The Guardian yibajije impamvu ibihugu bikomeye bitaca amashashi, u Rwanda rwarabishoboye

0 19-02-2014 - saa 22:34, IGIHE

Bamwe mu baturage b’ibihugu byo mu burengerazuba bw’isi,nka Amerika n’uburayi bw’uburengerazuba, iyo bageze mu Rwanda bavuga ko batangazwa na byinshi bahabona, cyane cyane bavuga ko batungurwa n’isuku iharangwa bagereranyije n’ibindi bihugu bya Afurika bacamo, ndetse bakibaza uburyo u Rwanda nk’igihugu gito cyaciye mu kaga gakomeye nka Jenoside aricyo kibasha kubigeraho.
Umunyamakuru wigenga w’umunya-Canada witwa Emilie Clavel, yanditse inkuru mu kinyamakuru cy’Abongereza The Guardian, yibaza niba (...)

Bamwe mu baturage b’ibihugu byo mu burengerazuba bw’isi,nka Amerika n’uburayi bw’uburengerazuba, iyo bageze mu Rwanda bavuga ko batangazwa na byinshi bahabona, cyane cyane bavuga ko batungurwa n’isuku iharangwa bagereranyije n’ibindi bihugu bya Afurika bacamo, ndetse bakibaza uburyo u Rwanda nk’igihugu gito cyaciye mu kaga gakomeye nka Jenoside aricyo kibasha kubigeraho.

Umunyamakuru wigenga w’umunya-Canada witwa Emilie Clavel, yanditse inkuru mu kinyamakuru cy’Abongereza The Guardian, yibaza niba koko bidashoboka ko iwabo mu burayi na Amerika bataca ikoreshwa ry’amashashi burundu mu gihe igihugu nk’u Rwanda cyo cyabishoboye.

Mu nkuru ye ifite umutwe ugira uti: “Think you can’t live without plastic bags? Consider this: Rwanda did it” avuga ko mu ngendo zitandukanye, kuva ku mipaka yinjira mu Rwanda uhita utangira kubona impinduka n’itandukaniro hagati yarwo n’ibihugu bituranyi ndetse yewe n’ibihugu bya kure bidaturanye narwo.

Avuga ko mu Rwanda, Ikigo cy’igihugu cy’ibidukikije (Rwanda Environment Management Authority) -REMA, mu rwego rwo kubungabunga ibidukikije cyakajije ingamba mu guca amashashi, kuko abyangiza, bityo n’umunyamahanga ugeze ku kibuga cy’Indege cya Kigali, ahabwa amabwiriza yo gusiga amashashi ku mupaka cyangwa ku kibuga cy’indege, agahabwa ibyo gutwaramo ibyari biyarimo bitangiza ibidukikije.

Kubwe, u Rwanda ngo ni icyitegererezo mu bihugu bya Afurika ku isuku no kudakoresha amashashi, bituma habaho isuku ihoraho, usanga ahantu hose hacyeye hatari umwanda w’amashashi ku mihanda, cyangwa ngo ugende uyabona yaritsinditse ahantu runaka mu mashami y’ibiti, ahubwo bo ugasanga basukura hose ndetse n’imihanda igahora isukuye by’akarusho iyo ugeze mu murwa mukuru Kigali.

Icibwa ry’aya mashashi, ryatangaje cyane uyu munyamakuru wa The Guardian, risanzwe riri muri gahunda za Leta y’u Rwanda ndetse ryanatorewe itegeko kuva mu 2008 ritangira gukurikizwa ku buryo n’umunyarwanda wese iyo agerageje kureba akibuka mbere y’icyo gihe, ahita abona ko hari byinshi byahindutse mu buryo amashashi yatezagamo umwanda none ubu hakaba hashobora gushira igihe kinini Umunyarwanda atabonye ishashi yahoze aricyo gikoresho gihahirwamo cyane, ariko ubu ikaba yarasimbujwe ibindi bikoresho bikoze mu mpamuro cyangwa ibikapu bisanzwe bitangiza ibidukikije.

Uyu munyamakurukazi, mu nyandiko ye avuga ko asanga n’ibindi bihugu byo mu burengerazuba bw’Isi, ndetse n’ibindi byose byakwigira ku Rwanda bakajya bakoresha neza amashashi atabangirije ikirere n’ibidukikije, akaba yabyazwamo ibindi bikoresho (recycling), nk’uko mu Rwanda babigezeho.

Ati:“Mu Rwanda bashishikariza abikorera ku giti cyabo kugira inganda zirimo n’izitunganya amashashi yakoreshejwe mu rwego rwo kurinda no kubungabunga ibidukikije n’iyangirika ry’ikirere.ˮ

Asoza inyandiko ye yibaza ukuntu niba igihugu nk’u Rwanda kidafite ubushobozi buhambaye mu mikoro cyarabashije gutora itegeko nka ririya kikanaryubahiriza, biramutse bikozwe mu bihugu bikomeye ho byagenda gute. Akemeza ko ikibura gusa muri ibyo bihugu abona ari ubushake bwa politiki naho ubundi nabo babasha guca ayo mashashi hitawe ku ngaruka mbi agira ku bidukikije ntiharebwe gusa inyungu z’amafaranga ngo birirwe baca imisoro myinshi abayakoresha.

Emilie Clavel, ni umunya-Canadakazi wiyemeje kuba umunyamakuru wigenga (Freelance Journalist) ndetse akaba akunda gutembere cyane, aho mu 2013 yose yayimaze atembere mu bihugu bitandukanye biri mu burasirazuba bwa Afurika, ubu akaba aba i Londre mu Bwongereza, aho ari gukorana n’ikinyamakuru The Guardian. Avuga ko yatunguwe cyane n’uburyo mu Rwanda ibintu byihariye cyane isuku yaho no kwita ku bidukikije.

Video ya France 24 igaragaza uko kugeza mu Kwezi kwa Mata umwaka wa 2013, guca ikoreshwa ry’amashashi byari bihagaze mu Rwanda. Kanda muri izo nyuguti z’ubururu.

Igihugu kidafashe ingamba ku guca ikoreshwa ry'amashashi wasanga byabye nka gutya aho ukandagiye hose (ndetse n'ibinyabuzima by'agasozi bikahangirikira)
Uretse n'amashashi, kuba wabasha kubona undi mwanda uwo ariwo wose mu mihanda y'i Rwanda ubu ntibyoroshye
Guhahira mu mashashi nk'aya byahoze ari umuco wa buri Munyarwanda mu myaka itanu ishize, ariko ubu ntabwo wapfa kubibona mu gihugu

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza