IGIHE

Imboni mu ishuri ricurirwamo intiti z’u Rwanda mu gukora porogaramu za mudasobwa

7 24-05-2019 - saa 08:04, IGIHE

Amezi atatu arashize, imfura z’Ishuri ry’Icyitegererezo mu Ikoranabuhanga (Rwanda Coding Academy-RCA) zitangiye amasomo y’imyaka itatu yo gukora porogaramu za mudasobwa.

Ishyirwaho rya RCA ryemejwe ku wa 28 Mutarama 2019 mu Nama y’Abaminisitiri idasanzwe yayobowe na Perezida Paul Kagame.

Iri shuri ryatangijwe ku wa 22 Gashyantare 2019; ryigisha amasomo y’Imyuga n’Ubumenyingiro avanze n’ay’uburezi rusange, rizajya ritanga impamyabumenyi z’icyiciro cya mbere mu gukora porogaramu za mudasobwa.

Ikoranabuhanga rikomeje kuba igicumbi cya serivisi umuturage akenera mu buzima bwe bwa buri munsi ndetse ryifashishwa mu nzego zose zirimo ubuhinzi n’ubworozi ndetse n’ubuzima.

Abahanga bagaragaza ko amasomo ajyanye no gukora porogaramu za mudasobwa yorohera abakiri bato kuyakurikira.

Muri uwo mujyo, abanyeshuri 60 barimo abahungu 30 n’abakobwa 30 batsinze neza mu Mibare, Ubugenge n’Icyongereza mu kizamini cy’Icyiciro rusange mu 2018, baratoranyijwe, boherezwa kwiga muri RCA mu Karere ka Nyabihu.

Ishyirwaho ry’iryo shuri rijyanye n’icyerekezo cy’u Rwanda cyo kwifashisha ikoranabuhanga mu kubaka ubukungu bushingiye ku bumenyi .

Minisitiri w’Ikoranabuhanga na Inovasiyo, Ingabire Paula, yabwiye CNBC Africa ko abanyeshuri bafite urukundo rwo kwiga ikoranabuhanga bashyiriweho gahunda yihariye.

Yagize ati “Abanyeshuri bafitiye urukundo amasomo ya ‘coding’, iyo barangije icyiciro rusange bakaba bazi ko ari aho bazakomereza, twabashyiriyeho gahunda y’imyaka itatu. Abanyeshuri bahavuye bazaba bafite ubushobozi bwo kujya ku isoko ry’umurimo bagahabwa akazi, bagahanga akabo, cyangwa bagakomeza muri kaminuza.’’

Abanyeshuri bari guhabwa amasomo muri RCA bitezweho kugabanya inzobere mu bya mudasobwa u Rwanda rwitabazaga ziturutse hanze.

Umuyobozi wa Rwanda Polytechnic, Dr Gashumba James, yavuze ko abari kwigishwa bari guhabwa ubushobozi bujyanye n’igihe Isi igezemo.

Yagize ati “Nk’igihugu ntitwari dufite urubyiruko rufite ubushobozi buhambaye mu ikoranabuhanga. Byakomaga mu nkokora iterambere u Rwanda rwifuza kugeraho. Iri shuri rifata abana bato, rikabaha ubushobozi bwimbitse ku mikorere ya mudasobwa no gukora porogaramu.’’

Uyu mushinga u Rwanda ruwufatanya na Kaminuza Mpuzamahanga yo muri Amerika Carnegie Mellon (CMU) n’izindi zitandukanye ku Isi.

Yavuze ko “Izo kaminuza zizadufasha mu kungurana ubumenyi hagati y’abakozi. Aba bana bazahabwa ubumenyi bwo ku rwego mpuzamahanga. Ubusanzwe twifashishaga inzobere zivuye hanze, tukazishyura amafaranga menshi. Si byiza ku gihugu gutegera amaboko abo bantu.’’

Abanyeshuri 60 nibo batoranyijwe kuryigamo rigifungurwa muri Gashyantare 2019

Umusanzu mu guhindura imibereho y’Abanyarwanda

Abanyeshuri biga muri RCA bizeye ko nibasoza amasomo yabo bazatanga umusanzu muri sosiyete mu guhanga ibisubizo by’ibibazo bihari bifashishije ikoranabuhanga.

Bavuze ko iri shuri riri ahantu hatuma biga neza n’abarimu bafite ubumenyi buzabafasha kugera ku nzozi zabo. RCA iri mu Murenge wa Mukamira mu Karere ka Nyabihu mu Ntara y’Uburengerazuba.

Hirwa Blessing yavuze ko “Batwigisha gutekereza byimbitse no guhanga udushya twakemura ibibazo Isi ifite. Wakemura ikibazo muri sosiyete ukoresheje porogaramu za mudasobwa.’’

Ineza Aimé Annabel yunzemo avuga ko “Nashishikajwe no kwiga ‘coding’ kuko turi mu Isi iri gutezwa imbere n’ikoranabuhanga. Nziga byinshi ku buryo bizamfasha kuzamura igihugu cyanjye mu ikoranabuhanga.’’

Umuyobozi ushinzwe Imishinga muri Rwanda Coding Academy, Niyigena Papias, yavuze ko mu guhitamo abanyeshuri hibanzwe ku b’abahanga.

Yagize ati “Twahisemo abanyeshuri beza mu gihugu, kandi dufite abarimu basanzwe bakora mu bijyanye n’ikoranabuhanga, bigisha ibyo bazi kandi bafitiye ubushobozi. Twizeye ko umusaruro uzaba mwiza.’’

Amasomo bahabwa ari ku rwego mpuzamahanga

Umwarimu muri Rwanda Coding Academy, Mwizerwa Stanley, yavuze ko amasomo abanyeshuri bagomba kwiga mu myaka itanu, bayahabwa muri itatu.

Yagize ati “Ukenera umuntu ufite impano, ubushobozi ku buryo yoroherwa no gufata mu mutwe ibintu byinshi mu gihe gito. Tubaha iby’ibanze, tukabigisha ikoranabuhanga rigezweho rikoreshwa mu nzego zitandukanye n’ubundi bumenyi buzabafasha ku isoko ry’umurimo.’’

Yakomeje avuga ko “Usanga akazi ari kenshi kandi abari ku isoko badafite ubushobozi buhagije bwo gukora akazi bahawe. Ushaka umuntu, yaza ugafata umwanya wo kumwigisha ngo agere ku rwego rwo gutanga ibyo wifuza.’’

Mu mfura za RCA, hari abanyeshuri bazakirwa muri Sosiyete ya Andela yo muri Leta Zunze Ubumwe za Amerika izobereye mu gukora porogaramu zitandukanye z’ikoranabuhanga (software).

Andela yihaye intego yo guhugura no gufasha Abanyarwanda 500 muri urwo rwego no kubashakira akazi mu bigo by’ikoranabuhanga ku Isi. Aba banyeshuri nibasoza amasomo, batandatu muri bo bazakirwa n’iyo sosiyete.

Umuyobozi wa Andela Rwanda, Uwajeneza Clement, yavuze ko igitekerezo cyo kubaka igicumbi cy’ikoranabuhanga gikwiye kujyana no kubaka ubushobozi bukenewe mu bigo bikorera mu Rwanda n’ibishaka kuhagana.

Yakomeje agira ati “Hari ibigo bifungura bishaka abahanga mu ikoranabuhanga ahantu hose, iyo ufite Abanyarwanda bagiye kuvamo abahanga mu by’ikoranabuhanga, uba ubategurira isoko mpuzamahanga. Bagira uruhare mu gushaka ibisubizo by’ibibazo dufite, iyo ufite benshi baba mu Rwanda biba ari akarusho ku gihugu.’’

Umwe mu mikoro itegereje aba banyeshuri nyuma yo gusoza amasimo ni uguhangana n’ibitero byifashishije ikoranabuhanga.

Mu 2016, iyari Minisiteri y’Urubyiruko n’Ikoranabuhanga, yavuze ko u Rwanda rugabwaho ibitero bisaga 1000 by’ikoranabuhanga bigasubizwa inyuma.

U Rwanda ni urwa 76 ku Isi mu bihugu byibasirwa n’ibitero by’ikoranabuhanga nkuko byatangajwe na Sosiyete icuruza ubwirinzi mu by’ikoranabuhanga, Kaspersky.

Mu 2017, ubujura bw’ikoranabuhanga bwahombeje Isi miliyari zigera kuri 600 z’amadolari. Nta gikozwe bwahombya Isi tiliyari esheshatu mu 2021.

Raporo ya PWC ku Rwanda yo mu 2018 igaragaza ko ibyaha by’ikoranabuhanga biri mu byiganje mu bikorerwa mu rwego rw’ubukungu. Inagaragaza ko ibigo 50% byizera ko ibitero byifashishije ikoranabuhanga bizaza ku isonga y’ibyaha mu myaka ibiri iri imbere.

Iri shuri riherereye mu Karere ka Nyabihu mu Ntara y'Uburengerazuba
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Schadrack 2019-06-03 23:48:14

Nibarangiza bazabashakire indi kaminuza iri Ku rwego bazaba bagezeho kuko nibaza muzisanzwe bazasubira inyuma

2
bimawuwa 2019-05-24 14:49:59

gahunda yiterambere ryu burezi niko miisteri yu burezi igomba gshiraho gahunda ya college mu gihugu.yi gishaka amasomo yi myuga na ndi masomo asanzwe..byafasha igihugu cyane nkiryo shuri ntiryakagombye kubaho iyo tuba dufite za college mu gihugu. abanyeshuri bana niwe gukomeza bakajya bajya muri za college kwiga amasomo yi myiga bihitiyemo.ministeri ikabashakira abarimu babigisha bya ruta cyane bya natuma abana niyo bananiwe kurangiza amashuri kubera kubura amanita akomeza bazajya bajya gushaka ubundi bumenye muri college. ex nki nyamirambo ukahashira nyairambo college izajya yigisha amasomo yi myuga arimo mechanic engineering electrical Plummer nibinidi bigenda ni myuga naho wenda mukandi karere ukahashira college yi gisha amasomo yi computer program nandi masomo agendanye na technology agakora gahunda imeze gutyo byaca nabantu kwishora mi mirimo mibibi.

3
che 2019-05-24 14:14:09

turihanze amaso kandi dukeneye umusaruro dore ko ibikenewe byose byatanzwe ngaho nimwigishe abana, ejo muzatwereke umusaruro ufatika.

4
Kayijamahe Evariste 2019-05-24 05:47:05

Wonderful. Aya mahirwe abanyeshuri bahawe bayakomereho kuko iri shuri riri SMART.

5
Kayijamahe Evariste 2019-05-24 04:53:20

Byiza cyane.Aya mahirwe aba abanyeshuri bahawe bayakomereho iri shuri riri SMART

6
Shema Ganza 2019-05-24 04:22:55

Biteye umunezero cyane , Rwanda nziza tera imbere , turabyishimiye

7
Pierre 2019-05-24 01:57:03

It’s wonderfully for our congruent Rwanda.

Kwamamaza