IGIHE

Minisitiri Biruta yashimangiye umugambi wo guca ibikoresho bya pulasitiki byifashishwa rimwe

5 29-05-2018 - saa 16:11, Ferdinand Maniraguha

Minisitiri w’Ibudukikije, Dr Biruta Vincent, yatangaje ko bimwe mu bikoresho bya pulasitiki bikoreshwa rimwe nk’imiheha n’udukombe bizacibwa mu kurengera ibidukikije.

Yabitangaje kuri uyu wa Kabiri ubwo hatangizwaga icyumweru cyahariwe kurengera ibidukikije kizasozwa, ku wa 5 Kamena hizihizwa umunsi mpuzamahanga w’ibidukikije.

Hashize iminsi mike Minisiteri y’ibidukikije n’ibigo biyishamikiyiho ndetse na Minisiteri y’ubutabera zitangaje ko nta cupa rya pulasitiki rizongera kugera mu biro cyangwa mu nama zayo.

Ahanini amacupa y’amazi n’imitobe ku isoko ry’u Rwanda bipfunyikwa mu bikoresho bya pulasitiki.

Pulastiki ifatwa nka kimwe mu bihumanya isi, by’umwihariko ubutaka n’amazi yo mu nyanja.

Buri mwaka toni umunani za pulasitiki zijugunywa mu nyanja. Loni igaragaza ko hatagize igikorwa mu 2050, pulasitiki mu nyanja zizaba ziruta amafi arimo.

Mu kiganiro n’abanyamakuru cyo ku wa 29 Gicurasi 2018, Minisitiri Biruta yasobanuye ko hari bimwe mu bikoresho bya pulasitiki bikoreshwa kandi hari ubundi buryo bwakwifashishwa, bikaba ari ngombwa kubicika.

Yagize ati “Hari bimwe tubona ko dushobora kureka ntibigire icyo bitwara. Nk’imiheha ya pulastiki imaze gukwira hose kandi ugasanga twayifashe tuyishyira no mu kirahuri twashoboraga kunywesha. Dutekereza ko dushobora kuyireka ntibigire icyo bitwara. Hari udukombe banywesha rimwe bakajugunya ndetse n’aya macupa tunywesha rimwe tukajugunya, hari andi macupa yakoreshwa na buri wese kandi agakoreshwa kenshi.”

Icyakora Dr Biruta yavuze ko nk’amacupa ya pulasitiki batagiye guhita bayaca burundu ahubwo ngo bagiye kuyagabanya mu gihe hagishakishwa ikiyasimbura.

Ati “Amacupa ya pulasitiki ntabwo twayaciye ahubwo turashaka kuyagabanya kubera ko aho tugiye hose uyu munsi haba mu nama, mu bukwe buri wese bamuha agacupa k’amazi cyangwa umutobe noneho ugasanga twabujugunye aho. Impamvu tutayakuraho burundu ni uko hagomba gushakwa ibisubizo by’ibyo binyobwa byabaga muri aya macupa.”

Hari itegeko rishya riri gutegurwa rizagenga imikoreshereze ya pulastiki mu gihugu rishobora kugezwa mu nama y’abaminisitiri muri Kamena uyu mwaka. Bikekwa ko riyo tegeko rizaba ririmo n’ibihano ku bifashisha bimwe mu byakozwe muri pluasitiki.

Biruta yavuze ko nubwo amacupa n’ibindi bikoresho bya pulastiki byacibwa burundu atari kuri byose nk’uko hari bimwe mu bikoresho bicyemerewe kuza bipfunyitse mu mashashi kandi yaraciwe.

Umuhuzabikorwa w’amashami ya Loni akorera mu Rwanda (One UN) Fode Diaye yagaragaje ko ingaruka za pulasitiki ari ikibazo kireba buri wese.

Yagize ati “Ingaruka za pulastiki mu butaka zishobora kugabanya umusaruro w’ubuhinzi ushobora kugera no kwiyongera kw’ibiciro kubera ko ibiribwa byabuze ku masoko, bikaza kuvamo imirire mibi […] Ibi ntabwo birangirira mu gushyiraho ingamba gusa ahubwo bigomba guhera mu baturage bagahindura imyumvire, guverinoma, sosiyete sivile, Imiryango itegamiye kuri Leta n’abikorera bakabigiramo uruhare.”

Minisitiri Biruta yatangaje ko kugeza ubu mu Rwanda nta bushakashatsi bwakozwe ku ngaruka za pulasitiki ku mazi yo mu Rwanda.

Inzego zishinzwe kurengera ibidukikije zivuga ko aho kwifashisha amacupa akoreshwa rimwe akajugunywa, hakoreshwa ubundi buryo burimo amacupa akoreshwa kenshi cyangwa ibindi bidakoze muri pulasitiki.

Kugeza ubu mu Rwanda hari inganda zirindwi zinagura ibikoresho bya pulastiki bigakorwamo ibindi cyangwa bigakorwa neza bikongera kwifashishwa.

Mu 2008 Leta y’u Rwanda yaciye ikoreshwa ry’amashashi inashyiraho itegeko rihana uzabirengaho, byatumye ruza mu bihugu 40 ku Isi byateye intambwe mu kurengera ibidukikije.

Minisitiri w’Ibudukikije, Dr Biruta Vincent, yasobanuye gahunda yo guca ibikoresho bya pulasitiki byifashishwa rimwe
Umuyobozi Mukuru wa REMA, Eng Colette Ruhamya (Ibumoso)
Umunyamabanga Nshingwabikorwa w'Inama y'igihugu y'abagore, Kamanzi Jackline
Harifuzwa ko mu biro no mu nama hashyirwamo za ‘water dispensers’ zizajya zivomwaho amazi yo kunywa n'ibikoresho bitari ibya pulasitiki
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Bizimana 2018-05-30 09:10:28

numva ahubwo ibyiza aruko hategurwa uburyo bwo kuyakusanye buhamye bugategurwa ninganda ziyakoresha noneho wenda urigaruye agahabwa nka 50f/ ku icupa agaruye akaba yatwikirwa nkahantu hafunganye kuburyo butangiza ikirere

2
x 2018-05-30 05:30:09

muzazenguruke mumirima y’abaturage ahenshi muzajya muyibonamo amashashi,ntetse nabyo biri mungaruka zo kubura umusaruro mubaturage muri ikigihe turimo na za pulasitike ziba zirimo.

3
mami 2018-05-29 16:51:46

Hari ababuze ibyo bakora. Isuku y’amazi y’amasukano n’ayo yitonderwe. Ni batange intsinzi y’in kangu n’imyuzure bamaze abantu bareke imikino.

4
Jay 2018-05-29 16:41:11

Mwiriwe neza.Njye mbona buriya ikibazo atari plastic cyangwa amashashi,ahubwo ikibazo ni uburyo bijugunywa cyangwa bikoreshwa bimaze gukoreshwa.Buriya icyo leta yashyiraho ni ubukangurambaga bw’uko ibyo bikoresho byakusanyiriza hamwe.Kubera ko nk’amashashi yakorwamo ibigega ndetse n’ibindi bikoresho dukenera.Ubundi abanyamahanga baradushutse,plastic bo baracyazikoresha ndetse bakazibyaza umusaruro.Ahubwo envelope zikorwa mu bipapuro zikomeje gutuma amashyamba atemwa ku bwinshi kandi zitanakorwamo ikindi kintu nyuma yo gukoreshwa.Icyo nasaba leta ni ugushyiraho ikipe igakora ubushakashatsi ku bubi bwa plastic batagendeye ku bwakozwe n’abazungu.Nizeye ko bizagaragaza ukuri kw’icyaduteza imbere.Umushinga ndawufite uwakenera ko musobanurira yanyandikira.

5
Theo man city 2018-05-29 14:09:24

Muraho, rwose aho nisawa ubwo mubitangaje mbere mukaba mugiye kubyigana ubushishizi. Congs Dr. V Biruta

Kwamamaza