Sénégal: Abanyarwanda n’inshuti zabo bizihije umunsi wo kwibohora k’u Rwanda

0 12-07-2017 - saa 19:50, Karirima A. Ngarambe

Abanyarwanda n’inshuti zabo basaga 750 bifatanyije mu kwizihiza umunsi ngarukamwaka wo Kwibohora k’u Rwanda ku ya 4 Nyakanga.

Ibirori byabereye mu nzu ndangamurage yitiriwe Léopold Sédar Senghor, iri i Dakar mu murwa mukuru wa Sénégal; byitabiriwe n’abahagarariye ibihugu n’imiryango mpuzamahanga basaga 100. Byanitabiriwe na Minisitiri w’Ubucuruzi muri Sénégal, Alioune SARR ahagarariye igihugu cye.

By’umwihariko ibirori byarimo Gen Mansour Seck wabaye Ambasaderi wa Sénégal muri Leta Zunze Ubumwe za Amerika, uyu akaba muri 1993 yari Umugaba w’ingabo ubwo ingabo za Sénégal zinjizwaga mu ngabo za MINUAR zari mu Rwanda.

Ambasaderi w’u Rwanda muri Sénégal, Dr.Mathias Harebamungu, yashimiye ubuyobozi n’abaturage b’iki gihugu ku nkunga bateye Abanyarwanda mu rugamba rwo kwibohoza no kwiyubaka.

Yashimiye kandi abitabiriye uwo muhango, ababwira ko ukuza kwabo ari inkunga ikomeye ku Rwanda. Yarase ibigwi by’Intwari z’umuryango wa FPR Inkotanyi zahagaritse Jenoside yakorewe Abatutsi ndetse zigakura u Rwanda mu mage.

Yashimye Abanyarwanda n’inshuti zabo kuba barashyize hamwe mu kongera kubaka igihugu cyabo.

Ambasaderi yavuze ko urugamba rwo kwibohora rugikomeza mu isura yo kubaka imyumvire, iterambere rirambye kandi riboneye u Rwanda.

Yanibukije abari aho ko Abanyarwanda bihitiramo ubuyobozi bubabereye bagamije kubaka ejo heza habo, aboneraho guhamagarira Abanyarwanda bakiheje kwegera abavandimwe babo bagafatanya kwiyubakira igihugu.

Yanabakanguriye kuzitabira ku bwinshi amatora y’Umukuru w’igihugu ateganyijwe ku ya 3 no ku ya 4 Kanama kugira ngo biheshe agaciro bubaka ejo bifuza.

Ambasaderi yagarutse ku magambo ya Perezida Paul Kagame ubwo yafunguraga inama ya 29 ya Afurika Yunze Ubumwe, abwira abari aho ko u Rwanda ruzakomeza gufatanya n’ibihugu bya Afurika mu guharanira ijabo ryabo, kwihesha agaciro no kwigira byo nkingi ya mwamba y’Afurika yigenga.

Minisitiri SARR yashimiye Perezida Pau Kagame ku miyoborere n’ubudasa yagaragaje yaba muri Afurika no ku isi yose.

Yashimiye kandi Abanyarwanda ku iterambere ry’icyitegererezo bagezeho.

Minisitiri w’Ubucuruzi wa Sénégal yasoje yibutsa ko Sénégal yifuza gushyira mu bikorwa amasezerano yagiranye n’u Rwanda agamije kongera imibanire n’ubutwererane hagati y’ibihugu byombi.

Abitabiriye uyu muhango bamurikiwe amateka y’urugamba rwo kwibohora kw’Abanyarwanda ndetse n’umuco nyarwanda mu mbyino z’Itorero Abatangana n’indirimbo z’umuhanzi Manu Bagabo aherekejwe n’abaririmbyi bazwi ku izina rya Washa. Ibirori byashojwe n’umudiho w’imbyino y’Intsinzi n’imihigo y’Abanyarwanda bahabamya ko bazakomeza kwiyubakira ejo habo heza.

Abahagarariye ibihugu byabo n'imiryango mpuzamahanga muri Sénégal basaga 100 bifatanyije n'Abanyarwanda kwizihiza umunsi wo kwibohora
Ambasaderi w’u Rwanda muri Sénégal, Dr. Mathias Harebamungu (iburyo)
Abanyarwanda basusurukije ibirori mu muco gakondo nyarwanda
Ambasaderi w’u Rwanda muri Sénégal, Dr.Mathias Harebamungu yakiriye Minisitiri w’Ubucuruzi muri Sénégal, Alioune SARR (Ibumoso)
Abambasaderi batandukanye bitabiriye ibirorii by'umunsi wo kwibohora k'u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza