IGIHE

Ikarita imwe igiye kujya ikoreshwa mu kwishyura urugendo mu modoka, moto no guhaha mu masoko

10 14-06-2019 - saa 08:06, Rabbi Malo Umucunguzi

Ikoranabuhanga rimaze kumenyerwa mu kwishyura urugendo mu modoka rusange, rigiye kwagurwa rigere kuri moto ku buryo niba ukeneye kujya ahantu runaka, mubazi yashyizwe kuri moto izajya ikwereka intera wagenze n’amafaranga wishyura ugakozaho ikarita, utiriwe uciririkanya ngo hato mubure amafaranga avunje, usange mutakaje umwanya.

Ni urugendo rukomeje rwo kubaka ubukungu bw’u Rwanda budashingiye ku guhererekanya amafaranga mu ntoki.

Mubazi zizoroshya iki gikorwa zigiye gutangira gukorerwa mu Rwanda n’uruganda Mara Phones rwa mbere rukora smartphones muri Afurika, nyuma y’amasezerano rwasinyanye n’ikigo Pascal Technology (PTY) Limited.

Icyo kigo kiri mu byahawe ko kugeza ku wa tariki ya 1 Nyakanga 2019, buri mumotari azaba akoresha mubazi y’ikoranabuhanga, zizakuraho uguciririkanya hagati y’umumotari n’umugenzi.

Uburyo bwo kwishyurana mu byibanzweho

Pascal Ndizeye washinze Pascal Technology (PTY) Limited, yabwiye IGIHE ko ku bufatanye na Mara Phones, hazakorwa mubazi zikaboneka hafi mu gihe ubusanzwe zatumizwaga mu Bushinwa. Ni umushinga bibarwa ko uzatwara ishoramari risaga miliyari imwe y’amafaranga y’u Rwanda.

Avuga ko barimo gukorana n’ibigo bifite ikoranabuhanga ryo kwishyurana nka AC Group itanga amakarita ya Tap&Go, urubuga Irembo rufasha abaturage kubona serivisi, Polisi n’ibindi, ku buryo uzaba wishyura urugendo n’izindi serivisi ukoresheje ikarita imwe y’urugendo cyangwa iya banki.

Ati “N’ubundi nk’uko wakozagaho kuri bus, uzajya uva muri bus wenda ube wakoza kuri moto cyangwa uve kuri moto ukoze kuri bus, ari ikarita imwe utiriwe uvuga ngo hano ndatanga ikarita n’undi atange indi ikarita. Noneho mu minsi mike kuri ya karita ube wajya no mu maduka uyikoreshe nk’uko ukoresha visa card.”

Yavuze ko ubu ikigezweho ari uguhuza ikoranabuhanga (integration) ku buryo mubazi zizakorwa na Mara Phones zizaba zirimo ubushobozi bwo kwakira amakarita yose, yaba iy’urugendo n’isanzwe ya banki.

Yakomeje ati “N’ikarita ya banki uzaba ushobora kuyikozaho amafaranga akavaho. Ubu banki twasinyanye amasezerano ni BPR ariko n’izindi bitabujije ko zizaza. Nukozaho ikariya ya banki, iyo ufite application y’umugenzi, ushatse ya karita uyishyira muri application amafaranga akajya ahita yivanaho.”

“Iyo udafite application, iyo ukojejeho ikarita, imashini ihita ikoherereza ubutumwa kuri telefoni buguha aho ushyira umubare w’ibanga, ku buryo wanakwishyurira umuntu uri mu ntara wenda umubwiye uti gera i Kigali ndakwishyurira. Ntabwo yakuraho amafaranga utarashyiramo umubare wawe w’ibanga.”

Kuri application ya Pascal Moto ushyira muri telefoni ya Android cyangwa iPhone, ushobora kuyinjiramo ukishyura cyangwa nabwo ugahabwa ubutumwa bugufi kuri telefoni buguha aho wuzuza wa mubare w’ibanga.

Biteganywa ko iyi gahunda izaba yarangiye nibura mu kwezi kumwe, ku buryo ku wa Ku wa 1 Nyakanga uzaba ushobora gukoresha ikarita imwe ku rugendo kuri moto cyangwa mu modoka.

Abamotari bagiye guhabwa mubazi ku buryo guciririkanwa n'umugenzi bizaba amateka

Uzaba ushobora kwishyura serivisi z’Irembo cyangwa amande ya Polisi

Ukoresheje mubazi y’umumotari, uzaba ushobora kwishyura serivisi ku Irembo, bitagusabye gukora urugendo runini.

Ndizeye ati “Mu kwezi kumwe n’Irembo byose bizaba biri hamwe ku buryo ushobora kwishyura serivisi z’Irembo ku mumotari wese wabona, unyuze muri ya mashini y’umumotari. Nta komisiyo bazaba baka, ni serivisi bagomba gutanga na bo barabizi.”

“Polisi niba iguhagaritse, nabo bazaba bafite application ikorana n’izo mashini, ashyiremo plaque gusa ahite amenya nyir’ikinyabiziga, perimi ye, indangamuntu ye, imyirondoro yose. Bizaba binahura n’ibigo nk’Ikigo cy’Imisoro n’Amahoro. Ubwishingizi bw’ibinyabiziga ubu bwose bukoresha ikoranabuhanga, azajya ahita amenya niba ubufite, atiriwe agusaba igipapuro.”

Abakoresha ziriya mashini ubu batangiye kwemererwa kwishyura amande igihe nka polisi yabandikiye, aho ashyiramo purake y’imodoka cyangwa moto, yakanda kwishyura, kubera ko bikorana na mobile money cyangwa konti ya banki, ugahita usabwa umubare w’ibanga ubundi ukishyura.

Guverinoma yemeje ko ku wa 1 Nyakanga buri mumotaro azaba afite mubazi. Kugeza ubu Pascal Technology Ltd imaze gutanga izigera mu 6100.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
NSABIMANA Jean Bosco 2019-06-20 00:56:13

Ibi ni byiza ariko mubikomereze no muzindi services . Nk’urugero: Ujya kwa muganga ugasanga kwishyura ari umurongo kuburyo ushobora kumara amasaha abiri uri mukuzengurukana amakarita, amafishi, aho bakubarira,....ngaho ngo jya gufotoza ibi n’ibi, kwishyura ibizamini….kandi bakoresheje iri koranabuhanga wenda byakoroha.

2
Kirenge 2019-06-16 01:19:38

Ibi ni byiza cyane na ruswa umuntu atanga kugirango abone service nayo bazajye baishyira mwikorana buhanga. Umuntu akaguhamagara ngo nabonye izina ryawe muri dossiye nyisitayeho. Ati uzatumwe umuntu mubwire uko bya koroha. wamushyira akantu akakagaya ati umuntu watumye ashobora kuba yasitaye.Nzaba mbarirwa.

3
Gj 2019-06-15 10:22:15

Mbega byiza

4
Sam 2019-06-14 22:31:27

Ikoranabuhanga rwose rikomeze ryogere rigere no mu zindi Sectors nk’ubuvuzi, ubuhinzi, uburezi nibindi. Gusa, ryorohereze abo rigenewe kurushaho Kandi ribahendukire kurusha uko byari bimeze ridahari.

5
Ngabo 2019-06-14 12:51:48

Hello, this technology is really advanced, but we seems like we are running fast after technology, I think is better for all 3 companies to sit down and dig deep obout this advanced tech as you know the motor drives most of all are not people to believe, from here I will ask my question how safe is and security if drive come from kabuga tell the client not to tap so that he will reduce fare money for him. How will you know if you ask drive And tells you that he does have clients i suggest to bring phones that has camera in Fort to monitor.

6
Fred 2019-06-14 05:07:08

Iri korana buhanga ni ryiza rizajya ryoroshya za services nyinshi niba ariko koko bizagenda , ariko na none ryaba ryiza kurushaho rigiye ribanza kugaragaza Frw umugenzi yishyura aho agiye bitewe naho ariho , mbere yuko yiyemeza gutega moto akaba azi neza ayo yishyura . Kuko nimba mfite nka 800 Frw gusa kandi nshaka kujya mu mujyi byihutirwa ahantu runaka ni urugero kdi sinzi km zihari mu mutwe ,hari risque ko nshobora kugerayo akaba menshi kuruta ayo mfite bizagenda gute ?? Ese ninkurikirana nabwo nkabona uko agenda yiyongera ,agashirira mu nzira ntaragerayo ubwo ni ukuvaho ahasigaye nkahagenda n’amaguru ?!!!!

Ikindi mbona byaba byiza kurushaho igihe bitazamuye ibiciro bya Frw y’urugendo , mbese ikoranabuhanga n’iterambere bikagaragarira mu koroshya services no koroshya ubuzima ku bantu.

Ikindi mbona byaba byiza kurushaho mu gihe nyiri Moto agize uburenganzira ku mutungo we(Moto) mu nyungu z’umuryango we ,mbese niba arwaje umugore we yamujyana kwa Muganga ntihagire frw yishyuzwa nkaho hari undi arimo gukorera , icyo nacyo kikigwaho neza.

Ikindi nuko nibatangira guhuza ziriya services zitandukanye ku ikarita imwe ,byaba byiza badahise batesha agaciro ikarita abaturage bari basanganywe ,ahubwo bashyira ku isoko inshyashya zije ,bagashishikariza abaturage kuzigura bitewe n’ibyiza byazo ,noneho wenda bakagabanya gushyira ku isoko izari zisanzweho buhoro buhoro.

Ahasigaye ikoranabuhanga ryacu rikadushyira mu iterambere rya bose rizamura pouvoir d’achat ku banyarwanda cg se rituma bose baryibonamo kdi bitabahenze.

7
HABANA Eric 2019-06-14 02:28:09

Rwanda Rwanda songa mbere, umva ahubwo abibishinzwe mutugirire vuba iyo system itangire, tap and go yaraje Kigali turashima, ni SMART birihuta, byaturinze akajagari ka ba convoyeur, mutugirire vuba no mu ntara bize, uzi kuzinduka ugiye mu ntara saa mbiri barangiza bakakubwira ngo uragenda saa sita, uzi kujya guhaha supermaket ukisakasaka ukabura ayuzuye kandi wifitiye karita wahita ukozaho bakaguha ibicuruzwa ukigendera, uzi kwishyura umumotari akabura ayo agusubiza, akaguhenda cg mugashwana. Jyewe nongeye kwisabira ministeri y’ikoranabuhanga, RDB, PSF, companies za ICT, mudufashe ayo makarita aboneke vuba tuyakoreshe n’ibibazo byaboneka bikosorwe hakiri kare. Leta yacu nishyiremo imbaraga kabisa. Murakoze

8
Mugisha 2019-06-14 02:06:16

Muraho mbere yuko tap and go ijya muzindi service hazabanze kujyaho ibiganiro mpaka kugirango amakosa ari muri tap and go abanze akosoke

9
Mugisha 2019-06-14 02:05:06

Muraho mbere yuko tap and go ijya muzindi service hazabanze kujyaho ibiganiro mpaka kugirango amakosa ari muri tap and go abanze akosoke

10
Tom 2019-06-14 01:43:09

Bisaba ko izi karita zandikwa kuri nyirayo kandi hakajyaho uburyo bwo kurinda amafaranga ariho,ku buryo avaho nyirayo atanze uburenganzira bazazibarure nk’uko nta muntu ukoresha irangamuntu y’undi,cg nk’uko ATM yandikwa ku muntu umwe

Kwamamaza