IGIHE

U Rwanda rwashyizwe mu hantu heza 19 ku Isi watemberera muri iyi mpeshyi

1 10-06-2019 - saa 16:20, Habimana James

Ikinyamakuru CNN cyo muri Leta Zunze Ubumwe za Amerika, kizwiho gukora inkuru zicukumbuye ku Isi, cyashyize u Rwanda mu hantu heza 19 ku Isi buri muntu yakwifuza kujya muri iyi mpeshyi ya 2019 akaba yaharuhukira.

Iki kinyamakuru cyavuze ko niba uyu munsi waba urimo gutekereza aho wajya muri iyi mpeshyi, cyaguhitiyemo aha hantu kugira ngo uzahabone ibyo wifuza byose harimo u Rwanda.

Hamwe muri aha cyavuze ni Salar de Uyuni muri Bolivia, aka niko agace kanini ku Isi kagaragamo umunyu wafatanye gaherereye muri Bolivia muri Amerika y’Epfo.

Haza kandi Las Vegas iherereye muri Leta zunze Ubumwe za Amerika, aha CCN ivuga ko ari ahantu hazataramirwa n’abahanzi barimo, Lady Gaga Janet, Jackson n’abandi.

Harimo Nova Scotia agace ko muri Canada, hari kandi Londres mu Bwongereza, Grand Canyon, muri Leta Zunze Ubumwe za Amerika, Apollo 11 Anniversary Celebrations, Multiple US Cities, Tasmania, New York City, French Polynesia, Anchorage, Alaska, Singapore, Seattle, u Bufaransa, Churchill, Manitoba.

Iki kinyamakuru kandi kigaragaza u Rwanda nk’ahantu heza ho gutemberera muri iyi mpeshyi.

CNN ivuga ko iyo utekereje u Rwanda uhita utekereza Ingagi zo mu Birunga.

Kigaragaza kandi inyamanswa ziherereye muri Pariki y’Akagera nk’Intare, Ibisamagwe, Inkura, Inzovu n’Imbogo ko nabyo biri mu bikwiye gusurwa muri iyi mpeshyi.

Harimo kandi icumbi rigezweho, Magashi Camp riherereye muri iyi parike, aho abantu bashobora kuruhukira bakihera ijisho ibyiza bitatse u Rwanda.

Iri cumbi ryubatswe na Wilderness Safaris ryafunguwe mu Ukuboza 2018, ricungwa n’inzobere mu by’amacumbi muri Afurika y’Amajyepfo n’iy’Uburasirazuba.

Iri cumbi ry’ibyumba bitandatu byo gukambikamo, ryubatswe n’amahema, rikagira restaurant n’aho kuruhukira umuntu yicara yitegeye ubwiza bw’ikiyaga.

Aha hantu hihariye muri Pariki y’Akagera, abahakambitse bazajya babasha kwirebera ubwiza bw’inyamaswa amanywa n’ijoro, batemberejwe mu modoka cyangwa mu bwato.

Ikiyaga cya Rwanyakazinga cyubatsweho Magashi Camp, cyihariye ku mvubu nini muri Afurika, ingona ndende n’izindi nyamaswa zitandukanye mu gishanga kigikikije.

Imiterere y’imbere muri iri cumbi rigezweho n’imitako ihatamirijwe irimo iy’imigongo, ni iyo mu muco nyarwanda.

Abakunda koga, barisanzura muri piscine yabagenewe. Ibi bituma umunezero uba ari wose ku wagendereye Pariki y’Akagera, ifite inyamaswa eshanu zikomeye muri Afurika arizo intare, ingwe, inzovu, imbogo n’inkura.

Uri muri Pariki y’Akagera kandi ubona ibintu bitandukanye birimo amoko y’inyoni arenga 500.

Mu handi CNN yavuze heza ku Isi harimo Umujyi wa Washington, u Busuwisi, Kenya iherereye ku mugabane wa Afurika na Norvège.

Muri Gicurasi nabwo u Rwanda rwaje ku rutonde rwakozwe n’ikinyamakuru Business Insider, rugaragaza ahantu heza buri wese ufite amafaranga arimo gusura mu mwaka wa 2019, akaba yizeye kuba yahagirira ibihe byiza.

Ni urutonde rwakozwe nyuma yo kugenzura ibirebana n’ibishya biri aho hantu, ibikwiye gusurwa bitarakendera, ibizagusigira urwibutso n’impinduka zikomeye mu buzima bwawe.

Magashi Camp yishimirwa cyane n'abakerarugendo
Abantu bashobora kuruhukira muri Magashi Camp bakihera ijisho ibyiza bitatse u Rwanda
Iri cumbi ryubatswe na Wilderness Safaris ryafunguwe mu Ukuboza 2018
Imvubu ni zimwe mu nyamaswa zikundwa cyane n'abakerarugendo
Imparage ziba zisanzuye muri Pariki y'Akagera
Inkura iri mu nyamaswa eshanu zikurura ba mukerarugendo benshi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
sezikeye 2019-06-11 11:13:29

Rwanda koko ni igihugu kiza cyane.Gifite isuku,umutekano usanga hake.Gifite parks,lakes,abantu beza bazi kwakira abanyamahanga (legendary hospitality),etc...
Gusa tujye twibuka ko isi izaba paradizo yose,ituwe n’abantu bumvira Imana gusa.Kubera ko ababi bose,bakora ibyo Imana itubuza,izabakura mu isi ku munsi wa nyuma nkuko bible ivuga.Niba dushaka kuzaba muli iyo paradizo,Yesu yasize adusabye kutibera mu gushaka ibyisi gusa,ahubwo tukabifatanya no gushaka Imana.

Kwamamaza