IGIHE

Ibiteye amatsiko ku rugendo n’amateka bya Richard Kandt mu Rwanda

4 17-08-2019 - saa 08:18, Evariste Nsengimana

Dr Richard Kandt, umuvumbuzi uzwi cyane mu mateka y’Akarere ka Afurika y’Iburasirazuba, yageze mu Rwanda mu 1898 aje mu bikorwa by’ubushakashatsi birimo gushakisha isôoko y’uruzi rwa Nile.

Nubwo avugwa cyane muri Afurika y’Iburasirazuba, amateka ye azwi cyane mu Rwanda rw’imisozi 1000 ruri mu bihugu yazengurutse igihe kirekire.

Yinjiriye mu Burasirazuba bwarwo, agera mu Majyaruguru, mu Burengerazuba, mu Majyepfo ahingukira i Kigali agirwa Rezida warwo ku ngoma y’Abakoloni.

Urugendo rwe kuva mu Budage kugera muri Afurika ntabwo rwose iyi nkuru igiye kuruva imuzi, iragaruka cyane ku guhera yinjiye mu Rwanda kugeza arusohotsemo, by’umwihariko inzira yanyuzemo n’amateka yahasize.

Uyu mugabo wari umusirikare, akaba n’umuganga wavukiye mu Mujyi wa Posen muri Pologne mu 1867, yagiriye bihe bitandukanye mu Rwanda, amateka ye arigishwa hirya no hino ku Isi, ndetse aho yanyuze mu Rwanda ni hamwe mu duce nyaburanga dukurura abakerarugendo.

Amateka agaragaza ko mbere y’uko aza muri Afurika Dr Kandt yakunze gusoma cyane ibitabo bivuga ku mateka n’umuco byayo, ndetse ajya no kwiga ururimi rw’igiswahile i Berlin mu Budage.

Ibyo byamufashije kuza mu Rwanda akurikiye abazungu ba mbere bahageze b’Abadage, Von Gotzen na Dr Oscar Baumann. Urugendo rwe yinyira muri Afurika yarutangiye mu 1897 afite imyaka 30, aje mu bikorwa by’ubushakashatsi ku giti cye.

Ibitabo yanditse bigaragaza ko muri Afurika y’Iburasirazuba yageze i Dar-es-Salaam yinjiriye Zanzibar muri Tanzania mu 1897, ahamara amezi hafi atatu ategura urugendo rwe, yifuzaga kugera mu Rwanda.

Icyo gihe ngo yaje yitwaje imodoka zikururwa [Rumoroki] zisaga 140, abayobora mukerarugendo batatu, abasirikare batanu n’abagaragu barindwi n’ibindi byari kumufasha muri gahunda ye.

Kuwa 7-10 Kanama 2019, Umunyamakuru wa IGIHE kimwe n’abafite ibigo bifasha ba mukerarugendo mu Rwanda, basuye ibice bitandukanye bigaragaza inzira Dr Richard Kandt yanyuzemo mu Rwanda.

Uru rugendo ikigo gishinzwe Ingoro z’Umurage w’u Rwanda n’Umushinga w’Abadage wita ku iterambere (GIZ) byabageneye, hagamijwe gutangiza inzira nshya y’ubukerarugendo bushingiye ku muco n’amateka.

Umushakashatsi mu kigo cy’igihugu cy’ingoro z’Umurage, Mugabowagahunde Maurice, yabwiye IGIHE ko Dr Kandt yinjiye mu Rwanda mu 1898 aturutse i Burundi, mu rugendo rugamije gushakisha isôoko nyakuri y’uruzi rurerure ku Isi, rwa Nile.

Uyu mugabo ngo yinjiriye ku kiyaga cya Rweru , ubu ni mu Karere ka Bugesera, akomereza mu bice bitandukanye by’igihugu.

Mugabowagahunde yasobanuye ko kugeza uyu munsi hari uduce tugera ku 10 Kandt yasizemo amateka ariko hari utw’ingenzi dusurwa n’abakerarugendo umunsi ku wundi.

Ati “Yazengurutse igihugu cyose, yinjira mu gihugu yahereye mu Bugesera ku kiyaga cya Rweru, akomereza ku Kagera aho umugezi wa Nyabarongo uhurira n’Akanyaru arimo gushakisha isôoko ya Nile.”

Asobanura ko Dr Kandt yakomereje i Gatagara hafi y’i Bwami agiye kumenyesha umwami ko ari mu gihugu, ajya gushaka isôoko ya Nile, amaze kuyibona akomereza mu Majyaruguru gupima ibirunga, ahasanga Inkima zifite ibara rya zahabu.

Yakomereje ku Gisenyi ahamara iminsi itatu, urugendo rwe rukomereza ku nkengero z’ikiyaga cya Kivu aho yaje gutura i Shangi yise ku murwa w’amahoro, ubu ni mu Karere ka Nyamasheke, ashushanya ikarita ya Kivu, ahava aza gutura i Kigali, ubwo yagirwaga Rezida.

Uko yaharuye inzira y’ubukerarugendo

Mu Birunga

Pariki y’Ibirunga iherere mu Majyaruguru y’igihugu, Dr Richard Kandt yayivumbuyemo Inkima[Golden Monkies], zifite ibara rya zahabu, azandikaho inyandiko nyinshi ndetse zihabwa izina ry’ubushakashatsi rya ‘Cercopithecus kandti.

Uyu munsi ni zimwe mu nyamaswa zitangaje zikunzwe n’Abakerarugendo mu Rwanda.

I Shangi

Nubwo uyu munsi habaye mu itongo, i Shangi mu Karere ka Nyamasheke ni hamwe mu duce nyaburaganga dufite amateka akomeye y’u Rwanda ndetse dusurwa n’abakerarugendo.

Ku wa 24 Werurwe 1899 nibwo Dr Richard Kandt yahubatse inzu y’ibyatsi, ayituramo akajya ayikoreramo ibikorwa bye by’ubushakashatsi. Nyuma yo kuzenguruka ikiyaga cya Kivu, niho yicaye ahashushanuriza ikarita yacyo.

Muri uru rugo habereye imishyikirino itandukanye hagati y’Abadage n’Ababiligi, igamije kumvikana uburyo bigabanya u Rwanda na Congo.

Muri uru rugo kandi niho Abamisiyoneri ba mbere bari baturutse i Burundi bacumbitse bagiye kugisha inama Kandt y’uko ibikorwa byabo byazatanga umusaruro, abagira iyo kubanza kwiyegereza umwami. Aha ni naho hasomewe misa ya mbere y’Abazungu.

Nyungwe

Uyu mugabo yaturutse i Burayi afite intego yo kuvumbura isôoko nyakuri ya Nile nyuma y’imyaka 40 umwongereza John Speke atangaje ko ikomoka mu kiyaga cya Victoria muri Uganda ariko ntiyanyurwa, yiyemeza gukurikirana imigezi yose iroha muri icyo kiyaga akareba uturuka kure kurusha iyindi.

Ubushakashatsi bugaragaza ko Dr Kandt yavumbuye Isôoko ya Nile mu ishyamba rya Pariki ya Nyungwe hagati ya Nyakanga na Kanama 1898 nyuma y’Ukwezi ageze mu gihugu, ahasiga ikimenyetso cy’uko ariyo Isôoko ya kure mu migezi yiterateranya ikawubyara.

Iyi pariki iri mu ishya kimeza ry’inzitane rigizwe n’ubwoko bw’ibiti 250, ibimera 1068, inyamaswa 84 n’inyoni 299 burimo 27 bw’umwihariko mu Karere, ibarizwamo isôoko Nile ku bwa Richard Kandt ni imwe mu bice nyaburanga cyane bisurwa cyane mu Rwanda. Ibi yaje kubihererwa n’igihembo nk’umuntu w’intwari ubwo yari asubiye iwabo mu 1902.

Rubavu

Mugabowagahunde yasobanuye ko Dr Richard Kandt yageze ku Gisenyi, ubu ni mu Karere ka Rubavu ari mu bushakashatsi bwo gupima ikiyaga cya Kivu, ndetse yubaka inzu y’ibyatsi ahazwa ku izina rya Tamu Tamu ariko iyo nzu yaje gusenywa. Muri uyu mujyi uhana imbibi na RDC, niwe wahubatse ibiro by’iposita.

Aka gace gakunda gusurwa n’abakerarugendo cyane bitewe n’amateka gafite arimo n’indake zacukuwe n’abasirikare b’u Budege mu gihe cy’intambara ya mbere y’Isi, Labolatwari y’amatungo yubatswe n’Abadege n’imva y’umusirikare w’umudage wahapfiriye.

Kigali

Dr Kandt wabaye igihe kirekire mu bikorwa by’ubushakashatsi i Shangi, nyuma akaza gusubira mu Budage, agarutse mu Rwanda yakomeje ibikorwa by’ubushakashatsi ariko aza no kugirirwa icyizere, agirwa Rezida w’u Rwanda, ahita yimukirayo akazwi nk’Ingoro yo kwa ‘Richard Kandt’.

Iyi nzu ifatwa nk’imwe mu zigezweho zimaze igihe kirekire mu Rwanda, ni imwe mu zisurwa cyane n’abakerarugendo, inihariye ku amateka yaranze Abadage n’Abanyarwanda.

Mu 1913, Dr Kandt yiyemeje gusubira mu Budage kubera impamvu z’uburwayi ntiyongera kugaruka mu Rwanda. Nyuma intambara ya mbere y’Isi yahise itangira yasize u Rwanda rukuwe mu maboko y’Abadage.

Muri iyo ntambara Kandt yari umuganga w’ingabo z’Abadage aho yaje gupfa ku wa 29 Mata 1918 azize ibyuka bihumanya yatewe ku wa 2 Nyakanga 1917.

Abakorera ibigo biyobora ba mukerarugendo bahasuye ngo bajye bahajyana ababyifuza
Bageze mu ishyamba rikikije Pariki ya Nyungwe bagiye ku isooko ya Nile
Gusura birangiye bafashe ifoto y'urwibutso n'abashinzwe kurinda inyamaswa
I shangi hakingishwa iminyururu ariko hari n'icyuma bahondaho kugira ngo baze kugukingurira
Ifoto y'inzu Kandt yari yarubatse i Shangi nayo iri ku rukuta
Imiterere y'igishanga kivamo amazi y'isooko ya Nile
Inkima iri mu bushoroshori yitegereza abantu nabo bayireba
Inkima zifite ibara rya zahabu zigaragara mu bice by'ishyamba ry'Ibirunga
Inzu zisigaye ku itongo kwa Kandt i Shangi zubatswe ku bw'Ababiligi
Isooko ya Nile yavumbuwe na Kandt muri Nyungwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kalisa 2019-08-19 00:59:15

Umwanditsi w’inkuru yakagombye no kuvuga ko Richard Kandt ariwe wabaye UMUKORONI WA MBERE mu Rwanda ko kandi yakoronije Abanyarwanda. Ijambo rezida ntirisobanura neza ngo abantu bamenye icyo yari ishinzwe. Yaje ari mu bushakashatsi abategetsi be babona ko yashobora no gutegeka. Yagizwe igikoresho cy’ikibi ku nyoko muntu.

2
HITAYEZU 2019-08-18 14:50:28

UKURI TUZAKUMENYA GUTE KO ABARUNDI BAVUGA KO ISOKO YA NILE IRI IWABO?????

3
Apollo Jays 2019-08-17 03:39:48

Ushaka kumenya neza amateka ya Rishari Kanti yasoma agatabo kitwa Rishari Kanti,rezida wa mbere w’u Rwanda kaboneka kuri Sainte famille no kuri museum yo mu Gakinjiro ahazwi nko kwa Rishari Kanti

4
Apollo Jays 2019-08-17 03:39:48

Ushaka kumenya neza amateka ya Rishari Kanti yasoma agatabo kitwa Rishari Kanti,rezida wa mbere w’u Rwanda kaboneka kuri Sainte famille no kuri museum yo mu Gakinjiro ahazwi nko kwa Rishari Kanti

Kwamamaza