USA: Abanyarwanda batuye muri Indiana bakoze urugendo rwo kwibuka Jenoside yakorewe Abatutsi

0 22-05-2017 - saa 20:10, IGIHE

Mu mpera z’icyumweru gishize, Abanyarwanda batuye mu gace ka Midwest muri Leta ya Indiana na Michigan bakoze urugendo rwo kwibuha Jenoside yakorewe Abatutsi mu 1994.

Nubwo hari imvura y’umuvumbi itaravaga ku muryango, ntabwo byabujije abiganjemo urubyiruko gukora urugendo rwanyuze rwagati mu mujyi wa South Bend ho muri Leta ya Indiana, ku musozo w’uru rugendo hakaba hatanzwe ubutumwa, hasomwa amazina ya bamwe mu bazize Jesoside ndetse hacanwa n’urumuri rw’icyizere.

Nxumalo Louis Ruhaya uyobora Umuryango w’Abanyarwanda bibumbiye muri Diaspora ya Midwest, yashimiye bw’umwihariko urubyiruko rwateguye uru rugendo, yongera kandi kwibutsa akamaro ko kwibuka Jenoside yakorewe Abatutsi ku bifite akamaro ku kumenya ububi bwa jenoside mu guharanira ko itakongera kubaho ukundi.

Benson Ngarambe umwe mu batanze ubutumwa, yavuze ko kwibuka bizahoraho, yongera kwamagana yivuye inyuma abahakana Jenoside yakorewe Abatutsi. Yagize ati “ Abahakana jenoside bavuga ko itabaye, abavuga ko habaye jenoside ebyiri cyangwa se ababyita ayandi mazina, abo bantu nta bumuntu bafite kandi nta mwanya bashobora kuzabona.”

Yaba Rutsobe Nsengiyumva uyobora urubyiruko rw’Abanyarwanda bo muri Diaspora ya Leta Zunzwe Ubumwe za Amerika ndetse na Mihigo Christian watanze ubutumwa bw’icyizere bose bagarutse ku ruhare rwa buri wese mu kwibuka ndetse banagaruka ku cyizere n’iterambere Abanyarwanda bakwiye guharanira kugeraho.

Uretse uru rugendo rwo kwibuka kandi muri Leta ya Michigan mu mujyi wa Kalamazoo naho ku wa Gatandatu tariki ya 20 Gicurasi 2017, habereye igikorwa cyo kwibuka Jenoside yakorewe Abatutsi.

Uru rugendo rwo kwibuka muri Leta ya Indiana rutegurwa n’urubyiruko rw’Abanyarwanda batuye muri ako gace ku bufatanye n’ubuyobozi bwa Diaspora. Ni ku nshuro ya kabiri iki gikorwa kibaye, ariko kikaba kizakomeza mu myaka izakurikira.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza