Impamvu ibishanga bya Kamiranzovu, Rugezi n’Akagera ari ntavogerwa mu Rwanda

0 10-02-2014 - saa 08:39, IGIHE

Mu Rwanda hari amoko atatu y’ibishanga: ibishanga bikomye, ibishanga bikoreshwa habanje gufata imigambi yo kubirengera, n’ibishanga byakoreshwa nta kibazo. Muri byo Kamiranzovu, Rugezi n’Akagera ntibyemerewe guhingwamo.
Dr. Rose Mukankomeje, Umuyobozi w’Ikigo cy’Igihugu cy’Ibidukikije - REMA (Environment Management Authority), mu mpera z’icyumweru gishyize hizihizwa umunsi mpuzamahanga w’ibishanga, yavuze ko igishanga cya Rugezi kiri mu bikomye, kandi nta wemereye kugihingamo kuko rimwe abaturage (...)

Mu Rwanda hari amoko atatu y’ibishanga: ibishanga bikomye, ibishanga bikoreshwa habanje gufata imigambi yo kubirengera, n’ibishanga byakoreshwa nta kibazo. Muri byo Kamiranzovu, Rugezi n’Akagera ntibyemerewe guhingwamo.

Dr. Rose Mukankomeje, Umuyobozi w’Ikigo cy’Igihugu cy’Ibidukikije - REMA (Environment Management Authority), mu mpera z’icyumweru gishyize hizihizwa umunsi mpuzamahanga w’ibishanga, yavuze ko igishanga cya Rugezi kiri mu bikomye, kandi nta wemereye kugihingamo kuko rimwe abaturage bigeze kugihingamo bituma umuriro w’amashanyarazi uba muke mu gihe amazi y’iki gishanga ari yo atanga urugomero rwa Ntaruka.

Yagize ati: “Ibishanga bitagira ibikorerwamo na mba bikomye ni igishanga cya Rugezi, icya Kamiranzovu n’icy’Akagera…”

Yavuze ko atari byo byonyine ariko ibi by’umwihariko ngo bigomba kuyungurura umwuka, amazi n’ingomero bikanatanga urusobe rw’ibinyabuzima bitandukanye biba bikenewe mu buzima bwa buri munsi bw’umuntu.

Igishanga cya Rugezi, giherereye mu karere ka Burera, usanga gikungahaye ku rusobe rw’ibinyabuzima birimo ibyatsi bitohagiye, hakiberamo amoko y’inyoni yitwa inceberi zitaboneka ahandi ku Isi kandi zikunzwe n’abakerarugendo, gitanga kandi amazi menshi akoreshwa mu rugomero rwa Ntaruka akanatanga umugezi wa Mukungwa.

Umuyobozi wa REMA yavuze ko igishanga cy’Urugezi, kigeze kwangirika amashanyarazi arabura cyane, bityo Leta imaze kugisana arongera araboneka.

Iki gishanga avuga ko ari umutungo kamere ufitiye igihugu akamaro, bityo abagituriye kuri ubu ntibakigihinga kuko kera wasangaga hanakorwamo ubuhinzi n’ubucukuzi bw’amabuye y’agaciro.

Igishanga cya Kamiranzovu giherereye mu karere ka Nyamasheke hagati muri Pariki y’Igihugu ya Nyungwe. Ni igishanga kigira amoko menshi y’inyoni, gitanga amazi menshi arimo nayisuka mu y’isoko ya Nili. Kinafite ubukungu bwinshi burimo ingufu za nyiramugengeri. Iki gishanga gifite kandi ibinyabuzima bitandukanye birimo n’amoko y’indabo za orchides zikunzwe n’abakerarugendo.

Igishanga cy’Akagera kiri mu Burasirazuba bw’u Rwanda. Kigizwe n’urufunzo rwinshi n’ibindi bimera, usanga kibamo amoko menshi y’inyoni atemberamo akanagera muri Pariki y’Akagera aho asurwa n’abakerarugendo. Iki gishanga gifite amazi yisuka mu Kagera akanatanga urugomero rwa Rusumo n’ibindi.

Igishanga cy'Akagera

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza