Nyuma y’imyaka ibiri hatangijwe gahunda ya Eco-School mu Rwanda, gahunda yo gukundisha abanyeshuri kwita ku bidukikije; abanyeshuri ubwabo, abarezi n’ababyeyi baratangaza ko abanyeshuri ubu basigaye bita ku bidukikije nk’inshingano mu gihe kera benshi babikoraga nk’ibihano cyangwa se babihatiwe.
Eco Schools ni umwe mu mishanga 26 yatoranyijwe na Minisiteri y’Uburezi mu Rwanda MINEDUC ku nkunga ya DFID ugashyirwa mu bikorwa n’umuryango ARAMA ku bufatanye na FSDS mu rwego rwo guhanga udushya mu (...)

Nyuma y’imyaka ibiri hatangijwe gahunda ya Eco-School mu Rwanda, gahunda yo gukundisha abanyeshuri kwita ku bidukikije; abanyeshuri ubwabo, abarezi n’ababyeyi baratangaza ko abanyeshuri ubu basigaye bita ku bidukikije nk’inshingano mu gihe kera benshi babikoraga nk’ibihano cyangwa se babihatiwe.

Eco Schools ni umwe mu mishanga 26 yatoranyijwe na Minisiteri y’Uburezi mu Rwanda MINEDUC ku nkunga ya DFID ugashyirwa mu bikorwa n’umuryango ARAMA ku bufatanye na FSDS mu rwego rwo guhanga udushya mu burezi ngo hazamurwe ireme ryabwo. Watangijwe mu bigo by’amashuri 100 (20 yisumbuye na 80 abanza) by’icyitegererezo byo mu turere twa Kirehe, Ngoma, Gatsibo na Gicumbi. Ugamije gushishikariza abanyeshuri umuco wo gukunda no kwita ku bidukikije bakabikurana kandi bakabitoza ab’aho batuye bahereye iwabo mu ngo.

Kinishya High School ni kimwe mu bigo ijana byatanijwemo iyi gahunda ya Eco-Schools. Giherereye mu murenge wa Nyankenke, mu karere ka Gicumbi, ho mu Ntara y’Amajyaruguru y’u Rwanda. Ni agace kiganjemo amashyamba n’imisozi miremire ku buryo benshi mu bahatuye ushobora guhita ukeka ko bumva vuba ibyerekeranye n’ibidukikije.

Mu myaka ibiri ishize iki kigo cya Kinishya, cyo kimwe n’ahandi muri utu duce, harangwaga umwanda. Nta busitani bagiraga, nta ndabo, yewe nta n’ibindi bihingwa bitase ikigo bagiraga; hose hasaga nko mu bihuru. Abanyeshuri ntibari basobanukiwe akamaro ko gusigasira no kwita ku isuku. Urugero nko kugira ngo barindwe gukandagira mu twatsi, twafatwaga nk’ubusitani muri iki kigo, hashyirwagaho imigozi n’itsinga ku nkengero zatwo hakanatangwa ibihano bikarishye ku barenze kuri ayo mabwiriza, ariko bikanga bikaba iby’ubusa.

Cyo kimwe no mu bindi bigo byinshi bitaratangizwamo gahunda ya Eco-Schools mu Rwanda, muri Kinishya mu bihano munyeshuri wakoze amakosa yahabwaga hakundaga kurangwamo gukora mu busitani, ibi bikaba byaratumaga abanyeshuri bakura basa n’abazinutswe imirimo yose ijyanye no kwita ku busitani kuko babifataga nk’ibihano kuri bo.

Aba ni abanyeshuri biga kuri Mampfu High School ho mu Karere ka Gatsibo_ berekana ko basigaye bishimiye gukorera ubusitani

Kugira ngo bihinduke, bakimara guhugurwa ku nsanganyamatsiko icumi za Eco-Schools ari zo imirima n’ubusitani bw’ishuri, urusobe rw ibinyabuzima, imyanda ibora ijugunywa, ingufu, amazi, isuku n’isukura, ubuzima n’imibereho myiza, gutwara abantu n’ibintu, imyanda ijugunywa ishobora gukorwamo ibindi bintu, kwita ku butaka bw’ishuri no kububyaza umusaruro, abayobozi b’iki kigo batangiye gusobanurira abanyeshuri ko bakwiye kugira uruhare mu kubungabunga ibidukikije ndetse banatangira kubibatoza gahoro gahoro bagendeye ku ngingo 7 zishingirwaho mu ishyirwamubikorwa rya Eco-School.

Robert Muvunangabo, umuyobozi wo mu kigo cya Gatore High School, ho mu burasirazuba bw’u Rwanda, kimwe mu bigo ijana byatangijwemo iyi gahunda we asobanura ko Eco-School yagize uruhare runini mu guhindura imyumvire y’abanyeshuri bitewe n’uko yagiye ihuzwa n’amasomo bahabwa. Agira ati “Iyo twigisha abana amabara dusigaye twifashisha indabo n’imboga, tugakoresha izifite amabara atandukanye mu zo twahinze tukaziberekeraho kandi ubu batwereka ko ari bwo bahita babyumva neza kurusha mbere. Iyi gahunda yadushoboje kubona imfashanyigisho ku buryo bworoshye”.

Nk’uko Nelson Mandela, ufatwa nk’intwari wahoze uyobora igihugu cya Afurika y’Epfo yabivuze ati “Uburezi ni intaro ikomeye wakoresha mu guhindura isi”, ubu abanyeshuri bo muri Kinishya High School bahinduye ku buryo bugaragara binyuze mu kuba barabyigishijwe. Nabo ubwabo bivugira ko kera bumvaga ko isuku no kwita ku busitani yari imirimo ireba gusa abakozi b’ikigo, ariko ko nyuma y’iyi gahunda ya Eco-Schools basobanukiwe ko ari inshingano zabo kandi ko nabo bagomba kugira uruhare mu gutuma ikigo cyabo kirushaho gusa neza.

Umwe witwa Evariste Mudaheranwa, w’imyaka 20, wiga mu mwaka wa gatandatu muri aha muri Kinishya High School agira ati “Mbere abanyeshuri ubundi byaba gutera indabo cyangwa gusukura ikigo twabibonaga nk’abari kubihatirwa, ariko ubu iyi gahunda ya Eco-School yatumye tubyiyumvamo kuko twamenye akamaro ko gusukura ikigo. Dore ubu n’aka kayira kazamuka nitwe twakihangiye ubwacu; twamaze gusobanukirwa neza ko kwita ku bidukikije ari twe ba mbere bifitiye akamaro, urugero ubu turya ibyo twihingiye”.

Ukinjira muri iki kigo, ubusanzwe cyari kimeze nk’ishyamba, usanganirwa n’ubuhuheri buturuka mu mahumbezi y’ubusitani butatse ikigo cyose. Uko ugenda wegera amashuri n’ibiro by’abayobozi uryoherwa no gukomeza kureba ubwiza bw’ubu busitani bugizwe n’indabyo zitewemo imboga ziribwa kuko basobanura ko bamaze kumenya ko ubusitani bugomba no kuvangwamo ibiribwa.

Aha ni mu kigo cya Kinishya_ ubu gitatswe n'ubusitani burimo imboga ziribwa, hagakorwa n'ibishushanyo mu kwigisha abana binyuze mu bidukikije

Kuva winjiye kugeza usohotse ikigo cyose gitatswe n’isuku, aho abanyeshuri basobanura ko bamaze gucengerwa n’umuco wo kutajugunya imyanda aho babonye hose hatari mu ngarani zabugenewe zigiye ziri mu metero nke-nke mu kigo.

Mu guhuza iyi gahunda n’amasomo, iki kigo cyagiye gikora ubusitani buteye mu bishushanyo byigisha, urugero nk’aho bashushanyije ikarita ya Afurika ahandi bagatera amashu n’izindi mboga ku mirongo, ku ruziga, kare, urukiramende, mpandeshatu n’ibindi.

Uretse kunguka ubumenyi aba banyeshuri batangije gahunda yo kwinaza imboga iwabo mu biturage, bafatiye urugero ku mashuri yabo.

Yvonne Tumukunde, w’imyaka 20, agira ati “Muri siyanse ibijyanye no kubangurira ibiti twabyeretswe kuri izi ngemwe za avoka tujya no kuzitera iwacu kandi n’abandi banyeshuri bo mu bigo duturanye nabo baza kwigira hano iwacu. Twarafungutse cyane kuko twamenye uko tugomba guhindura ikigo cyacu cyiza tukanabiheraho n’iwacu tuhagira heza.”

Ku ruhande rw’ababyeyi barerera muri iki kigo nabo batanga ubuhamya ko abana babo bagiye babahindura imyumvire bagatangira no guhinga uturima tw’igikoni iwabo bafatiye ingero ku ishuri. Basobanura ko ubu nta mubyeyi utarahinze avoka, n’izindi mboga abyigishijwe n’umunyeshuri. Maritha Uzamukunda, w’imyaka 50, umwe mu babyeyi barerera muri iki kigo agira ati “Mbere nta suku yari imeze gutya yari ihari, ariko ubu habaye ahantu heza cyane ku buryo n’abandi bantu bajya baza kuhigira uko bakwita ku isuku. Ikindi izi mbuto natwe twagiye tuzizanirwa n’abana bacu barabitwigisha ubu twaziteye iwacu zimwe turasaruye. Ababyeyi bandi usanga bifuza kurerera muri iki kigo cyiza cya Kinishya kuko hose bagifata nk’intangarugero.”

Kwita ku bidukikije by’iki kigo ntibishimwa gusa n’abaharerera ahubwo n’inzego z’ubuyobozi bw’aka kagari bwasabye inzego zindi zirimo insengero, utugari, ibigo bya leta, amagereza n’abandi kuza kwiga uko bakora ubusitani iwabo.

Emmanuel Nsengimana, umuyobozi w’iki kigo cya Kinishya agira ati “Ibindi bigo by’amashuri birimo Rusasa Primary School, Cyankaranka Primary School, G.S Kibogo, G.S. Rwagihura, G.S. Miyove, G.S. Kibari, GS. Byumva Inyange, G.S Kizinga n’ibindi byaje kudusura ubu nabyo twatangiye kubitoza uko byakora ubusitani bwiza. Hari n’utugari two muri uyu murenge natwo ubu twatangiye gukora ubusitani n’izindi nzego zaba bwite n’iza Leta zagiye zitangira iyi gahunda nyuma yo kudusura zikatwigiraho”.

Iki kigo giteganya gukora ibindi bikorwa biri mu nsanganyamatsiko icumi za Eco-School mu kwita ku bidukikije, nk’uko Nsengimana abivuga agira ati “Ubu turi kwiga uko twatangiza icyuzi tugatangiza ubworozi bw’amafi. Turateganya no korora inkwavu mu rwego rwo kwita no kubungabunga urusobe rw’ibinyabuzima.”

Kuba abanyeshuri barahinduye imyumvire ku bijyanye n’ibidukikije, ubu bakaba ari bo musemburo wo gutera imbuto iwabo mu biturage bagatoza n’ababyeyi babo ko bakwiye kugabura indyo yuzuye ni umusaruro ufatika gahunda ya Eco-School yazanye mu burezi bw’u Rwanda. Ikwirakwijwe hose byarushaho gufasha u Rwanda rw’ejo rugakura rukunda ibidukikije bitari kubibwirwa gusa, ahubwo no mu bikorwa byabo bityo bakaba imbarutso y’iterambere rirambye.

Kera gukorera ubusitani n'indi mirimo y'amaboko nk'iyi yahabwaga abanyeshuri nk'igihano kimwe mu byatumaga abanyeshuri batabikunda
Patrice Nsengiyumva, umuyobozi wa FSDS ishyira mu bikorwa gahunda ya Eco School asobanurira abanyeshuri akamaro ko kwita ku bidukikije
Abanyeshuri bahinduye imyumvire ku bijyanye n'ibidukikije, aba ni abari gukorera akarima k'igikoni
Abanyeshuri bagaragaza ko bishimiye umusaruro n'ubumenyi bakuye muri gahunda ya Eco-School, uyu ni MASENGESHO Samusoni, w'imyaka 18 wiga kuri Gasange High School ho mu karere ka Gatsibo


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2015 ©. All rights reserved