IGIHE

Ellen DeGeneres yashyize mu cyamunara inkweto ashaka inkunga yo kubaka ikigo mu Rwanda

2 23-04-2019 - saa 20:28, Muvunyi Arsène

Umunyarwenya Ellen DeGeneres yashyize mu cyamunara inkweto kugira ngo akusanye amafaranga yo kubaka ikigo kizita ku ngagi zo muri Pariki y’Ibirunga mu Karere ka Musanze.

DeGeneres ni umugore w’imyaka 61 wamamaye muri Leta Zunze Ubumwe za Amerika kubera ikiganiro cyamwitiriwe kuri Televiziyo kizwi nka ‘The Ellen DeGeneres Show’.

Kuri uyu wa Kabiri izi nkweto zashyizwe ku rubuga rwa interinet rwa eBay rugurirwaho ibicuruzwa bitandukanye. Rufite amabara y’umweru n’umukara, mu ruhande rwayo hashushanyijeho ingagi naho ku mupira handitseho “Ellen DeGeneres Wild Life Fund”.

Amafaranga azava muri iyi cyamunara yose azashyirwa mu kigega Ellen DeGeneres yatangije kigamije kubaka icyicaro cy’ikigo ‘Ellen DeGeneres Campus’, kibungabunga ingagi zo mu birunga mu Rwanda.

Iki kigo cyatangiye kubakwa mu Kinigi mu Karere ka Musanze ni impano Portia de Rossi yahaye DeGeneres bashyingiranwe bahuje ibitsina, ubwo yuzuzaga imyaka 60 y’amavuko.

Iki kigo kizunganira ibikorwa bisanzwe bikorwa n’Ikigega cyitiriwe Diana Fossey, bigamije gushyigikira intego za Leta y’u Rwanda mu kubungabunga ibidukikije n’umutungo kamere.

Ellen DeGeneres Campus niyo izaba irimo ibiro by’ ikigega Dian Fossey Gorilla Fund kimaze imyaka isaga 50 gikorera mu Rwanda binyuze mu gashami kacyo gashinzwe ubushakashatsi ka Karisoke Research Centre mu Karere ka Musnze.

Kizaba kirimo laboratwari, ibyumba by’inama, ibyo kwigishirizamo n’inzu ndangamateka ivuga kuri Dian Fossey wishwe mu Ukuboza 1985.

Biteganyijwe ko ikigo gishya kizafungura imiryango ku mugaragaro mu ntangiriro za 2021, gitwaye miliyoni 10 z’amadolari.

Mu minsi ishize Ellen DeGeneres yateje mu cyamunara agapupe gakoze nk’ingagi umukunzi Portia De Rossi yakuye mu Rwanda. Icyo gihe bari bamaze gukusanya asaga miliyoni $5.

Inkweto Ellen DeGeneres yashyize mu cyamunara
Ellen DeGeneres arashaka inkunga yo kubaka ikigo mu Rwanda
DeGeneres n'umukunzi we biyemeje kubungabunga ingagi zo mu birunga mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
alpha 2019-04-24 00:06:14

ruhenze kubi $1,800,00

2
Dieudonne Hakizayezu 2019-04-23 16:08:15

Are! U Rwanda rugeze iwa Ndabaga ubwo rutangiye gufashwa n’abatinganyi ejo bazatangira gusaba ko itegeko rivugururwa nabo bakajya bashyingiranywa mu Rwanda! Toka Satani!

Kwamamaza