IGIHE

Apple yongeye kuza ku isonga muri sosiyete zifite agaciro ku Isi mu 2019

0 23-05-2019 - saa 10:47, Ishimwe Israel

Uruganda rukora ibikoresho by’ikoranabuhanga rwa Apple rwongeye kuza ku isonga ku rutonde rw’Ikinyamakuru cyandika inkuru z’ubukungu cya Forbes nka sosiyete (brand) ifite agaciro kanini, kabarirwa muri miliyari $205.5.

Ni ku nshuro ya cyenda yikurikiranya Apple ishyizwe ku mwanya wa mbere kuri uru rutonde. Agaciro kayo kabarirwa muri miliyari $205.5; yiyongereyeho 12% ugereranyije n’umwaka ushize.

Forbes yanditse ko ari ku nshuro ya mbere iyo sosiyete igize umutungo urenze miliyari $200.

Apple yayoboye urutonde mu gihe telefone zayo za iPhone zagabanutse ku isoko by’umwihariko mu Bushinwa, aho isoko ryigaruriwe n’ibikoresho bya Huawei Technologies na Xiaomi.

Inyungu ziva kuri telefone zigezweho zagabanutseho 17% mu mezi atatu ashize igera kuri miliyari $31 ariko ububiko bwazo bwiyongereyeho 5%.

Uru ruganda rucuruza izindi serivisi zirimo App Store, Apple Pay na iTunes. Nizo ziza ku mwanya wa kabiri mu kwinjiriza Apple akayabo nyuma ya iPhone.

Urutonde rwashyizwe hanze rugaragaza ko Google iri ku mwanya wa kabiri n’agaciro ka miliyari $167.7, zingana n’inyongera ya 23%. Ikurikirwa na Microsoft ifite miliyari $123.5 na Amazon ifite miliyari $97, zazamuye agaciro kazo ho 20%.

Urubuga rwa Facebook rwaje ku mwanya wa gatanu. Niyo sosiyete rukumbi yasubiye inyuma mu icumi za mbere aho yagabanutseho 6%, igera kuri miliyari $88.9.

Iri rindimuka rifitanye isano n’umubare w’abakoresha Facebook wageze kuri miliyari 2.4 ariko yahuye n’ibibazo birimo ko amakuru y’abayikoresha yinjiriwe ndetse ikanyuzwaho amakuru y’impuha.

Coca-Cola ni yo sosiyete idakora ibijyanye n’ikoranabuhanga yaje imbere, ku mwanya wa gatandatu, aho ifite agaciro ka miliyari $59.2.

Sosiyete 100 za mbere kuri uru rutonde zifite agaciro ka tiliyari $2.33, inyongera ya 8% ugereranyije n’umwaka ushize.

Ni ku nshuro ya cyenda yikurikiranya Apple ishyizwe ku mwanya wa mbere ku rutonde rwa Forbes
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza