IGIHE

U Bubiligi: Abanyarwanda baba Ottignies-Louvain-la-Neuve bibutse Jenoside yakorewe Abatutsi

1 22-04-2019 - saa 13:19, Karirima A. Ngarambe

Abanyarwanda batuye mu Bubiligi, abiga n’abize muri Kaminuza ya Louvain-la-Neuve n’inshuti zabo batuye mu mujyi wa Ottignies-Louvain-la-Neuve, bahuriye mu kwibuka ku nshuro ya 25 Jenoside yakorewe Abatutsi.

Iki gikorwa cyabaye kuwa 20 Mata, mu karere ka Louvain-la-Neuve, cyatangijwe n’igitambo cya misa, gikurikirwa n’urugendo rwo kwibuka rwatangiriye kuri Monument de la lutte contre l’intolérance, runyura mu bice bigize Université Catholique de Louvain rusorezwa kuri Place des Wallons 28 Salle du Placet.

Ambasaderi w’u Rwanda mu Bubiligi, Rugira Amandin n’umugore we, bitabiriye iki gikorwa ku butumire bwa Ibuka-Mémoire & Justice section Louvain la Neuve, n’abo bafatanyije kugitegura.

Kayitakire François wize muri Kaminuza ya Louvain, akaba n’umwe mu batangije igikorwa cyo kwibuka nyuma gato yaho jenoside yakorewe Abatutsi ihagarikiwe, yatanze ikiganiro cy’ukuntu byari bimeze muri iyo myaka ya 1995 na 1996, yishimira kuba ibyo bagerageje gukora icyo gihe byari bigoranye byaje kumvwa.

Ati “Twahuye n’ikibazo cyo kumvikanisha ibyari bimaze gukorwa iwacu ko ari jenoside kandi mu bayiteguye harimo bakanandika Manifeste y’Abahutu, harimo abize hano ndetse ari naho yandikiwe ikahacapirwa”.

“Abo twabwiraga ntibashakaga kutwumva kuko ntibiyumvishaga ukuntu abo bigishije ari abanyeshuri b’abahanga nka Vincent Ntezimana wari hano muri Université Catholique de Louvain mu ntangiriro za 1990”.

Yavuze ko ikindi cyatumaga batabyemera ari ukwanga ko bafatwa nk’abatanze uburere bubi.

Kayitakire yerekana ko nyuma y’imyaka 25 urubyiruko rugenda rutera ikirenge mu cyabo, akaba yifuza ko byakomeza abishwe ntibibagirane na rimwe kandi hakabaho ubutabera kuri barokotse.

Umunyamategeko akaba n’umunyamakuru, Ernest Sagaga, yavuze ko ‘itangazamakuru ari igikoresho gikomeye kandi cyica ibintu iyo kidakoreshejwe neza, cyakoreshwa neza nabyo bigafasha cyane’.

Kanzayire Liliane , umuhuzabikorwa w’itsinda ritegura ibikorwa byo kwibuka, yashimiye abitabiriye iki gikorwa avuga ko kwibuka ari inshingano z’abanyarwanda kuko iyo urebye imibare y’abishwe muri Jenoside yakorewe Abatutsi usanga iteye ubwoba kandi ubwo ntagushyiramo impinja abari batwite, n’abataramenyekanye, imibare yerekana ko hishwe :

Ati “Miliyoni imwe n’ibihumbi mirongo irindwi na bine na mirongo itanu na batanu, mu minsi ijana, 12.068 ku munsi cyangwa 502 ku isaha, bikaba abantu 8 buri munota, iyi mibare ikiyongera ku gufata ku ngufu no gushinyagurira abagore b’Abatutsi n’abana b’abakobwa.”

Yavuze ko yabaye Jenoside yihuse kandi iteguwe neza ku buryo abayikoze bahanze udushya bakoresheje tugera kuri 56 nk’uko ibarura ribyerekana.

Mu ijambo rye, Amb. Rugira yasabye gukora ibishoboka byose aya mateka akandikwa, ubuhamya bugatangwa kuko kwibuka ari ugufasha n’abandi kugira ngo ntibizababeho.

Amb. Rugira yanashimiye abagize igitekerezo cyo gutangiza ibi bikorwa byo kwibuka muri iyi Kaminuza ya Louvain, kuko ifitanye amateka ya hafi n’u Rwanda dore ko hize abanyarwanda benshi harimo n’abakoze jenoside.

Karangwa Marie Pierre, Perezida wungirije wa Ibuka-mémoire & Justice Belgique, yasabye abakiri bato ko gufata ingamba zo gusigasira amateka y’ababyeyi n’inshuti bambuwe ubuzima kubera ko bavutse ari Abatutsi.

Byashimangiwe na Gilles Bazambanza uyobora Diaspora nyarwanda mu Bubiligi, wavuze ko ‘kubona urubyiruko rwitabiriye ari rwinshi bitanga icyizere cy’ejo heza kuko ibyo turimo ntabwo ari guta inyuma ya Huye, barumva kandi ndabizeye’.

Muri uyu mugoroba wo kwibuka kandi abahanzi Nyiranyamibwa Suzane na Innocent Mugwaneza, baririmbye indirimbo zijyane n’iki gikorwa.

Hanabayeho guteranira ku gishyito, hatangirwa ubuhamya cyane cyane hahabwa umwanya imiryango yazimye, bayivuga amazina uko babanye n’ababazi ndetse n’uko basaga, ibyo bakundaga, mbese ubuhamya bugarurira umuntu isura y’uwazimye.

Nyuma y'urugendo rwo kwibuka babwiwe ijambo n'urubyiruko
Abana bahawe umwanya batanga ubuhamya, bavuga imivugo bibuka abo batabashije kumenya amasura ariko bazi kubera kuganira n’ababyeyi babo
Amb. Rugira avuga ijambo muri Kaminuza ya UCL igihe cyo kwibuka ku nshuro ya 25 jenoside yakorewe Abatutsi
François Kayitakire wahoze ayobora Ibuka Mémoire & Justice-Belgique, avuga ijambo
Gilles Bazambanza uyobora Diaspora nyarwanda mu Bubiligi mu ijambo rye yavuze ko kubona urubyiruko mu bikorwa byo kwibuka ari rwinshi bitanga icyizere cy'ejo heza
Jean-FrançoisCahay acurangira urubyiruko mu ndirimbo zijyanye no kwibuka
Kanzayire Liliane, umuhuzabikorwa w'itsinda ritegura Kwibuka, avuga ijambo ry'umunsi muri Kaminuza ya UCL
Karangwa Marie Pierre, Visi Perezida wa Ibuka-mémoire & Justice Belgique, avuga ijambo
Providence Rwayitare wayoboye imihango mu gice cya mbere
Ernest Sagaga yavuze ku buryo itangazamakuru ryagize uruhare rubi muri Jenoside
Umuririmbyi Innocent Mugwaneza
Urubyiruko ruvuga ijambo nyuma y'urugendo rwo kwibuka
Umuhanzi Nyiranyamibwa Suzane yaririmbye indirimbo zo kwibuka

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kalisa Canizio 2019-04-22 11:05:49

Yego rwose. Igikorwa mwakoze kirakwiye kandi ndabona mwarabiteguye neza.

Kwamamaza