereranyije n’isanzwe. Ibi byogajuru byakozwe ku bufatanye n’ikigo Airbus Defence and Space.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4  

1
Marshall 2019-05-31 16:34:16

Nukuru u Rwanda narwo ruratengamaye mu @ikoramabuhamga kuko nubwo ari rwiza arko kdi rwanongeye kugira ibikorwa byindangagaciiro

2
Ndushabandi 2019-05-19 05:13:36

URWANDA RWAKOZE ICYOGAJURU,HAGATI AHA MUBUFRANSA HARI IMURIKA RYISWE VIVA TECHNOLOGIE,KUKI MWAHISEMO KUJYANA YO FONE MADE IN CHINE ZIBATIJE MADE IN RWANDA AHO KUJYANA ICYO CYOGAJURU CYANYU 🤔

3
Veteran 2019-05-17 01:09:47

Uretse gukabya kwabarwanya imishinga ya leta yose yiterambere, uyu mushinga ni sawa.
Izo internet mukoresha musebya u Rwanda yo ntiyashyizweho niyo leta mwanga?
Byose birakenewe mu buzima bwigihugu. Ni nko kuvuga ngo wahitamo kugira amaraso nta bwonko ufite. Abanyarwanda muragoye, icyogajuru na kenya iragifite

4
Muhizi 2019-05-16 18:15:37

Niko du tuvugishije nukuri cyakozwe nande urazi icyo bita navigation spaciale

5
Nana 2019-05-16 15:31:38

Igihugu cyacu ni aha kigeze gishinyagurirwa koko? Aho bigeze duhore nta kibi tutarabona.

6
Imana 2019-05-16 12:44:06

Ariko abanyarwanda tuzaguma muri ibi bintu kugeza ryari,dukeneye inganda nto zikora ibikoresho nkenerwa,nta energie atomique,ibyogajuru bitari kuri standard,u Rwanda turi igihugu gikennye iyo muvuga icyogajuru muba muzi ibyo muvuga?muzi projet yabyo uburyo ihenda?Please mujye mubibwira abatarize gusa.

7
Nshimiyimana Jean d'amour 2019-05-16 12:06:06

Ariko iyo bivuzwe ko abanyarwanda bakigizemo uruhare (icyogajuru) bishatse kuvuga ko bagikozeho ?

8
Rwandan 2019-05-16 11:34:59

Njyewe uyu mushinga ndawukunze cyane. Reka biriya byo kuvuga ngo tubanze dukemure besoins primaire ntacyo bivuze cyane. Gusa mfite igitekerezo cy’uko ibyo kureba amazi mu butaka mwazabikuraho kuko turabizi neza ko ahari mu Rwanda kandi menshi. Ahubwo rwose tuzagikoreshe tureba muri za Nyungwe hatazagira abadukuriraho ubutegetsi bwacu. Kandi instincts zanjye zimbwira ko aricyo bazagikoresha. murakoze

9
Charles 2019-05-16 11:03:14

Way to go Rwanda. Keep up the good work.
The sky is the limit. Nothing is impossible when Rwandans sons

10
Urwenya 2019-05-16 10:49:14

Ibi babyita kuruhura mu mutwe cg se urwenya. Dukeneye amazi meza, itumanaho (mtn) nibindi byinshi byibanze bizamura umuturage.

Paji: 1 | 2 | 3 | 4  

Kwamamaza