IGIHE

Ba rwiyemezamirimo bato mu by’ikoranabuhanga basabwe kugira umwihariko wabo mu mishinga bahanga

0 4-10-2019 - saa 22:16, Ishimwe Israel

Minisitiri w’Ikoranabuhanga na Inovasiyo, Ingabire Paula, yasabye ba rwiyemezamirimo b’urubyiruko kujya bahanga ibishya bitakozwe n’abandi kugira ngo babashe kuzana ibisubizo ku bibazo biri ku isoko.

Yabigarutseho kuri uyu wa 4 Ukwakira 2019, abwira urubyiruko rumaze amezi atandatu ruhugurwa muri gahunda y’umushinga 250Startups, ugamije gufasha ba rwiyemezamirimo bato kunoza ibyo bakora no kububakira ubushobozi.

Ba rwiyemezamirimo bafashwa muri gahunda ya 250 StartUps ni abafite imishinga cyangwa ibigo byatangiye gukora, aho bafashwa mu bijyanye n’Amategeko n’Icungamari gukorana na ba rwiyemezamirimo mu imenyerezwa ry’amezi atandatu, aho babaha ubufasha bujyanye n’ibyo bize.

Uyu mushinga watangiye mu 2018, aho kuri uyu wa Gatanu hasojwe icyiciro cya kabiri cy’amasomo amaze guhabwa ba rwiyemezamirimo bagera kuri 20 barimo 10 basoje amasomo yabo muri iki cyiciro.

Minisitiri Ingabire yavuze ko imishinga myinshi yari muri iyi gahunda yibanda cyane ku buhinzi n’ubworozi ari naho nka guverinoma izahera ibahuza n’amasoko.

Yagize ati “Bagiye babona n’amafaranga mu baterankunga abafasha kugira ngo bazane ibyo bihangano ku isoko, igikurikiraho ni uko natwe tugiye kubahuza n’amakoperative arimo abahinzi n’aborozi kugira ngo ibihangano muri izo koperative bazikoreshe ariko natwe tuzakomeze kubakurikirana bazinoze zizakoreshwe mu gihugu cyose.”

Yabasabye kujya babanza kureba ku isoko, bagendeye ku mishinga yabo bakareba niba nta bandi basanzwe barayitangije, nyuma bakareba n’ibibazo biri ku isoko bikeneye ibisubizo.

Ati “Iyo umuntu abashije kumenya igihangano cye n’ibibazo kije gukemura ku isoko, icyo gihe urabanza ukareba niba hari abandi bantu ku isoko bakora nk’ibyawe. Turabasaba rero kubanza kwiga isoko bakamenya igikenewe, urumva ugiye gukora ibyo abandi basanzwe bakora ntabwo uzabakuraho abakiriya.”

“Icyiza ni ukwibanda ku dushya tutigeze dukorwa n’abandi kugira ngo murusheho kuzana ibisubizo ku bibazo biri ku isoko.”

Ba rwiyemezamirimo bahuguwe bavuga ko ari amahirwe akomeye babonye cyane ko bagize umwanya wo guhura n’abashoramari no gukora ingendoshuri bahamya ko zizabafasha kwaguka.

Uwizeye Tadhim washinze Olado Ltd ifite urubuga rwa Internet rukorerwaho ubucuruzi yagaragaje ko yungutse ubumenyi buzamufasha kwiteza imbere.

Yavuze ko “Njyewe nagize n’amahirwe yo kujya mu Buyapani mpura n’abashoramari bakora nk’ibyanjye banyereka umurongo mwiza wo kubikoramo kandi twaramenyanye turi no gutekereza uburyo najya ngemurayo ibicuruzwa.”

Olado ni urubuga ruhuza abacuruzi n’abakiliya binyuze kuri internet, rushyirwaho ibicuruzwa n’ibiciro byabyo ku buryo umuntu ukibengutswe agitumiza akakigezwaho iwe mu rugo.

Umuyobozi wa 250StartUps, Shyaka Charles, yavuze ko iyi gahunda ifasha urubyiruko na ba rwiyemezamirimo bafite imishinga izana impinduka muri sosiyete.

Yakomeje agira ati “Imishinga 10 yafashijwe mu cyiciro cya mbere imyinshi ihagaze neza ku isoko ndetse ba nyirayo bari kwishimira iterambere bagezeho biturutse ku bumenyi bahawe.”

Mu mishinga yanyuze muri ‘250 StartUps’ harimo uw’Ikoranabuhanga rizwi nka AICOS ryifashishwa mu micungire y’amakoperative mu Rwanda. Ikigo cya Extra Technologies kirigenzura cyashinzwe na Muhiza Frank giheruka kwegukana igihembo cya $5000 mu marushanwa akomeye azwi nka DataHack4FI Innovation.

Uwizeye Tadhim washinze Olado yavuze ko yungutse byinshi mu mezi atandatu yamaze ahugurwa muri gahunda ya 250StartUps
Minisitiri w’Ikoranabuhanga na Inovasiyo, Ingabire Paula, yakurikiranye ba rwiyemezamirimo bamuritse imishinga yabo
Ambasaderi w'u Buyapani mu Rwanda Takayuki Miyashita yavuze ko guverinoma y'igihugu cye yishimiye guteza imbere imishinga y'ikoranabuhanga
Minisitiri Ingabire yasabye urubyiruko guhanga ibishya rubijyanisha n'ibikenewe ku isoko
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza