IGIHE

Havumbuwe inyenyeri ifite uburemere bukubye ubw’Isi inshuro zisaga ibihumbi 330

1 17-09-2019 - saa 20:02, IGIHE

Abahanga mu by’ubumenyi bw’ikirere bavumbuye inyenyeri ifite uburemere budasanzwe bukubye inshuro nibura 333,000 ubw’Isi ifite n’inshuro 2.14 ugereranyije n’izuba.

Inyigo nshya yagaragaje ko iyi nyenyeri yiswe J0740+6620 iherereye mu ntera nibura y’ibilometero 30. Yavumbuwe ku ntera urumuri rushobora kugeraho mu myaka 4,600 ruvuye ku Isi.

Abahanga mu by’ubumenyi bw’ikirere bavuga ko umwaka umwe [mu kubara urwo rumuri] ushobora kubarwa kugera mu bilometero bigera ku 9 656 064 000 000.

Inyenyeri yavumbuwe ni imwe mu zabayeho mu myaka yo hambere izwi nka “Neutron star’’ ifite uburemere budasanzwe.

CNN yanditse ko izi nyenyeri akenshi usanga zarasenywe n’ibiturika byatewe n’ibiza, ibizwi nka supernova.

Iyo inyenyeri ihuye n’ibyo bihe, ibisigazwa byayo iyo bibaye byinshi cyane hari igihe byongera kwihuza bikarema ikintu kimeze nk’umwobo w’umukara, utapfa kurengwa n’urumuri. Inyenyeri ifite uburemere bworoheje ni yo ikora iyitwa neutron star.

Mu itangazo ryashyizwe ahabona, Umwanditsi Thankful Cromartie wo muri Kaminuza ya Virginia akaba anakora mu Kigo cy’Ubushakashatsi cya National Radio Astronomy Observatory, kiri i Charlottesville muri Leta ya Virginia, uri mu bayoboye iyo nyigo, yavuze ko “Izi nyenyeri ntizisanzwe ndetse ziteye amatsiko.’’

Izi nyenyeri ubusanzwe ziba zifite umurambararo wa kilometero 19 ariko ugasanga zijimye. Ugereranywa n’uw’imijyi ya Chicago cyangwa Atlanta.

Iryo tangazo rikomeza rivuga ko uburemere bwayo akenshi buba bungana n’ubw’izuba, aho nibura bushobora kugera kuri toni miliyoni 100.

Nubwo abashakashatsi bakoze inyigo kuri izo nyenyeri mu gihe kirekire, hari ibikibazwaho ku nyigo bakoze.

Maura McLaughlin wo muri Kaminuza ya West Virginia University uri mu bakoze iyo nyigo, abinyujije mu itangazo yavuze ko izo nyenyeri zidasanzwe.

Rigira riti “Ntituzi izo nyenyeri ibyo zikozemo ndetse ikibazo cy’ingenzi dufite ni uburyo wazikora. Ifite ibikoresho bidasanzwe dushobora gukorera muri laboratwari ku Isi.’’

Abashakashatsi bashyize ahabona ibyo babonye kuri iyo nyenyeri yavumbuwe n’indebakure (telescope) ya Green Bank ku wa 16 Nzeri 2019.

Abahanga mu by'ubumenyi bw'ikirere bavumbuye inyenyeri ifite uburemere budasanzwe
Havumbuwe inyenyeri ifite uburemere buruta ubw’Isi inshuro ibihumbi 333
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Alexis 2019-09-19 00:16:32

Imana ni umukozi w’Umuhanga.

Kwamamaza