Umunsi mpuzamahanga w’amazi wizihijwe hari abanyamujyi bakivoma ibirohwa

0 23-03-2014 - saa 15:54, IGIHE

Mu gihe isi yizihiza umunsi mpuzamahanga wahariwe kuzirikana amazi meza ku nshuro ya 20, mu Rwanda hari abishimira ko ubu basigaye bakoresha amazi meza, hakaba n’abasanga hakiri urugendo rukomeye rwo kugera ku mazi meza, kuko hakiri aho abaturage bagikoresha amazi y’ibirohwa bavoma mu byo bita “ibinamba” biba biherereye mu mikoki itandukanye. Kuva mu mwaka wa 1992, ubwo tariki ya 22 Werurwe yemezwaga nk’umunsi mpuzamahanga wahariwe kuzirikana amazi, Isi ndetse n’u Rwanda by’umwihariko, byari (...)

Mu gihe isi yizihiza umunsi mpuzamahanga wahariwe kuzirikana amazi meza ku nshuro ya 20, mu Rwanda hari abishimira ko ubu basigaye bakoresha amazi meza, hakaba n’abasanga hakiri urugendo rukomeye rwo kugera ku mazi meza, kuko hakiri aho abaturage bagikoresha amazi y’ibirohwa bavoma mu byo bita “ibinamba” biba biherereye mu mikoki itandukanye.

Abana nibo usanga bakunze gukora ako kuvoma amazi ahanini y'ibinamba

Kuva mu mwaka wa 1992, ubwo tariki ya 22 Werurwe yemezwaga nk’umunsi mpuzamahanga wahariwe kuzirikana amazi, Isi ndetse n’u Rwanda by’umwihariko, byari byugarijwe no kutagira amazi meza, na cyane ko wasangaga hamwe na hamwe bataragera ku rwego rwo gutunganya amazi ku buryo yakoreshwa ameze neza.

Ikibazo cy’amazi meza cyakomeje kuba ingutu mu mijyi itandukanye, hirya no hino ku isi, ndetse binatuma iki kibazo kigarukwaho mu nsanganyamatsiko yahariwe umwaka wa 2013, aho yagiraga iti: “Amazi mu Mijyi, gukemura ikibazo cy’ingutu cy’amazi meza ku bayituye”, mu rurimi rw’icyongereza: “Water for cities: Responding to the Urban Challenge.”

Muri uyu mwaka wa 2014, umujyi wa Kigali ni umwe mu mijyi igikomerewe no kubona amazi meza, aho abaturage bo muri bimwe mu bice by’uyu mujyi bagitaka kubeshwaho n’amazi mabi bavoma mu ‘binamba’ byo mu mikoki itandukanye.

IGIHE yasuye Akagari ka Nyarufunzo, umurenge wa Mageragere ho mu karere ka Nyarugenge, hamwe mu hakigaragaza ko inzozi zo kubona amazi meza ziri kure kabone n’ubwo akenewe ku buryo butagibwaho impaka.

Kuba bigoranye kubona amazi meza kuri bamwe mu batuye Nyarufunzo, ni ikibazo kigaragara ku jisho, kuko kubona imigezi ivomwaho amazi meza, bitoroshye nko kubona aho abaturage bayadaha hasi bakoresheje ibikombe.

Kalisa Jean Baptiste, umugabo uri mu kigero cy’imyaka 35 twasanze adaha amazi mu mukoki aha i Nyarufunzo, yabwiye IGIHE ko bo nk’abaturage ikibazo cy’amazi meza cyamaze kuba akarande, bityo bo bamenyereye gukoresha no kunywa ayo badaha hasi kabone n’ubwo yiyemerera ko hari nayo badaha bayabonamo udukoko ndetse n’ubwandu bishobora kubagwa nabi.

Yagize ati “Aya mazi ubona tuvoma hano akenshi aba yanduye ku buryo bugaragara bitewe n’ibirere n’imitumba y’insina acamo biyanduza, ndetse kuko umuntu avoma haruguru ye havoma abandi nabo ugasanga bamwanduriza, ugasanga iteka uwo hepfo avoma amazi acapfuye.”

Mukakarangwa Annonciata, nawe twasanze yaje gushaka amazi muri uyu mukoki, avuga ko kuva kera kose bagiye bizezwa guhabwa amavomero asukuye, ariko magingo aya ngo amaso yaheze mu kirere.

Yagize ati “kuva mu myaka itanu ishize twagiye tubona abantu b’ingeri zose barimo n’abazungu bazaga gupima hano batubwira ko bagiye kutwubakira amavomero, ariko muri bose ntawagize icyo adufasha turacyatunzwe n’ibiziba turohaguza muri aha mu gakoki.”

Aba baturage bavuga ko umuntu ufite imbaraga we iyo ashatse amazi yo kunywa ajya kuyavoma ku ivomero ryiza, gusa ngo uretse kuba riri kure yabo, banavuga ko rihurirwaho n’abantu benshi bigateza urugomo ku buryo hari n’umubyeyi wigeze kuharumirwa ibere nk’uko abo twaganiriye babyemeza.

Abana bato bakomeje kuba ibitambo byo kutagira amazi hafi

Muri iyi mikoki irimo imanga, akenshi igoye kuyigenda, umubare munini w’abo twasanze bavoma ni abana bakiri bato hagati y’imyaka nk’itanu na cumi n’itanu, basobanura ko batabasha kubara umubare w’inshuro bavoma ku munsi bitewe n’uburyo amazi aba akenewe mu miryango yabo.

Umwe muri aba bana bigaragara ko bikorera ibivomesho nk’ababimenyereye, yagize ati “Tuvoma inshuro nyinshi ku munsi bitewe n’uko amazi akenewe mu rugo, kuko niko kazi kacu, kuko ababyeyi bacu baba bari mu yindi mirimo y’abantu bakuru.”

Hari bamwe mu babyeyi bavuga ko babizi neza ko abana babo bavunika bakiri bato, gusa bagashimangira ko ariyo mibereho bakwiye kubaho mu gihe cyose bataragezwaho amazi meza, ikibazo bavuga ko gikeneye ubushobozi bwa Leta kuko bo kibarenze.

Ikibazo cy’amazi mu mujyi wa Kigali ntikiri aha gusa, kuko cyagiye kigaragara mu bice bitandukanye nk’uko mwagiye mubikurikira mu nkuru zitandukanye twabagejejeho.

Aba baturage bavuga ko n’ubwo badasiba kurwara indwara zikomoka kuri aya mazi yanduye, iki kibazo batakirirwa bakibwira abayobozi b’inzego zibanze, ngo kuko nabo babyibonera, bataba bakeneye kubibwirwa.

Ubuyobozi bw’Akarere ka Nyarugenge buvuga ko umuti w’iki kibazo uri kuvugutwa

Umuyobozi w’Akarere ka Nyarugenge, Mukasonga Solange, mu kiganiro yagiranye na IGIHE, yasobanuye ko ubusanzwe abaturage bo muri aka kagari ka Nyarufunzo bahawe amazi, akavuga ko abaturage bahitamo kuvoma ibiroha byo mu mikoki ari ababa bashaka kuvoma hafi y’ingo zabo, bakagira ubute bwo kujya ku ivomero ry’amazi meza.

Mukasonga yakomeje asobanura ko hari umushinga Akarere kamaze gutangira umushinga waguye wo kugeza amazi mu tugari twose tw’uyu murenge, ndetse kandi ko Akarere kari kwagura umudugudu wa Mageragere mu rwego rwo kugira ngo abaturage barusheho kwegera ibikorwa remezo, aho bose babibonera hamwe.

Yagize ati: “[Igitera imyumvire] Ni imyumvire turacyakomeza kubigisha, ku buryo umuturage wese akumva ibyiza biri mu kwegera ibikorwa remezo, kugira ngo nawe ashake kubyegera kandi abone akamaro bimufitiye.”

Ubuyobozi bw’akarere ka Nyarugenge kandi buhamya ko ikibazo cy’amazi kitaba ari ikibazo mu gihe gito kiri imbere, kuko bwizera ko abaturage batuye ahantu habi kandi hataborohereza kubona ibikorwa remezo nk’amazi ,umuriro n’imihanda batazatinda kumvira bakajya mu mudugudu.

Aya mazi badaha ngo hari ubwo nayo basabwa kuyatondera umurongo
Kalisa yemeza ko hari ubwo bavoma aya mazi yanduye kubera ibirere by'insina cyangwa abavomera haruguru bakamutobera
Amazi bayakura ahantu hameze nko mu mwobo
Aba bana bato bavoma inshuro nyinshi muri uyu mukoki ugaragara nk'uteye ubwoba
Aya mazi akoreshwa imirimo itandukanye harimo no kuyisukurisha umubiro n'ubwo bemeza ko nayo ubwayo adasukuye
Uyu mukoki bavomamo uri mu rutoki rw'inzitane ku buryo uretse n'umwana n'abakuze batahamenyereye habatera ubwoba
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza