Mu mihigo y’uyu mwaka wa 2013/2014,Akarere ka Kamonyi kiyemeje kugira nibura Biyogazi imwe yubatswe muri buri Kagari.
Ubuyobozi bw’aka karere bwagaragaje ko uyu mwaka ugiye kurangira urangira hubatswe Biyogazi 59 nshya zikaza ziyongera ku zindi zigera kuri 70 zari zisanzwe.
Ibi byagaragajwe ubwo aba bayobozi basuraga umuryango wa Benilde Uwitugabiye, utuye mu Mudugudu wa Nyenge Akagari ka Bugoba mu Murenge wa Rukoma, wamaze kwiyubakira Biyogazi tariki 15 Gicurasi 2014.
Uwitugabiye (...)

Mu mihigo y’uyu mwaka wa 2013/2014,Akarere ka Kamonyi kiyemeje kugira nibura Biyogazi imwe yubatswe muri buri Kagari.

Ubuyobozi bw’aka karere bwagaragaje ko uyu mwaka ugiye kurangira urangira hubatswe Biyogazi 59 nshya zikaza ziyongera ku zindi zigera kuri 70 zari zisanzwe.

Ibi byagaragajwe ubwo aba bayobozi basuraga umuryango wa Benilde Uwitugabiye, utuye mu Mudugudu wa Nyenge Akagari ka Bugoba mu Murenge wa Rukoma, wamaze kwiyubakira Biyogazi tariki 15 Gicurasi 2014.

Uwitugabiye yavuze ko gukoresha ingufu za biyogazi ari igisubizo kirambye kuri we n’umuryango we, kuko takakigorwa no kubona inkwi zo gutegura amafunguro.

Yagize ati "Cyari ikibazo gikomeye kugira ngo tubone inkwi zo guteka, cyane ko n’amashyamba bigaragara ko yagabanutse. Ubu nta kibazo tukigira duteka kuko dufite uburyo bwiza bwo gutegura ibyo kurya”.

Uretse guteka, uyu mubyeyi yemeza ko Biyogazi yabafashije mu birebana n’isuku kuko itagira umwotsi, ndetse n’ibikoresho watetsemo ntibishobora kwandura ubusa; usanga bikeye cyane. Kuri we Biyogazi bayifashisha no mu gushariza telefoni.

Solange Muhimpundu, Umukozi ushinzwe ubuhinzi ari nawe ukurikirana ibikorwa by’iterambere muri uyu Murenge, yavuze ko Biyogazi izafasha abayobozi mu ngamba zo kurengera ibidukikije hirindwa iyangizwa ry’amashyamba.

Muhimpundu yongeyeho ko kubaka no gutunga biyogazi byoroshye, ariko bikaba bisaba kuba nibura woroye inka kuko amase ari yo akoreshwa mu gutunganya izo ngufu.

Icyo umuturage asabwa ni ukugura ibikoresho by’ibanze bitwara nibura amafaranga y’u Rwanda ibihumbi 300, Leta nayo ikongeraho ubundi bufasha burimo gushaka no guhemba umutekinisiye wo gukurikirana ibikorwa kugeza biogas itangiye gukora.

Uyu mukozi yemeza kandi ko ibisigazwa bituruka ku Biyogazi, bivamo ifumbire nziza cyane, yafasha mu kongera umusaruro.

Ingufu za Biyogazi, ni kimwe mu byo Leta y’u Rwanda ikomeje gushishikariza abaturage kugira ngo babashe kubona ibisimbura ibicanwa byifashishwaga mu gutegura amafunguro hanagamijwe kurengera ibidukikije.

Faustin NTAKIRUTIMANA/ Ushinzwe Itangazamakuru mu Karere ka Kamonyi


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2015 ©. All rights reserved